138
Vinaravara Zama Leana
(Keke kinera te Devita)
1 Kei Zihova, zama leana si rau koa Goi pa doduruna sa buloqu,
kera vahesi Igo rau si Goi pa kenudi ri doduru tamasa pule.
2 Tia la ia rau sa Mua Zelepade hopena
meke hoqa todoṉo si rau, meke vahesia rau sa Pozamu,
sina koa gua koasa Mua tataru nabuna, meke sa Mua kinopudi rina Mua zinama,
ura ele vata dogoro nia Goi sapu sa Pozamu meke sari na Mua zinama si ṉati hiniva ni sari doduru.
3 Totoso tepa atua rau sa tinokae, si va tabe au Goi,
meke pa Mua ṉiniraṉira si va ṉiṉira au Goi.
4 Sari doduru baṉara pa kasia popoa si kaqu vahesi Igo, ke Zihova,
sina ele avosi rini sari na Mua vina tatara.
5 Kaqu kera vura ni rini sari doduru gua pu evaṉi Goi,
meke sa guguana sa Mua ṉiniraṉira lavata.
6 Ululumu hola si Goi Zihova,
ba kopu ni Goi saripu koa va pepekae,
meke saripu vahesi pule ni
si lopu boka paere pa Mua dinoṉo Goi.
7 Sipu koa varidikue nau ri na tinasuna,
ba va sare au Goi.
Raza la i Goi sari na qua kana pu bugoro nau,
meke va sare au Goi pa Mua ṉiniraṉira.
8 Kaqu taveti e Zihova sari doduru gua pu va tatara ni Sa,
kei Zihova, koa hola ninae rane sa Mua tataru.
Mu va gorevura ia sa tinavete pu ele podalae nia Goi.