130
Keke Vinaravara Tinepa Tinokae
1 Kei Zihova, pa korapadi rina qua tinasuna si kabo atu koa Goi si rau!
2 Kei Zihova, Mu avosia sa qua kinabo,
Mu va avoso mae ia sa qua tinepatepa!
3 Kei Zihova, be lopu muliṉi pani Goi sari na mami sinea,
si esei si kaqu boka govete nia sa tinazutu?
4 Ba taleosoni gami Goi,
pude mami pamaṉa Nigo gami si Goi.
5 Aqa zoṉazoṉa nia rau sa tinokae koe Zihova,
meke raṉea rau sa Nana zinama.
6 Aqa zoṉazoṉa nia rau se Zihova,
hola ni sari na tie kopu pana boṉi pu okoro turei kamoa sa munumunu;
Uve hinokara, hola ni sari na tie kopu pana boṉi pu okoro turei kamoa sa munumunu.
7 Kei gamu na butubutu Izireli, mi kalavarae koe Zihova!
Ura koa koa Sa sa tataru nabuna,
meke doduru totoso si hiva si Asa pude harupu gita.
8 Kaqu harupi Sa sari Nana tie Izireli*Mt 1:21; Ta 2:14
koari doduru dia sinea.