145
Keke Kinera Vinahesi
(Keke kinera te Devita)
1 (Aleph)* Hopeke vesi koasa Sam 145 si podalae koa keke leta pa “A Ba Da” pa Vinekala Hiburu. Qua Baṉara meke qua Tamasa,
kaqu tozi helahelae nia rau koari doduru tie sa Mua Linavata.
Zihova kaqu vahesigo rau ninae rane ka rane.
2 (Bet) Koari hopeke rane si kaqu zama leana atu si rau koa Goi,
meke kaqu vahesigo rau si Goi ninae rane.
3 (Gimel) Nomana lavata se Zihova, meke garona tugo pude tava lavata va ululae,
meke sa Nana linavata si lopu boka ta gilana beto.
4 (Dalet) Madi tozi vari tetei nia rina sinage na sage sari na Mua tinavete,
meke kaqu tozi vura ni rini sari na Mua tinavete marilaedi.
5 (He) Kaqu tozi vura nia rini sa Mua tinolava variva magasana,
meke arau kaqu balabala va lohi sari na Mua tinavete marilaedi.
6 (Vav) Sari na tinoni si kaqu tozi vura ni sari na Mua tinavete ṉiṉiradi,
meke arau si kaqu tozi vura nia sa Mua linavata.
7 (Zain) Kaqu zama vura ni rini sari doduru Mua lineana,
meke kera vura nia sa Mua tataru vatukana.
8 (Het) Tataru na variva taleosae se Zihova,
lopu tuturei bugoro si Asa, meke nomana sa Nana tataru nabuna.
9 (Tet) Leana se Zihova koari doduru tie,
meke sa Nana tataru ṉoṉona si la koari doduru Nana vina podaka.
10 (Yod) Kei Zihova, sari doduru Mua vina podaka toadi si kaqu vahesigo si Agoi,
meke sari doduru mua tie toṉoto si zama leana koa Goi.
11 (Kaph) Kaqu tozi vura nia rini sa vina lavatana sa Mua Binaṉara,
meke kaqu tozi vura nia rini sa Mua ṉiniraṉira,
12 (Lamed) pude doduru tie si madi gilani sari na Mua tinavete ṉiṉiradi,
meke sari na rinavutuna gua sa Mua Binaṉara.
13 (Mem) Koa hola ninae rane sa Mua tinolitolie,
meke koa Baṉara si Goi ninae rane.
(Nun) Zihova si kopu ni sari doduru Nana zinama,
meke tataru koari doduru Nana tinavete.
14 (Samek) Toka ni Sa sarini pu koa pa tinasuna,
ovulu sage ni Sa saripu hoqa.
15 (Ain) Sari doduru tiṉitoṉa toadi si doṉo atu mo koa Goi,
pude poni ni Goi sari na gedi ginani pa dia totoso garodi.
16 (Pe) Pada saripu gua poni Goi koa rini,
meke va garogaroi Goi sari na dia inokoro ri doduru.
17 (Zade) Toṉoto se Zihova koari doduru Nana siraṉa,
meke tataru na vatukana koari doduru Nana tinavete.
18 (Qoph) Koa tata si Asa koarini pu tepa la koa Sa,
sarini pu tepa va hinokara la koa Sa.
19 (Resh) Poni Sa gua sapu ta hivae koarini pu va lavatia si Asa.
Avosi Sa sari na dia kinabo, meke harupi Sa sarini.
20 (Shin) Va aqori Sa sarini pu tataru nia si Asa,
ba kaqu va mate pani Sa sari na tie kaleadi.
21 (Tav) Kaqu zama vura nia rau pa ṉuzuqu sa vinahesina e Zihova.
Madi va lavatia ri doduru kurukuru sa Pozapoza Madina sapu e Zihova ninae rane ka rane.