72
Keke Vinaravara pude Toka nia sa Baṉara
(Keke vinaravara te Solomone)
1 Kei Tamasa, Mu va tumatumae nia koasa baṉara,
gua pude varipitui ni sari na tie pa Mua tinoṉoto.
Mu ponia sa mua tinoṉoto koasa baṉara.
2 Mani baṉara ni sa sari na Mua tinoni pa tinoṉoto,
meke toka ni sari na habahuala pa Mua vinilasa va toṉoto.
3 Mani ravutu sa popoa,
meke mani gilania rina tie sa tinoṉoto.
4 Mani varipitui va toṉoto ni sa baṉara sari na habahuala,
mani toka ni sarini pu malaṉa,
meke mani va kilasi sa sarini pu ṉoṉovali si arini.
5 Mani koa hola sa mia baṉara ninae rane,
osolae lopu koa sa rimata meke sa sidara.
6 Sa tinolitolie tanisa baṉara si mani kekeṉoṉo na ruku pu va toai sari na duduli.
Guana ruku remiremisi pu hoqa pude va bobosia sa pepeso
7 Mani lovuru valeana la pa doduru vasina sa tinoṉoto tadi na tie koasa nana binaṉara;
madi koa tie mamutu si arini ninae rane ka rane koa sa binule.
8 Sa nana binaṉara si mani kamo la pa doduru popoa pa kalidi rina lamana,* Zak 9:10
meke podalae pa Ovuku Iuparetisi meke kamo la koari na hukihukirina sa kasia popoa.
9 Madi hoqa todoṉo pa kenuna Sa sari nana kana,
meke madi tava kilasa gedi sarini pu kukiti nia.
10 Sari na baṉara pa Sipeini meke koari na nunusa pa seu si kaqu la veko dia vinariponi koa sa,
meke sari na baṉara pa Siba meke pa Seaba* Sari na popoa Siba meke Seaba si ta pozae Yemen meke Ituraea pa rane ṉinoroi. si kaqu paleke la dia vinariponi koa sa.
11 Madi todoṉo pa kenuna sa sari doduru baṉara,
madi nabulu nia ri doduru butubutu si asa.
12 Ura ele harupi sa saripu malaṉa meke tepa la tinokae koasa,
meke sari na habahuala pu loke dia tinokae.
13 Tataru ni sa saripu malohoro na habahuala,
meke harupi sa sari na tinoa tadi pu koa pa tinasuna.
14 Va sarei sa si arini pu ta naqoto gore meke ta ṉoṉovala pa dia tinoa;
sari na dia tinoa si marilaedi hola koa sa.
15 Mani toa va gelenae sa baṉara,
mani ta poni koa sa sari na qolo pa Siba.
Madi lopu makudo la varavara nia rini si asa,
meke mani ta manae si asa koe Tamasa doduru totoso.
16 Madi soku palapalae vuadi sari na linetelete pu toa pa pepeso,
kamo koari na toqere ba madi opotamuni na linetelete,
madi vua katakata si arini, gua tugo pa Lebanoni.
Madi koa va soku koari na vasivasileana nomadi sari na tinoni,
gua tugo rina ilaka pu opotamuni na duduli.
17 Mani lopu ta muliṉae sa pozana sa baṉara,
mani koa hola ninae rane sa pozana sa, gua tugo sa seunaena gua sa rimata.
Madi tamanae tugo sari doduru butubutu pa kasia popoa koasa,
meke sari doduru butubutu si kaqu poza ia rini, “Na tie tamanaena si asa,” gua.
18 Vahesia se Zihova, sa Tamasa tadi pa Izireli,
telena sa taveti sari doduru tiṉitoṉa variva magasadi.
19 Mada vahesia sa pozana; marilaena sa Tamasa ninae rane.
Mani siṉia Nana ṉiniraṉira na ṉinedalana sa doduru kasia popoa.
Hinokara, Emeni.* Keke zinama pukerane si koroto mana.
20 Hie sa vinabetodi rina vinaravara te Devita, sa tuna Zese.