70
Vinaravara Tinepa Tinokae
(Keke vinaravara te Devita)
Kei Tamasa, Mu harupau,
Mamu va sare au.
Mu tuturei toka nau, kei Zihova.
Madi tava kilasa na tava nunala gedi sarini pu korapa podekia pude va mate au.
Madi tava kekere pule taloa na talotaṉa gedi saripu hiva va tasuna au.
Sarini pu zama mae au, “Dotu, isara, sari na mua sinea!” gua,
si madi tava nunala gedi pa dia kinurekure.
Ba sari doduru pu hata Igo si kaqu koa qetu koa Goi,
Meke sarini pu qetu nia sa Mua tinaharupu,
si madi zama, “Tava lavata sa Tamasa!” gua.
 
Habahuala na malaṉa si rau;
tuturei mae koa rau qua Tamasa,
Agoi si na qua Hinarupu;
kei Zihova, Mu tuturei mae toka nau.