ଇବ୍ରିଣଃ ପତ୍ରଂ
Ⅰ
Ⅰ ପୁରା ଯ ଈଶ୍ୱରୋ ଭୱିଷ୍ୟଦ୍ୱାଦିଭିଃ ପିତୃଲୋକେଭ୍ୟୋ ନାନାସମଯେ ନାନାପ୍ରକାରଂ କଥିତୱାନ୍
Ⅱ ସ ଏତସ୍ମିନ୍ ଶେଷକାଲେ ନିଜପୁତ୍ରେଣାସ୍ମଭ୍ୟଂ କଥିତୱାନ୍| ସ ତଂ ପୁତ୍ରଂ ସର୍ୱ୍ୱାଧିକାରିଣଂ କୃତୱାନ୍ ତେନୈୱ ଚ ସର୍ୱ୍ୱଜଗନ୍ତି ସୃଷ୍ଟୱାନ୍|
Ⅲ ସ ପୁତ୍ରସ୍ତସ୍ୟ ପ୍ରଭାୱସ୍ୟ ପ୍ରତିବିମ୍ବସ୍ତସ୍ୟ ତତ୍ତ୍ୱସ୍ୟ ମୂର୍ତ୍ତିଶ୍ଚାସ୍ତି ସ୍ୱୀଯଶକ୍ତିୱାକ୍ୟେନ ସର୍ୱ୍ୱଂ ଧତ୍ତେ ଚ ସ୍ୱପ୍ରାଣୈରସ୍ମାକଂ ପାପମାର୍ଜ୍ଜନଂ କୃତ୍ୱା ଊର୍ଦ୍ଧ୍ୱସ୍ଥାନେ ମହାମହିମ୍ନୋ ଦକ୍ଷିଣପାର୍ଶ୍ୱେ ସମୁପୱିଷ୍ଟୱାନ୍|
Ⅳ ଦିୱ୍ୟଦୂତଗଣାଦ୍ ଯଥା ସ ୱିଶିଷ୍ଟନାମ୍ନୋ ଽଧିକାରୀ ଜାତସ୍ତଥା ତେଭ୍ୟୋଽପି ଶ୍ରେଷ୍ଠୋ ଜାତଃ|
Ⅴ ଯତୋ ଦୂତାନାଂ ମଧ୍ୟେ କଦାଚିଦୀଶ୍ୱରେଣେଦଂ କ ଉକ୍ତଃ? ଯଥା, "ମଦୀଯତନଯୋ ଽସି ତ୍ୱମ୍ ଅଦ୍ୟୈୱ ଜନିତୋ ମଯା| " ପୁନଶ୍ଚ "ଅହଂ ତସ୍ୟ ପିତା ଭୱିଷ୍ୟାମି ସ ଚ ମମ ପୁତ୍ରୋ ଭୱିଷ୍ୟତି| "
Ⅵ ଅପରଂ ଜଗତି ସ୍ୱକୀଯାଦ୍ୱିତୀଯପୁତ୍ରସ୍ୟ ପୁନରାନଯନକାଲେ ତେନୋକ୍ତଂ, ଯଥା, "ଈଶ୍ୱରସ୍ୟ ସକଲୈ ର୍ଦୂତୈରେଷ ଏୱ ପ୍ରଣମ୍ୟତାଂ| "
Ⅶ ଦୂତାନ୍ ଅଧି ତେନେଦମ୍ ଉକ୍ତଂ, ଯଥା, "ସ କରୋତି ନିଜାନ୍ ଦୂତାନ୍ ଗନ୍ଧୱାହସ୍ୱରୂପକାନ୍| ୱହ୍ନିଶିଖାସ୍ୱରୂପାଂଶ୍ଚ କରୋତି ନିଜସେୱକାନ୍|| "
Ⅷ କିନ୍ତୁ ପୁତ୍ରମୁଦ୍ଦିଶ୍ୟ ତେନୋକ୍ତଂ, ଯଥା, "ହେ ଈଶ୍ୱର ସଦା ସ୍ଥାଯି ତୱ ସିଂହାସନଂ ଭୱେତ୍| ଯାଥାର୍ଥ୍ୟସ୍ୟ ଭୱେଦ୍ଦଣ୍ଡୋ ରାଜଦଣ୍ଡସ୍ତ୍ୱଦୀଯକଃ|
Ⅸ ପୁଣ୍ୟେ ପ୍ରେମ କରୋଷି ତ୍ୱଂ କିଞ୍ଚାଧର୍ମ୍ମମ୍ ଋତୀଯସେ| ତସ୍ମାଦ୍ ଯ ଈଶ ଈଶସ୍ତେ ସ ତେ ମିତ୍ରଗଣାଦପି| ଅଧିକାହ୍ଲାଦତୈଲେନ ସେଚନଂ କୃତୱାନ୍ ତୱ|| "
Ⅹ ପୁନଶ୍ଚ, ଯଥା, "ହେ ପ୍ରଭୋ ପୃଥିୱୀମୂଲମ୍ ଆଦୌ ସଂସ୍ଥାପିତଂ ତ୍ୱଯା| ତଥା ତ୍ୱଦୀଯହସ୍ତେନ କୃତଂ ଗଗନମଣ୍ଡଲଂ|
Ⅺ ଇମେ ୱିନଂକ୍ଷ୍ୟତସ୍ତ୍ୱନ୍ତୁ ନିତ୍ୟମେୱାୱତିଷ୍ଠସେ| ଇଦନ୍ତୁ ସକଲଂ ୱିଶ୍ୱଂ ସଂଜରିଷ୍ୟତି ୱସ୍ତ୍ରୱତ୍|
Ⅻ ସଙ୍କୋଚିତଂ ତ୍ୱଯା ତତ୍ତୁ ୱସ୍ତ୍ରୱତ୍ ପରିୱର୍ତ୍ସ୍ୟତେ| ତ୍ୱନ୍ତୁ ନିତ୍ୟଂ ସ ଏୱାସୀ ର୍ନିରନ୍ତାସ୍ତୱ ୱତ୍ସରାଃ|| "
ⅩⅢ ଅପରଂ ଦୂତାନାଂ ମଧ୍ୟେ କଃ କଦାଚିଦୀଶ୍ୱରେଣେଦମୁକ୍ତଃ? ଯଥା, "ତୱାରୀନ୍ ପାଦପୀଠଂ ତେ ଯାୱନ୍ନହି କରୋମ୍ୟହଂ| ମମ ଦକ୍ଷିଣଦିଗ୍ଭାଗେ ତାୱତ୍ ତ୍ୱଂ ସମୁପାୱିଶ|| "
ⅩⅣ ଯେ ପରିତ୍ରାଣସ୍ୟାଧିକାରିଣୋ ଭୱିଷ୍ୟନ୍ତି ତେଷାଂ ପରିଚର୍ୟ୍ୟାର୍ଥଂ ପ୍ରେଷ୍ୟମାଣାଃ ସେୱନକାରିଣ ଆତ୍ମାନଃ କିଂ ତେ ସର୍ୱ୍ୱେ ଦୂତା ନହି?