44
Tinepa Tinokae Koe Tamasa
(Keke kinera tadi na Livaeti pa tutina Kora)
1 Kei Tamasa, ele avoso soti gami pa taliṉa mami koari na tiatamamami,
sari na ginugua nomadi pu evaṉi Goi koari na dia totoso pukerane.
2 Pa Mua ṉiniraṉira soti si hadu pani Goi sari na butubutu huporo,
ba sari na Mua tinoni si kopu ni Goi pude di koa valeana.
Sari na votiki butubutu si va kilasi Goi,
ba sari na Mua tie si vata rupahi Goi.
3 Lopu koari na dia magu varipera
si boka vagia rini sa popoa pu koa ia rini,
meke lopu pa dia ṉiniraṉira soti teledia,
ba pa Mua ṉiniraṉira si koa va mataqara si arini,
sina vata dogoro nia Goi sa Mua tataru lavata, sipu toka ni Goi si arini.
4 Agoi sina qua Baṉara meke na qua Tamasa.
Meke Agoi si va mataqari sari na Mua tie,
5 Pa Mua ṉiniraṉira Goi si va kilasi gami sari na mami kana,
meke huara va ineti gami sarini pu ṉoṉovala gami.
6 Lopu raṉea rau sa qua bokala,
meke lopu boka harupau sa qua magu varipera si rau.
7 Ba Agoi mo si harupu gami koari na mami kana,
meke va kilasi Goi sarini pu kukitini gami.
8 Ke kaqu vahesigo gami si Goi doduru totoso,
meke kaqu zama leana si gami koa Goi ninae rane.
9 Ba ele etulu pani gami tu Goi si gami,
ke tava kilasa si gami koari mami kana,
meke lopu somana ene luli si Goi koari na mami tie varipera.
10 Ele va tarazuzu gami Goi,
ke goveteni gami sari na mami kana,
meke la rini meke zau vagi sari na mami likakalae.
11 Ele valani gami Goi si gami koari na mami kana,
guana sipi pu ele ta vizata pude tava mate meke ta hena.
Ele vata hurakatae lani gami Goi si gami pa seu koari na votiki butubutu.
12 Ele holuholu ni Goi sari na Mua tie soti pa hinolu gorena
sapu guana loke laemami si gami.
13 Sari na tie pa votiki butubutu pu koa tata koa gami,
si dogori rini gua sapu taveti Goi koa gami,
meke va sisireni gami.
14 Ele va evaṉaeni gami na vina sisireana Goi si gami koari na tie pa votiki butubutu.
Hoke hiruhirue batudi si arini pana ṉoṉovala gami rini.
15 Doduru rane si koa variva taru, na kurekure si rau,
16 sipu avosi rau sari na zinama ṉoṉovalaqu koari na qua kana,
meke koarini pu hiva tube au.
17 Sari doduru tinasuna hire si ta evaṉa koa gami,
ba lopu luara panigo gami si Goi,
meke lopu va kari pania gami sa Mua vinariva egoi koa gami.
18 Lopu hite etuligo gami si Goi,
meke lopu hite sekea gami sa Mua tinarae.
19 Ba ele veko pani gami tu Goi pa varikorapadi rina kurukuru pinomo,
meke va opo tamununi gami Goi sa adumuna sa minate!
20 Be muliṉi nia gami, sapu Agoi Zihova sina mami Tamasa,
babe vahesi gami si kaiqa tamasa votikaedi pule,
21 ba kote ta gilana mo koa Goi.
Ura na gilani Goi sari na binalabala tomedi pa bulomami.
22 Koasa laemu Goi, si tata tava mate nia gami doduru totoso,
gua tugo rina sipi si gami pu ta turaṉa va namanama, pude tava mate.* Rom 8:36
23 Baṉara, Mu tuturei mae harupau!
Na vegua ke aqa si Goi?
Mu tuturei mae, Mu lopu veko pani gami ninae rane.
24 Na vegua ke tome Mua si Goi?
Mu lopu muliṉini gami koari mami tinasuna.
25 Ele tava hoqa si gami pa pepeso,
meke lopu boka turu pule,
ele tava kilasa si gami.
26 Mu tuturei mae harupu gami,
Mu va sare gami koa gua koasa Mua tataru lopu ta ṉana kamona.