37
Kalavarae koe Zihova
(Keke kinera te Devita)
1 Mu lopu va talotaṉa pule nigo pa tinoa leana tadi na tie kaleadi.
Mu lopu okoro ni sari na tinoa tadi pu tavete va kaleana.
2 Lopu seunae meke kote mate gua mo na duduli si arini,
meke harahara gua rina hiqohiqo hitehite.
3 Kalavarae koe Zihova, mamu tavete valeana,
pude mu koa tava sare koasa popoa sapu ponigo Sa.
4 Mu koa qetu nia se Zihova meke kaqu poni nigo Sa,
gua sapu okoro nia sa bulomu.
5 Mu ponia sa mua tinoa koe Zihova,
mu kalavarae koa Sa, meke kaqu toka nigo Sa.
6 Kaqu malara vura sa mua tinoṉoto
guana kalalasana sa rimata pana korapa rane.
7 Mu aqa va ṉoṉo pa kenuna e Zihova,
mamu nabulu va ṉoṉo nia si Asa.
Mu lopu okoro ni na va talotaṉa pule nigo pa binalabaladi ri pu koa ravutu pa dia tinoa,
meke sarini pu vagi tinagotago koari na dia tinavete na hahanana sea.
8 Mu lopu puku hola nia sa binugoro,
meke talotaṉa nia goi sa dia tinavete kaleadi
sina kote va kamo nigo sa pa kinaleana.
9 Ura sari na tie kaleadi si kaqu tava mate palae,
ba arini pu kalavarae koe Zihova si kaqu tago hola ia rini sa popoa sapu poni ni Sa.
10 Lopu sana kaqu tava murimuri palae sari na tie kaleadi,
meke be hatai goi ba lopu kaqu ta dogoro pule.
11 Ba saripu va pepekae pule ni
si kaqu tago hola ia rini sa popoa sapu poni ni e Zihova.*Mt 5:5
Meke kaqu koa va learane sa dia kinoa.
12 Sa tie kaleana si balabala ia sa siraṉa pude ṉoṉovalia sa tie toṉoto.
Sipu doṉo la ia mo sa ba garata livona na ta ṉaziri nia sa.
13 Ba hegere nia e Zihova sa tie kaleana,
sina gilania Sa sapu lopu sana kaqu tava kilasa mo si asa koe Tamasa.
14 Lobusu vagi rina tie va gugue sari na dia magu varipera,
meke ṉavei rini sari na dia bokala pude va matei sari na tie malaṉa na habahualadi,
meke va matei sarini pu toṉoto sari na dia tinavete.
15 Kaqu tava mate pule pa dia magu varipera soti teledia si arini,
meke kaqu ta moku va umumu sari na dia bokala.
16 Sa vasi tinago hitekena tanisa tie toṉoto,
si arilaena hola nia sa tinagotago nomana tadi na tie kaleadi.
17 Kaqu va murimuria e Zihova sa ṉiniraṉira tadi na tie kaleadi,
ba kaqu va sarei Sa sari na tie toṉoto.
18 Tataru ni e Zihova sarini pu va tabea si Asa,
meke kaqu tagoa rina tudia sa popoa sapu ele poni ni Sa ninae rane ka rane.
19 Koari totoso kaleadi si lopu kaqu koa tasuna si arini,
meke pa totoso soṉe ba kaqu ari gedi ginani.
20 Sari na tie kaleadi si kaqu mate palae,
meke saripu kanaia se Zihova si kaqu guana havoro pu harahara meke mate,
kaqu kekeṉoṉo guana tuṉaha sapu murimuri si arini.
21 Sa tie kaleana si vagivagi paki meke lopu boka hobehobe pule.
Ba sa tie toṉoto si na tie variponi,
meke na ari gana ke variponi moka va soku.
22 Sarini pu tamanae koe Zihova si kaqu tagoa sa pepeso pu poni ni Sa,
ba arini pu leve ni Sa si kaqu ta hadu taloa.
23 Turaṉi e Zihova sari tie vasina pu kaqu ene la ia sa,
meke va sarei Sa sarini pu va qetua si Asa.
24 Be ta tubarae si arini, ba lopu kaqu hoqa,
sina tuqei e Zihova sari na limadia.
25 Ele gelenaena sa qua tinoa, meke kamahire na barogoso si rau,
ba lopu ele dogoria rau sapu muliṉi nia e Zihova si keke tie toṉoto,
babe tepa lamae ginani pa tie sari na tuna.
26 Doduru totoso si variponi pa nana hiniva soti si asa,
meke kaqu mana ni e Tamasa sari na tuna.
27 Luaria sa kinaleana, mamu tavetia gua sapu leana,
pude kaqu koa hola ninae rane koasa popoa sari na tutimu.
28 Ura qetu nia e Zihova gua sapu toṉoto,
meke lopu hite muliṉi ni Sa sari Nana tinoni pu soto va nabu koa Sa pa rinaṉeraṉe,
aquni Sa si arini ninae rane,
ba sari na tutidi rina tie kaleadi si kaqu ta hadu palae koasa pepeso.
29 Sari na tie toṉoto si kaqu tagoa sa popoa pu poni ni sa Tamasa,
meke kaqu koa vasina sarini ninae rane ka rane.
30 Sa tie toṉoto si zama ni sari na zinama tumatumae,
meke tozia sa sapu gua leana meke ṉoṉo.
31 Va naqiti sa pa bulona sari na tinarae te Tamasa,
meke lopu hite luari sa si arini.
32 Sa tie kaleana si pequ nia sa sa tie toṉoto pude va matea gana gua.
33 Ba lopu kaqu veko pania e Zihova si asa pa limadia ri nana kana,
babe va malumia pude tava kilasa pa minate pana ta pitu si asa.
34 Kalavarae koe Zihova mamu kopu ni sari Nana tinarae,
meke kaqu va lavatigo Sa si goi meke ponigo Sa sa popoa!
Meke kaqu dogoro sotia goi sa minate tadi na tie kaleadi.
35 Ele dogoria rau si keke tie kaleana sapu toa va mataqara,
ululu hola ni sa sari na tie, gua tugo na ṉati ivili lavata.
36 Ba hola kaiqa vuaheni meke ene hola gua vasina si rau,
hata ia rau si asa ba lopu ta dogoro si asa.
37 Mamu doṉo gilania sa tie toṉoto,
ura kaqu koa valeana sari na tutina sa tie bule koasa pepeso.
38 Sari na tie kaleadi si tava puzulu,
meke sari na tutidia si tava murimuri palae.
39 Harupi e Zihova sari na tie toṉoto,
meke va sarei Sa pa tinasuna.
40 Toka ni e Zihova sarini,
meke lavelave ni na harupi Sa koari na tie kaleadi,
sina koa aqorae koa Sa si arini.