125
Sa Vinasare tadi na Tie te Tamasa
1 Sarini pu kalavarae koe Zihova si gua tugo sa toqere Zaione,
sapu lopu kaqu boka tava rizu, ba turu hola ninae rane.
2 Gua sapu koa vari likohae nia rina toqere sa popoa Zerusalema,
si gua tugo sapu koa vari likohae ni e Zihova sari Nana tie,
podalae kamahire meke kamoa na kamoa.
3 Sari na tie kaleadi si lopu kaqu koa ṉati hiniva hola la pa popoa tadi na tie toṉoto;
pude gua asa, si kote tavete va sea tugo sari na tie toṉoto.
4 Kei Zihova, Mu valeana la koari na tie leadi,
sarini pu va tabei sari na Mua tinarae.
5 Ba pana va kilasi Goi sari na tie kaleadi,
si Mu va kilasa i tugo sarini pu luara pani sari na Mua hahanana leadi.
Gamu na tinoni Izireli mi koa bule!