147
Vinahesina sa Tamasa Ṉiṉira Hola
Mi vahesia se Zihova!
 
Ura leana si pude kera vahesia sa nada Tamasa,
ura na variva qetu meke toṉoto si pude vahesia si Asa.
Kuri pulea e Zihova sa popoa Zerusalema.
Turaṉa pule ni Sa saripu ta raovodi.
Salaṉi Sa saripu talotaṉa pa bulodia,
meke pusi i sa sari na bakoradi.
 
Padai Sa sinokudi sari na pinopino,
meke hopeke vala ni pozadi Sa si arini.
Ululuna lavata na ṉiṉira hola se Zihova,
meke loke tie boka pada ia sa Nana tinumatumae.
Ovulu sage ni Sa saripu koa va pepekae puleni,
ba va gore pani Sa sari na tie kaleadi.
 
Mada kera vahesia se Zihova,
vahesia sa nada Tamasa koari na kinera pa mike.
Va neve i Sa pa maṉauru sari na lei,
meke ponia ruku Sa sa pepeso,
meke va toqoli Sa sari na duduli koari na toqere.
Poni ni gedi ginani Sa sari na kurukuru ṉame,
meke sari na tuna kurukuru tapuru totoso kabo ovia si arini.
 
10 Sa Nana qinetuqetu si lopu koa koari na hose ṉiṉiradi,
meke lopu variva qetu koa Sa sari na tie varipera varanedi,
11 ba qetu ni e Zihova sarini pu pamaṉa nia si Asa,
meke sarini pu raṉea sa Nana tataru nabuna.
 
12 Mi vahesia se Zihova, ke gamu na tinoni pa Zerusalema,
mi vahesia sa mia Tamasa, ke gamu kasa pa Zaione.
13 Va ṉiṉira i Sa sari na rorotoana koari na mia sasada bara,
meke mana ni Sa sari na mia tinoni.
14 Kopu nia Sa sa volosona sa mia popoa,
meke poni va deṉa ni gamu huiti leadi hola Sa.
 
15 Zama si Asa koa sa popoa pepeso,
meke lopu sana ta evaṉa gua saripu zama ni Sa.
16 Taburu nia sinou Sa sa pepeso guana poko,
guana kavuru pu paleki na givusu.
17 Va gorea Sa sa ruku aesi, guana zalekoro,
meke lopu boka ta koa sa ibuna sa.
18 Sipu zama Sa si murimuri sa aesi,
va hirua Sa sa givusu, ke totolo sa kolo.
 
19 Tozia sa sa Nana inavoso koari Nana vina tumatumae
na tinarae koari na tie Izireli.
20 Lopu evaṉia Sa sapu gua asa koari na votiki butubutu,
sina lopu gilani rini sari Nana tinarae.
 
Mi vahesia se Zihova!