76
Sa Tamasa si Koa Mataqara
(Keke kinera te Asapa)
1 Sa Tamasa si ta gilanana pa Ziuda,
meke sa Pozana si tava lavata pa Izireli.
2 Sa Nana vasina soti si pa Zerusalema,
meke koa si Asa pa Toqere Zaione.
3 Vasina si moku panipani Sa sari na tupi, na lave,
meke na magu varipera tadi na Nana kana.
Uve, moku panipani Sa sari doduru dia tiṉitoṉa varipera.
4 Sa Mua ṉinedala si marilaena hola Tamasa,
variva magasa si Goi Baṉara sipu pule va mataqara mae koari na toqere,
sipu ele va kilasi Goi sari na Mua kana.
5 Ele va mate betoi Goi sari na tie varipera ṉiṉiradi,
meke vagi betoi sari na dia tiṉitoṉa.
Meke kamahire si mate beto si arini guana puta pa minate,
lopu boka ovuli rini sari na limadia.
6 Kei Tamasa te Zekopi, sipu norei Goi si arini,
si hoqa mate beto sari na dia hose, na tie varipera pu koi koari na hose.
7 Ba Agoi Zihova si variva matagutu,
pana bugoro si Goi, si loke tie si boka turu pa kenumu Goi.
8 Sa Mua vinaripitui si ta gilanana mae gua tu pa Maṉauru;
matagutu sari na tinoni pa pepeso,
ke lopu hite ṉudu va ṉada,
9 totoso vura mae sa Tamasa meke tavetia Sa sa vinaripitui,
pude harupi saripu ta ṉoṉovala pa popoa pepeso.
10 Sa binugoro tana tie si va ṉiṉira ia tu sa vinahesimu Goi;
meke sari na Mua tie pu tava sare koasa qeto minate varipera si kaqu kopuni sari na Mua rane hopedi.
11 Mu poni koe Zihova sa Mua Tamasa gua sapu ele va tatara ni goi koa Sa;
mi paleke lani koa Sa sari na mia vinariponi gamu kasa na votiki butubutu pu koa tata pa varikalina sa popoa Izireli,
ta hivae tugo pude pamaṉa nia gamu si Asa.
12 Va mataguti Sa sari na tie nomadi,
meke va tarazuzui Sa sari na baṉara.