68
Kinera Minataqara Tanisa Butubutu Izireli
(Keke kinera te Devita)
1 Mani mae va talahuarae i e Tamasa sari Nana kana;
madi govete taloa pa kenuna Sa saripu kukiti nia si Asa!
2 gua sapu ta givusu palae sa tuṉaha,
si mani hadu taloa ni Sa,
guana deana sapu tava kolo pa nika,
si mani va matei Sa si arini pa kenuna.
3 Ba sari na tie toṉoto si koa qetuqetu pa kenumu Goi;
madi koa qetuqetu sisigiti tugo si arini.
4 Mi kera la koe Tamasa,
kera vahesia sa pozana Sa.
Mi kera va ululae la koa Sa pu mae habotu koari na lei.
Sa Pozana Sa si e Zihova;
mi koa qetu pa kenuna Sa.
5 Sa Tamasa pu koana pa Nana vetu hopena,
sina tinokae tadi na eapa meke na naboko.
6 Poni ni vasina kokoana Sa saripu eapa na naboko,
meke vata rupahi Sa saripu ta pusidi;
ba sari na tie va guguedi si kaqu koa koasa rimata ṉiṉirana pa vasina ivuluna.
7 Kei Tamasa, totoso turaṉi Goi sari na Mua tie,
sipu ene hola nia rini sa soloso qega,
8 si niu sa pepeso,
meke gore sa luturu pa kenuna sa Tamasa tadi na tie Izireli,*Ekd 19:18
pa kenuna sa Tamasa pa toqere Saenai.
9 Kei Tamasa, na luturu lavata si va gorea Goi,
pude va masuru pulea sa pepeso tava tatarana.
10 Sari na Mua tie si kuri sari dia vetu koasa popoa sana;
pa korapa Mua lineana si poni Goi sari na habahuala.
11 Tozia Tamasa sa Nana zinama,
meke soku hola barikaleqe si palekia sa inavosona.
12 Sari na baṉara meke sa qeto minate si govete,
ke vagi rina barikaleqe pa popoa sari na dia likakalae pu ta ṉovala,
meke va hihia i rini sari na tiṉitoṉa ta vagidi,
13 sari na tatapurudi rina kukuva si ta tavetae siliva,
meke sari na kaludi si ṉedala
meke ta tavetae qolo tolavaena.
Arini tugo sari na vinagi tadi pu koa hola tata pa nika koa sa vasina pu koa ia rini.
14 Sipu va hurakatae i sa Tamasa pu tagoi sari doduru ṉiniraṉira sari na baṉara,
si va gorea Sa sa sinou pa toqere Zalamoni.
15 Kei Basani! Toqere lavata,
sapu soku batu minominona!
16 Na vegua ke doṉodoṉo ta ṉaziri nia tu goi sa toqere
sapu vizatia Tamasa pude koa ia Sa?
Kaqu koa Baṉara vasina sa Tamasa ninae rane ka rane.
17 Sa Baṉara si gore mae guana pa toqere Saenai koari vurotina na tina totopili varipera,
meke nuquru la pa vasina hopena.
18 Totoso sage la pa vasina ululuna hola si Asa,*Epi 4:8
si turaṉi Sa sari kobi tie ta raovodi,
meke vagi vinariponi si asa koari na tie,
kamo koarini pu varipera la koa Sa,
pude kaqu koa vasina se Zihova sa Tamasa.
19 Mani tavahesi sa Tamasa sa nada Baṉara,
sapu palekedi sari na nada pinaleke doduru rane.
Asa sa nada Hinarupu.
20 Sa nada Tamasa si na Tamasa variharupi.
Asa tugo se Zihova sa nada Baṉara sapu va sare gita pa minate.
21 Ba kaqu va puzulu ṉaepi Tamasa sari Nana kana,
saripu lulidi sari na hahanana seadi.
22 Zama sa Baṉara, “Kaqu turaṉa pule maeni Rau sarini pu koadi pa Basani;
kaqu va pule maei Rau saripu koadi pa hubi lamana,
23 pude mu ovovae ni sari na eharadi;
pude sari na mia siki ba kaqu vagi gedi hinia tugo pude meai sari na eharadi rini,” gua si Asa.
24 Ke Tamasa, sa Mua inene va mataqara si ta dogoro koari doduru tie,
sa puku vinarigara tie te Tamasa sa qua Baṉara sapu ene nuquru pa Nana vasina hopena.
25 Sari na tie kerakera si luli pa mudimu Goi,
meke sari na vineki pu kizai sari na tabarini si pa kokorapana,
meke sari na tie mikemike si luli mumudi mae.
26 Mi Vahesia sa Tamasa koari Nana vinarigarae tinoni,
gamu na tutina e Zekopi,
mi vahesia se Zihova.
27 Sa butubutu Benisimane sapu hitekena koari doduru si kekenu,
meke luli la sari na koimata pa butubutu Ziuda koasa dia pukuna,
meke luli mudi la sari na koimata pa Zeboloni meke Napitalai.
28 Ke Tamasa, Mu vata dogoro nia sa Mua ṉiniraṉira;
sa Mua ṉiniraṉira gua sapu tavetavete nia Goi koa gami totoso lahe,
29 koasa Mua Zelepade pa Zerusalema,
vasina atu luari rina baṉara sari na dia vinariponi koa Goi.
30 Mu norea sa baṉara pa Izipi
sapu gua tugo na basioto pa korapa ovuku,
Mu norei sari na butubutu huporo,
saripu gua tugo na bulumakao kokoreo pu turaṉa tudia
osolae kaqu todoṉo Nigo rini,
meke ponigo sari na dia siliva.
Mu va talahuarae i sarini pu okoro nia sa vinaripera.
31 Kaqu vura mae pa Izipi sari na turuhabotu,
meke sari na tiena sa Itiopia
si kaqu va sagei rini sari na limadia pa vinaravara la koe Tamasa.
32 Mi kera la koe Tamasa,
ke gamu na butubutu pa kasia popoa;
mi kera vahesia sa Baṉara;
33 vahesia si Asa sapu ene mae pa korapa maṉauru pukeranedi hola.
Dotu, va vuraia sa sa mamalaiṉina koari na paka maṉauru.
34 Mi tozi vura nia sa ṉiniraṉira tanisa Tamasa;
Asa sa baṉara tolavaena pa Izireli,
sa Nana ṉiniraṉira si koa koari vina podaka pa Maṉauru.
35 Variva matagutuna sa Tamasa koasa Nana vasina hopena;
Asa sa Tamasa pa Izireli!
Ponia Sa koari Nana tie sa ṉiniraṉira.
Mi vahesia sa Tamasa!