66
Kinera Vinaravara meke Zama Leana Koe Tamasa
1 Mi velavela vahesia sa Tamasa pa qinetuqetu,
gamu doduru tinoni pa kasia popoa.
2 Mi kera vahesia se Zihova.
Mi vala sa vinahesi na vina lavata koa Sa.
3 Mi zama la guahe koe Tamasa,
“Variva magasa hola sari na Mua tinavete!
Nomana hola sa Mua ṉiniraṉira,
ke matagutu sari Mua kana meke todoṉo pa kenumu Goi.
4 Sari doduru tinoni pa kasia popoa si vahesigo.
Kera atu ni rini sari na kinera vinahesi,
meke kera va lavatigo rini si Agoi Zihova.”
5 Mae mamu dogori gua sapu taveti sa Tamasa.
Variva magasa sari na Nana tinavete pu poni ni Sa koari na tie.
6 Va popa ia Sa sa kolo, meke ene karovo koa sa ovuku popana sari na tie.*Ekd 14:21; Zos 3:14-17
Qetuqetu si gita, sina koa gua koari Nana tinavete Sa.
7 Koa Baṉara si Asa ninae rane ka rane;
meke kopu totoko ni Sa sari doduru butubutu.
Sari na tie va guguedi si madi lopu koa ululu hola koa Sa.
8 Vahesia sa Tamasa, gamu na tinoni;
mani ta avoso sari mamalaiṉi vinahesina Sa.
9 Kopu ni gita Sa si gita pude toa,
meke lopu va malumu gita Sa pude gulazoro hoqani gita.
10 Tamasa, ele podeke gami Goi si gami,
kekeṉoṉo sa siliva sapu ta kina pude tava via pa nika.
11 Ele guana voi gami Goi si gami pa korapana sa Mua vaqara,
meke veko gami Goi pa tinasigiti.
12 Ele va malumi Goi sari na mami kana pude neti kasopi sari na tinimami,
ene nuquru hola i gami sari na nika, na naqe,
ba ele turaṉa va kamo gami Goi pa keke vasina pu koa tavasare si gami.
13 Kaqu paleke mae ni rau sari na vina vukivukihi va uququ pa korapana sa Mua Zelepade;
kaqu poni Igo rau gua saripu ele va tatara Nigo rau.
14 Kaqu ponigo rau kamahire gua saripu ele tozi Nigo rau
totoso koa si rau pa tinasuna.
15 Kaqu vukivukihi atu ni rau pa hope sari na kurukuru nobonobokodi,
sari na sipi kokoreo, na bulumakao kokoreo, meke na qoti,
meke kaqu vuga sage pa galegalearane sari na tuṉahadi rini.
16 Mi mae, mamu va avoso,
gamu doduru pu pamaṉa nia sa Tamasa;
Maqu tozini gamu gua saripu ele evaṉi Sa koa rau.
17 Velavela va ululae la si rau koa Sa pa qua tinepatepa tinokae,
vahesia rau si Asa koari na kinera.
18 Be tomei rau sari na qua sinea pa buloqu,
si lopu kaqu avosau sa Baṉara.
19 Ba ele va avoso hinokarau sa Tamasa si rau;
ele avosia Sa sa qua vinaravara.
20 Vahesia rau sa Tamasa,
sina lopu kilu ia Sa sa qua vinaravara,
meke lopu heki nia Sa sa Nana tataru nabuna koa rau.