116
Vinahesi Tana Keke Tie pu Harupia Tamasa pa Minate
1 Tataru nia rau se Zihova, sina avosia Sa sa mamalaiṉiqu,
meke olaṉia Sa sa qua tinepatepa.
2 Ura ele avosau Sa si rau totoso tepa la koa Sa si rau,
gua asa ke kaqu tepatepa la mo koa Sa pa doduruna sa qua tinoa.
3 Sari na tinasuna tanisa minate si koa pa vari likohaequ,
meke sa minatagutuna sa lovu si koa tata koa rau.
Ele holoqoru na talotaṉa si rau.
4 Ke tiqe tepa la guahe si rau koasa Pozana e Zihova,
“Ke Zihova, tepa Igo rau si Goi, Mu harupia sa qua tinoa,”
5 Tataru meke toṉoto se Zihova,
meke siṉia na tataru variva taleosae si Asa.
6 Kopu ni e Zihova sari pu malohoro;
totoso tasuna rau, si harupau Sa.
7 Maqu raṉe va hinokaria se Zihova,
sina tavete valeana mae koa rau si Asa.
8 Ele harupau e Zihova si rau pa minate,
va moko au Sa pa qua kinabo,
meke harupau Sa pa vina kilasa koari na qua kana.
9 Ke kaqu ene si rau pa kenuna e Zihova,
pa popoa tadi na tie toadi.
10 Va hinokara si rau, ke maqu zama,*2 Kor 4:13
“Ta ṉovala hokara si rau,” gua.
11 Meke koasa qua tinalotaṉa si zama si rau,
“Lopu boka raṉea gita si keke tie,” gua.
12 Na sa si kaqu boka ponia rau koe Zihova
koari doduru Nana lineana koa rau?
13 Gua sapu ponia rau sa vaeni koe Zihova, si kaqu va lavatia rau koasa tinaharupu,
pude zama leana nia koa Sa sapu harupau Sa si rau.
14 Pa korapadi ri kobi tinoni
si kaqu ponia rau koa Sa gua sapu ele va tatara nia rau pude vala ia koa Sa.
15 Talotaṉa hola se Zihova
pude dogoria sa minate tadi Nana tie toṉoto.
16 Kei Zihova, hinokara na Mua nabulu si rau;
kaqu nabulu nigo rau, gua tugo sa tinaqu.
Ele rupahau Goi si rau pa minate.
17 Kaqu ponigo rau sa vina vukivukihi zama leana,
meke varavara atu koa Goi Zihova.
18 Pa korapadi ri kobi tinoni si kaqu ponia rau koa Sa
gua sapu ele va tatara nia rau pude vala ia koa Sa,
19 pa korapadi rina pavasa koasa Zelepade te Zihova,
sapu koa pa kokorapana sa vasileana Zerusalema.
Mi vahesia se Zihova!