23
Pablo dbajo chke kwian israelita chugagwalla ulita ngwadi, Pablo gwagedu kwian israelita chugagwalla ulita kle mo litabadi, gire Pablo gerudu:
—Ba ulita cha bitalla, cha gerule ba ulita ole, cha Jesu uñuge gwaingnagu cha toidu ta trate ta ngwedi ole Chube gwa giti, kle kaire nege cha tale cha me suge jiske moge.
Pablo gerudu ene gire kwian gerunga Chube ole daba alin ma kweri kada Ananías skochiu tanre Pablodi. Kwian gweale kle kodi Pabloge Ananías kwian e gbu Pablo bate káge Pablo gerudu giti.
Pablo gerudu Ananías ole:
—Ba kle age me no me no cha ole, e gdale Chube be ji gbe tirare ba giti. Ba ta me no, ba me kle age ba kle gerule kare no Chube giti. Ba kle toiba dba eni gerule cha giti cha jiske, ba gerule ba kle age Moisés chadalla gerule kare, e ulia ¿mineade ba cha batangu? Ba agedu ene e age Moisés chadalla dollale.
Kwian ngle kledu eni ama geru kadu Pabloge:
—¿Ba me kwachie gerule mno me no kwian gerunga Chube ole chugagwalla ma kweri ole?
Pablo gerudu:
—Ba cha bitalla, chage me uñadu ama kle gerule cha ole ama kwian gerunga Chube ole chugagwalla ma kweri, me no gerule chugagwallage ene. Chube gerua degaba gerule:
“Kwian me ñage gerule me no chugagwalla dollale.”
Pabloge chku uñale kwian israelita chugagwalla ulita kle mo litaba me chugagwalla mne gdaitre alin kle. Chugagwalla mne gdaite kada kwian saduceo, chugagwalla mne gdaite kada kwian fariseo. Mne gdaboke e kledu mo litaba ule, kwian israelita chugagwalla mne boke ole Pablo gerudu kweri:
—Cha bitalla ulita, cha takalin chke uñale bage cha kwian fariseo cha enusulian ulita kare, malen bage uñale cha kle geru kwian jaba chkeni gwade giti gai ulia, e giti ba ulita kle cha gbe jiske.
Pablo gerudu ene kwian ole, gire kwian fariseo skochiu kwian saduceodi, kwian saduceo skochiu kwian fariseodi, gire kwian saduceo mo litu mne mo kaire kwian fariseo mo litu mne mo kaire. Kwian saduceo gerule kwian jogebada mi chkeni gwade chui bdaglige, kwian saduceo alin lle boanga Chube alin nga ngaña giti me, che dolla me. Agwa kwian fariseoge suge kwian jogebada be chkeni gwade chui bdaglige, lle boanga Chube alin nga ngaña giti kle, che dolla kle. Geru e ulita giti kwian saduceo kwian fariseo ulita kle skochie kira bate kle ngaute kweri, gire kwian ngleaske kwian gweale daba tkanga tangle Moisés chadalla giti ama kwian fariseo mnella, kwian e ulita chku gdate gerudu kwian na ulita gwa giti Pablo giti:
—Onbre ai me jiske me agedu me no ni sidri. Che ñage tañachuge ulia lle boanga Chube alin nga ngaña giti chku amadi jonke.
10 Kwian daba tkanga tangle Moisés chadalla giti e ulita gerudu ene Pablo giti, gire kwian kira batu ma kweri modi dare, guardia donga chugagwalla kweri gwagedu kwian ulita kira bate ene, gire guardia donga chugagwalla kwachiu tanre Pablo giti kwian ulita ñage Pablo gweda. Guardia donga chugagwalla donga gweale kadu Pablo jwen siere kwian ngleaske Pablo dbale naskuni gwa donga ulita kle toi ngwadi.
11 Chui amañage ngajrege Chugagwalla Jesu medu Pabloge, Jesu gerudu Pablo ole:
—Pablo, ba me ta dbadale kwachie. Cha medu bage jonke ba e tragu kwian aini una Jerusalénmu ole, ene kaire ba gerudale cha medu bage giti llani una Romage kwian una Romamu ole —Jesu gerudu ene Pablo ole.
Kwian mo ten Pablodi Pablo gweda
12-13 Nagbietege kwian israelita cuarenta mo litu ule mo ta gbu salengwli Pablo gweda, gerudu modi:
—Chube gwa giti che mo ta gbe ule Pablo gweda, chui aige gwangerugu che mi blire ni chi jai, che be Pablo gweda gire che be blireni che be chi jaini.
Kwian israelita ulita cuarenta mo litu gerudu modi ene ama kle mo ta gbe biale age Pablo ole. 14 Kwian e ulita jo kwian israelita chugagwalla ulita ngwadi gerule chugagwalla ole, gerudu:
—Cha ulita cuarenta mo ta gbu salengwli Pablo gweda. Ngeru cha Pablo gwedage cha mi blire sidri cha mi chi jai. Cha be ko toi Pabloge gwaleda, cha be Pablo gweda gire cha be blireni cha be chi jaini. 15 Nege cha takalin ba ulita kwian israelita chugagwalla Pablo kade guardia donga chugagwalla kwerige dbale chie aini suialin ba ulita gwa giti. Ba gerudale guardia donga chugagwalla kweri ole ba ulita be geru kade ma no trate ta gude Pabloge kle boi giti Pablo ole. Pablo dbabe chie gire cha ulita be kle biale Pablo jege ngwange jonke gwaleda ngeru ama chke aini ba ngwadige.
16 Kwian israelita cuarenta mo teun Pablodi gwaleda chku uñale Pablo teallage, Pablo tealla tañachugu gerule blike Pablo ole kwian kle mo ten Pablodi, Pablo tealla jo Pablo kle ngwadi donga ullage Pablo ta gbe. 17 Pablo tealla geru ketu trate Pabloge kwian kle mo ta gbe age Pablo dollale giti, gire Pablo guardia daba chugagwalla gdaite kadu mo gitigu, Pablo gerudu ama ole:
—Ba cha tealla ai dbe ba chugagwalla ngwadi, ama ta gerukalin lle gweale giti ba chugagwalla ole.
18 Guardia daba chugagwalla Pablo tealla du guardia donga chugagwalla kweri ngwadi, gerudu chugagwalla e ole:
—Pablo kle skage cha kadu mo gitigu geru kete chage, ama gerudu cha ole cha chiedale ama tealla ai dbe ba ngwadi, ama tealla gerukalin ba ole lle gweale giti.
19 Guardia donga chugagwalla kweri Pablo tealla gau koge du sugekare gire guardia donga chugagwalla kweri geru kadu Pablo teallage:
—¿Ba ta gerukalin mine cha ole?
20 Pablo tealla gerudu guardia donga chugagwalla kweri ole:
—Kwian israelita gweale mo teun modi ama be mo chugagwalla gbe cha jrulla Pablo kade bage, kwian israelita chugagwalla e ulita be kwian gweale kage aini geru jige bage kwian israelita chugagwalla takalin suialin ba Pablo kagadale ama ulita ngwadi, ba anblitagda kwian israelita chugagwalla gerua dbanga be gerule ba ole kwian israelita chugagwalla geru kadakalin ma no trate ta gude Pabloge kle boi giti Pablo ole. 21 Agwa ba me kwian israelita chugagwalla gerua dbanga kerua gai ulia, ama be gerule kare ba ole be geru kade ma no Pabloge, e me ulia, Pablo kadabe bage gwaleda, kwian cuarenta be kle Pablo jege ngwange jonke skwlenre. Kwian mo teun modi Pablo gweda ama ulita gerudu: “Chube gwa giti che mo ta gbe ule Pablo gweda, chui aige gwangerugu che mi blire ni chi jai, che be Pablo gweda gire che be blireni che be chi jaini.” Kwian ulita kle mo teanba biale ulita ama kle ba kerua manade ba be Pablo kage kwian israelita chugagwalla ngwadi o me.
22 Pablo tealla gerudu ene ulita guardia donga chugagwalla kweri ole kwian mo teun Pablodi be age Pablo ole giti, gire guardia donga chugagwalla kweri gerudu:
—Joga, ba me gerule ni sidri kwian gweale ole ba cha ta gbu kwian be age Pablo ole giti.
Guardia donga chugagwalla kweri Pablo kage
kwian chugagwalla Félix ngwadi una Cesareage
23 Guardia donga chugagwalla kweri guardia daba chugagwalla boke kadu gerudu ama ole:
—Ba donga ngle gbadale biale joge Pablo gatedi joge una Cesarea ngnagu nege nga jere bonga, ba donga doscientos gbadale biale joge seradi, ba donga setenta gbadale biale joge ja giti, ba donga doscientos gbadale biale joge lanza dbe dogda, 24 kaire ba ja gbe biale Pablo alin chagegda. Ba gerule donga e ulita be joge Pablo gatedi ole ama Pablo manadale no no jonkare, ama Pablo ketadale no chugagwalla gobernador kada Félige una Cesareage.
25 Guardia donga chugagwalla kweri gerudu ene guardia daba chugagwalla boke e ole gire guardia donga chugagwalla kweri chada degu kagadale ama chugagwalla kweri Félix alin, ama chada degu ai kare:
26 “Cha guardia donga chugagwalla kweri kada Claudio-Lisias cha chada ai dege ba alin Félix, ba kwian chugagwalla kweri. ¿Che kle mine Félix? 27 Cha kle onbre ai kage ba ngwadi, kwian israelita ama gau tku skage, kwian israelita biri onbre ai gweda, gire chage chku uñale onbre ai kwian una Romamu malen cha jo donga chanu ole onbre ai jwen siere kwian israelitage, cha ama du donga kle toi ngwadi manadale. 28 Cha tadukalin chke uñale chage mineade kwian israelita kle onbre ai gbe jiske, malen cha onbre ai du kwian israelita chugagwalla ulita ngwadi ene chke uñale chage kwian kle ama gbe jiske llema giti. 29 Chku uñale chage kwian israelita alin onbre ai kle age me no kwian israelita enusulian unsuialin gerua dollale, e giti kwian israelita kle onbre ai gbe jiske. Che kwian una Romamu alin kwian israelita kle kira bate lle ngwale giti onbre ai ole, onbre ai me agedu me no che kwian una Romamu gerua dollale, che alin me no onbre ai gweda onbre ai tke skage. 30 Agwa chku uñale chage kwian israelita ulita kle mo ta gbe onbre ai gweda, malen cha onbre ai kagu ba ngwadi blike, cha gerudu kwian ama dollale ole ma no joge gerule onbre ai dollale onbre ai gbe jiske ba gwa giti ama ulita takalin kare. Cha chada ai degu ulita ba alin. Che kle meni.”
31 Guardia donga chugagwalla kweri chada degu ene kagadale chugagwalla Félix alin. Guardia donga ulita agedu guardia donga chugagwalla kweri gerudu kare, donga ulita jo Pablo dbe ngajrege una Cesarea ngnagu, jo chke una Antípatrige gbedu una ege. 32 Gire nagbietege donga bai jo seradi una Antípatrige ama ulita chiuni naskuni donga kle toi ngwadi una Jerusalénge. Donga bai jo ja giti ama ulita jo gwangerugu Pablo ole una Cesarea ngnagu.
33 Donga ulita jo chke una Cesareage jo kwian nga Judeamu chugagwalla kweri kada Félix ngwadi, gire donga chada ketu kaire Pablo ketu chugagwalla Félige. 34 Chugagwalla Félix guardia donga chugagwalla kweri chadalla batunga ulita, gire Félix geru kadu Pabloge:
—¿Pablo, ba kwian nga bainimu?
Pablo jaindunga:
—Cha kwian nga Ciliciamu.
35 Félige chku uñale Pablo nga Ciliciamu, gire ama gerudu Pablo ole:
—Cha kwian nga Ciliciamu chugagwalla kaire agwe, cha ñage gerule ba giti ba jiske o ba me jiske. Kwian ulita ba gbanga jiske be chke aini, cha be ama keruchuge kaire cha be ba keruchuge gerule kle boi mine ulita giti.
Chugagwalla Félix gerudu ene Pablo ole gire ama Pablo ketangu kwian skage manangage manadale no chugagwalla oña Herodes toidu ngwadi ullage ene Pablo mi kige.