86
Vinaravara Tinepa Tinokae
(Keke kinera te Devita)
1 Kei Zihova, Mu avoso mae, Mamu olaṉa mae au,
ura na malaṉa na malohoro si rau.
2 Mu harupau pa minate,
sina koa soto koa Goi si rau.
Mu harupau, ura na Mua nabulu si rau,
meke kalavarae si rau koa Goi.
3 Kei Baṉara, Mu tataru nau na taleoso nau,
ura koa Goi mo si varavara atu rau doduru totoso.
4 Mu va qetua sa buloqu, na Mua nabulu si rau,
sina koa Goi mo si varavara atu rau pa doduruna sa buloqu.
5 Kei Baṉara leamu hola si Goi koa gami, meke ele taleosoni gami Goi.
Va siṉi ni tataru nabuna Goi sarini pu varavara atu.
6 Kei Zihova, Mu va avosia sa qua vinaravara,
Mu toka nau pa qua tinepa atu koa Goi.
7 Pa totoso tasuna si tepa atu Igo rau,
sina hoke olaṉi Goi sari na qua vinaravara.
8 Loketoṉa tamasa pule si kekeṉoṉo gua Agoi,
kei Baṉara, loke tinavete pule si kekeṉoṉo gua rina Mua tinavete.
9 Sari doduru butubutu pu taveti Goi,* Rev 15:4
si kaqu mae hoqa todoṉo meke vahesi Igo si Goi, Baṉara,
meke kaqu va lavatia sa Pozamu Goi.
10 Ura na Tamasa lavata si Goi, meke variva magasa sari na Mua tinavete,
Agoi mo Telemu sa Tamasa.
11 Kei Zihova, va tumatumae nau sa Mua siraṉa,
maqu lulia sa Mua hinokara;
va tumatumae nau gua pude nabulu Nigo pa doduruna sa buloqu.
12 Kei Baṉara qua Tamasa, kaqu vahesi Igo rau pa doduruna sa buloqu,
kaqu va lavatia rau sa Pozamu ninae rane ka rane.
13 Nomana lavata sa Mua tataru nabuna koa rau!
Ele harupu au Goi si rau koasa lovu.
14 Kei Tamasa, sari na tie vahesi pule ni si korapa varipera mae koa rau;
keke puku minate kaleana si korapa hiva va mate au,
sari na tie pu lopu pamaṉa nia sa Tamasa.
15 Ba Agoi Baṉara si ta siṉie tataru meke tokani na taleosoni sari na tie,
meke lopu hoke tuturei bugoro.
Meke sa Mua tataru lavata si koa hola doduru totoso,
meke kopu ni Goi sari na Mua zinama.
16 Mu doṉo mae au, Mamu tataru nau,
Mu va ṉiṉira au, Mamu harupau,
sina nabulu Nigo rau, gua sapu tavetia sa tinaqu.
17 Zihova, Mu va dogoro nau sa vina sosodena sa Mua lineana;
pude saripu kukiti nau si madi dogoria meke kaqu kurekure,
sina Agoi Zihova si ele toka nau meke va manotau si rau.