1 Ɓaah ciŋ ngo, ini tas weɗ ne ɗu kiimiɗ ɓoo Kooh ne woo kiŋ Heɗi min pasarkoh baahiɗ te wa yakɗu ŋ ɗisik laayiɗ findi wa yakɗohu ŋ ɗiskiŋ ɗu. 2 Kiimaat Kooh ne ɓoo muc ŋ yaah ciŋ ɓo' ci añaandiɗ ci, baahaaɗiici ; e ɓooɓi jen raak kos haa. 3 Waaye Heɗi cariɗ oolku : A hey ɗu ndengɗe, a niiɗ ɗu ŋ baahaaɗiini. 4 Wa hooliɗ ɓoo ŋ niki ɓoo nik nga ɗe ne ɗu na tume ini ɓoo nak ɗu te ɗu heya gene tum.

5 Heɗi yurhiɗaat keeñ ciŋ ɗu ŋ waaɗi Kooh waaɗ ɗu na muñi nik ŋ Kiristaani.

6 Ɓaah ci, ɓoo na nakee ɗu ŋ tiikiŋ Heɗi Yeesu Kiristaa, ne ɗu us ɓaah nu na pese pes palañsukohiɗ ɗah. Laam, ɓaah mand ɗaa pesohɗi jangɗohi a rahsoh nga ɓoo. 7 Ɗu inhiɗ ŋ haf ɗu findi ɗu joy ɓoo altiɗkohoh, laam wi ɓoo nik na ɗu ɓoo peseeɗi pes palañsukohiɗ. 8 Ɓoo ñamɗi ali kañam ɓo' wi ɓoo wirindɗi. Ɓoo pangkee panguk, ɓoo raakeeɗa miskiɗ wek na noh ne ɓoo gaƴkuu ŋ ali ɓo' nga ɗu. 9 Wa nikɗi haa ne waas oneeɗi ɓoo ne ɓoo meeksoh in, waaye e ɓoo waaɗee ɗu teeɓ findi ɗu altiɗkohan ɓoo. 10 Wa ɓoo nik na ɗu, ɓoo eɗee ɗu nakohii : Ɓo' sang panguk ɗah, a kinaat ñam !

11 Ɓoo kerhiɗ ne raakiɗ ɓi ɓo' nga ɗu ɓi na pese pes palañsukohiɗ, ɓa na pangkeeɗi, ɓa na gene aas ŋ in ci ɓa rahsohɗi. 12 Ɓoo ɓii woo ɓooɓeem te ɓoo ɓii ñaah ɓa ŋ tiikiŋ Heɗi Yeesu Kiristaa ne ɓa pangkaat moɗoɗ, ɓa ñam kañam ki ɓa raakoot.

13 Ɓaah ciŋ ɓoo, ini kaɗ nga ɗu nak, kinaat moos yaaɓoh ŋ tum baahiɗ. 14 Ɓo' sang taambiɗ ini ɓoo woo ŋ fiisi ɓoo na kaɓɗohee ɗu wii ɗah, inhisaat ɗe baahiɗ te kinaat ɗe ɓaahndohis ŋ ali in, ne a kaci. 15 Kinaat ɗe amb findi sangiɗiŋ ɗu, waaye woytohaat ɗe findi ɓaah ɗu.

16 Heɗi ŋ haf ce, yi Heɗ jam, onaat ɗu jam ŋ in nu nik, na findi wa min mand ɗah. A nikaat na ɗu jen !

17 Mi Pool, ñam fiisoot kañɗohii na yaahiŋ ngo. Weɗ mandargaaniŋ ngo ŋ fiis ci mi na kaɓɗohe jen ; fiisohaaɗiŋ ngo weɗi weem. 18 Heɗ ɓoo Yeesu Kiristaa baahohaat ɗu jen !