1 Mbaa ini uup raak njiriñ, weɗ mi na hee woye paaɗ : Mi na ñaahohe ne ɓi Janguuni nik ŋ kiim Kooh, ɓa kiimee keeh-keeh wuu ɓooɓi jen, wa hun na corkiɗ Kooh. 2 Ɓa kiimɗee buur ci na kilifaaciŋ kur ci jen ne ɓoo min raak kipes yeeɓkiɗ huniɗ na jam, ɓoo haɓɗee in yurhiɗ ŋ fiki Kooh, na mandohaaɗ baahiɗ keeh-keeh. 3 Ineem weɗ moɗ te weɗ neɓ Kooh Mucɗohiŋ ɓoo, 4 Kooh yi waaɗ ne ɓo' ci jen muc te ɓa kaɗ po ɓa min inah keeh ki. 5 Laam :

Ineem weɗ Kooh teeɓoh wi jamanooni a gapohee wa ree. 7 Ŋ pangkiŋ Kooh weem, a tummba so yegɗohoh na Apootar ne ŋ jangɗee ɓi nikɗi Yawuut kosi na keeh ki. Mi na woye keeh, ŋ leyɗi.

8 Mbaa ŋ waaɗ ne, ŋ ɗisik nu ɗu coh ɗah, ƴaar ci kiimee Kooh, ɓa raɗsee Kooh yaah hooliɗ, wa hunuu na ayruk na taastiɗoh.

9 Ŋ namiɗ waaɗ ne ɓitiɓ ci liiɓ baahiɗ ŋ kulɓaaci ɓa na ɓekke, ɓa haɓɗukee na kulɓa yiwiɗ, eɗuuɗ cir. Ɓa haɓɗukuu haɓɗuk uupiɗ ŋ haf ciŋ ɓa, na urus ci wala per ci ɓa na tokke, na kulɓaaci na care kopor laayiɗ. 10 Waaye haɓɗukiŋ ɓa nikaat tum in baahiɗ findi ɓitɓi woo ne a nikiɗ Kooh.

11 Ɓitiɓ joy joy kerhiɗ jangɗohoh ci, a jangee na yeeɓuk. 12 Ŋ teyɗohɗi ɓitiɓ ne a jangɗohee wala a adgiɗ ƴaar ; a joy joy ɗek. 13 Laam, a Aadama ɗeɓ mahu, Aawa taammba nga. 14 Te a Aadama ñaañohu haa, a ɓitɓa a yi ñaañohu, a kerhiɗeeɗi Kooh, a keennda ŋ bakaaɗ. 15 Waaye raakiŋ ɓitiɓ ci kuɓu hondohɗi ɓa mucɗu*2:15 Ŋ jamanoonaam, wa raakeen ɓi ɓitiɓ nga, ɓa nikee heɗ raak-raak, ɓa raakee hot-hot wiiriis ŋ waas-Kooh, an ɓo' joyee nik liiɓ dong, faan baahɗi. Wa kaɗta po ɓa sannga sah raak kuɓu. Raakiɗ liiɓoh ci amb ne ɓitiɓ ceem jeemeen ɓek liiɓohaaɗeem ŋ Janguuni. Wa miniɗ nik ne weɗ tah po Pool woosa ini a woo ŋ ndii.✡2:15 Camba 3:15-16 ne ɓa ris kosiɗ Kooh, ɓa waaɗ ɗe, ɓa pesee pes hooliɗ wuu ce te peseem hun na amb haf ɓa ɗah.