30
Vinaravara Zama Leana
(Keke kinera te Devita pude va madia sa Zelepade)
1 Zihova, va lavatigo rau si Goi,
sina ele va sare au Goi
meke lopu va kilasau rina qua kana.
2 Kei Zihova, qua Tamasa,
ele varavara atu si rau koa Agoi,
meke ele salaṉau Goi.
3 Zihova, ele harupu pule nau Goi koa sa lovu,
ele va sare au Goi koa rini pu hiva va mate au.
4 Mi kera vahesia se Zihova, ke gamu na tie raṉeraṉe;
mi va lavatia sa pozana hopena.
5 Ura sa Nana binugoro si pa totoso papakana mo,
ba sa Nana minana koa rini pu qetu ni Sa si koa hola ninae rane.
Sa kinabokabo si pa keke boṉi holana mo,
ba pana munumunu si na qinetuqetu marilaena.
6 Meke zama si rau, “Ba lopu kaqu tava kilasa si rau,” gua,
ura sokirae nia rau koe Zihova sa qua rinaṉeraṉe.
7 Ele toka nau Goi Zihova pa Mua tataru,
ke lopu tava rizu sa qua tinoa guana toqere,
ba pana lopu olaṉau Goi pa tinasuna si tarazuzu pa minatagutu si rau.
8 Koa Goi Zihova mo si varavara atu rau,
koa Goi Baṉara si tepa atua rau sa tinokae.
9 Nasa sa laequ rau be mate sa tiniqu?
Nasa laena sa tina pomunaequ pa lovu?
Kaqu boka vahesigo rina tie matedi si goi?
Kaqu boka tarae vura nia rini sa Mua tina ronuemu?
10 Kei Zihova, Mu avoso mae au pa Mua tataru,
Kei Zihova, Mamu toka nau.
11 Ele hobe nia pinekapeka pa qinetuqetu Goi sa qua tinalotaṉa;
Ele va murimuri pania Goi sa qua kinuliusu,
meke poni nau Goi sa qinetu guana qua poko.
12 Gua asa ke, lopu kaqu makudo si rau pude kera vahesigo si Agoi,
kei Zihova, qua Tamasa, maqu zama leana koa Goi, ninae rane ka rane.