7
Woo kiŋ Ecen
1 Weɗ seeƴkiɗoha yakka meeksoh Ecen ne : « In ci fu na yambse ca keeh e ? » 2 Ecen loffa ne : « Ɓaah ciŋ ngo na baab ciŋ ngo, sikɗukaat to. Kooh yi Heɗ ndam, teeɓkiɗ caac ɓoo Ibrahiima, waam raak ɗe ŋ Mesopotami bala a hayan gene ŋ Haaraan ɗah.✡7:2 Camba 15:7; Nehemi 9:7 3 Kooh woosa ɗe ne : “ Faɗa kur ki fu genoh, fu faɗ ɓaah ciŋ ɗa ; fu kaɗ ŋ kur ki maa hee ɗa teeɓe.✡7:3 Camba 12:1 ” 4 Ŋ ineem, Ibrahiima pulohha kur kaŋ Kaldeeca, a kaɗta, a gennda ŋ Haaraan.
Ŋ finho kakaan kaŋ baab ɓa, Kooh haytohha ɗe ŋ kur ki ɗu genoh wii woti-woti. 5 Kooh onɗi ɗe ali keheƴ, a onɗi ɗe sah in hend na ɗiski a min deg kot. Waaye a gappa ɗe ne a hey ɗe one kur ki, a yi na ɓi na hee rimkohe nga ɗe ŋ finhooce, te moona waam raak ɗe raakɗi kuɓu ndoom.
6 Inii weɗ Kooh woo ɗe :
“ Set ciŋ ɗa
hey nike jaambur
ŋ kur ka ɓa raakɗi,
ɓa tumu ñaam nga,
ɓa torhiɗu kiis teemet-nikiis (400). ”
7 Waaye Kooh degga nga ne :
“ Ŋ hey atte'e
ɓi kur ka ɓa tumohu ñaam
ŋ finho ineem,
ɓa hey pulohe nga,✡7:7 Camba 15:13-14
ɓa hay yo ñaamke ŋ ndii. ”
8 Ƴutta Kooh ambtiɗohha na Ibrahiima, a eɗta ɗe nguɗuk ne wa teeɓohee ambtiɗoheem.✡7:8 Camba 17:10-14
Ibrahiima raakka kuɓu ƴaar Isaahha, a nguɗta ɗe ŋ mbeha yasna-kaahayɗoh.✡7:8 Camba 21:4 Isaahha nammba tum kuɓkiŋ ɗe Yaŋhooɓa ɗaa, yeem nammba tum kuɓuuciŋ ɗe ndaŋkiyaah na kanak ci (12) ɗaa, ɓeɗ ɓi caac ciŋ cuuɓ ciŋ ɓoo.
9 Siisa ɓeem siisee taambɗoh ɓa Yuusufa✡7:9 Camba 37:11 tahha po ɓa toonnda ɗe ne a tumsa ñaam ŋ Misra.✡7:9 Camba 37:28 Waaye Kooh nikee na ɗe, 10 a pulɗohha ɗe ŋ miskiɗ ciŋ ɗe jen. Kooh tummba po a neɓpa Firawnaana, buuraŋ Misra, a nammba ɗe on liiɓohaaɗ moɗiɗ ŋ fiki buura po yeem tummba ɗe goornooraŋ Misra na kilifaanaŋ kahan ce jen.✡7:10 Camba 41:39-41
11 Weɗ aɗ raakoh ŋ kur kaŋ Misra jen na Kanaan. Wa misikka nga ɓa lool, po caac ciŋ ɓoo raakisɗi ñamaah. 12 Wa Yaŋhooɓa kerah ne bele raakiɗ ŋ Misra, a woossa caac ciŋ ɓoo nga, wa nikka kaɗaŋ ɓa koc. 13 Wi ɓa kaɗ kotaŋ ɓa kanakɗoh, Yuusufa tummba po taambɗoh ciŋ ɗe inhissa ɗe, ŋ ndeem Firawnaana inahha ɓi kahan Yuusufa. ✡7:13 Camba 41:54–45:16
14 Yuusufa woosohha ne baab ɓa Yaŋhooɓa kaɗaat ɓaysa, a yi na ɓi kahan ɓa jen : ɓa nikeen ɓo' ndaŋkiyaah-yasna-kanak na ɓo' yatuus (75). 15 Yaŋhooɓa kaɗoh Misra ɗaa✡7:15 Camba 45:9–46:30 ; a kaanoh nga,✡7:15 Camba 49:33 a yi na caac ciŋ ɓoo. 16 Fiɗaaf caŋ ɓa ɓayuusa Sisem, ɓa ɗasɗuusa ŋ ruy-ruya Ibrahiima romee na koporiŋ ɗe ŋ ɓi rimkoh Hamor ngaŋ Sisem.✡7:16 Camba 23:3-20; 33:19; 50:7-13; Yosuwe 24:32
17 Jamanoona Kooh hee mitɗohe ina a gapee Ibrahiima nikee reɓeeɗa ; raak cuuɓiŋ ɓoo ɓaatkiɗ, wa uupeeɗa uup laay ŋ Misra, 18 po findi buur wiiriis adgohoh kur ka, buureem inheeɗi Yuusufa. 19 A ñaañohha cuuɓiŋ ɓoo, a tummba caac ciŋ ɓoo miskiɗ po a mbetɗukoheeɗa ɓa gooy caŋ ɓa ne ɓeem kaan.
20 Jamanooneem weɗ Musaa raakohu, a nikka komaaki moɗiɗ ŋ Kooh ; a taambkohseeɗa ŋ kahan baab ɓa po a raakka caɓin kaahay ; 21 wi a mbetu, kuɓki ɓitɓiŋ Firawnaana parahha ɗe, a koɗta ɗe findi kuɓuuce. 22 Wa kaɗoh ɗaa, Musaa jangɗuusa ki'inhiŋ ɓi Misra jen, a nikka ɓo' raakiɗ hatil ŋ woo na tum.✡7:22 Pula 1:1–2:10
23 Wi a raak kiis ndaŋkiyaah-nikiis (40) weɗ a liiɓoh kaɗ marka ɓaah ciŋ ɗe, Israayel ci. 24 A hotta ƴaar gen Misra torhiɗeeɗa yino nga ɓa, a langɗoheeɗa ƴaara torhiɗasse, a wirndukɗeeɗa ɗe, a appa ƴaaraŋ Misraaca. 25 A liiɓee ne ɓaah ciŋ ɗe hey inhe ne Kooh waaɗ taamboh nga ɗe ne a muciɗ ɓa, waaye ɓa inheeɗaa.
26 Wa Kooh wiis, a hotta kanak ŋ ɓaah ciŋ ɗe hiñoheeɗa. A waaɗta ɓa kerhiɗohiɗ, a woosa ɓa ne : “ Ƴaaɓi, e ɗu ɓaah, wa ye tah ɗu hiñohe ? ” 27 Waaye ƴaara torhiɗohee teyɗukɗi Musaa, a yennja ɗe, a woosa ɗe ne : “ Ya ɓa tum ɗa kilifaaniŋ ɓoo na atte'ohiŋ ɓoo ? 28 Fu waaɗ to nam ap findi fu apoh ƴaariŋ Misraaci wotɓa e ? ” 29 Wa Musaa kerah woo keem, a saandohha, a raayya ŋ kur kaŋ Majaan.✡7:29 Pula 2:11-15 A nikka ŋ ndaam, po a raakka kuɓu ƴaar kanak nga.✡7:29 Pula 18:3,4
30 Wa degga kiis ndaŋkiyaah-nikiis (40), malaaka teeɓukka Musaa ŋ kehƴa hulangaŋ tangooraŋ Sinaay, ŋ jaalaŋ yongkaahaŋ kidga ƴina gile. 31 Wa Musaa hot ineem, a feyuusa. A reɓpa ne a maraka baahiɗ, weɗ a kerhoh hoosooriŋ Heɗ ɓoo an : 32 “ A ñam Koohiŋ caac ciŋ ɗa, Koohiŋ Ibrahiima na Isaahha na Yaŋhooɓa ! ” Musaa tiitta po saakɗoheeɗa, a kaañisɗi marak. 33 Heɗ ɓoo woosa ɗe ne : “ Wolsa ñafaɗ ciŋ ɗa ; ɗiski fu tufuk wa keheƴ hooliɗ. 34 Ŋ hotiɗ torhiɗi cuuɓiŋ ngo na torhiɗasse ŋ Misra. Ŋ kerhiɗ iin ciŋ ɓa te ŋ ruhsiɗ ne ŋ naaf ɓa. Ɗiski wa nik, haya ŋ woos ɗa Misra.✡7:34 Pula 3:1-10 ”
35 Musaa yeem, a yi ɓaah ciŋ ɗe taaske, ɓa woyeeɗa ɗe ne : “ Ya ɓa tum ɗa kilifa na atte'oh ? ” Musaa a yi Kooh woos ne a nik kilifaani na yi na hee naafe cuuɓiŋ ɗe, taamboh ŋ ɓaatɗohiŋ malaakaani teeɓkee ɗe ŋ kidga ƴina. 36 A Musaa puliɗ Israayel ci Misra. A tumiɗ in feyohiɗ na keemaan laayiɗ ŋ kur keem,✡7:36 Pula 7–12 na wa ɓa huusee Cookma-Ruumnda✡7:36 Pula 14:21–15:20 na wa ɓa nik ŋ kehƴa hulanga kiis ndaŋkiyaah-nikiis (40).✡7:36 Pula 15:22–Rohƴiɗi 34:12
37 A Musaa namee woo Israayel ci ne : “ Kooh hey ɗu woosohe Woosuuɗ findiiso, a pulohan ŋ cuuɓiŋ ɗu.✡7:37 Rohƴiɗi 18:15 ” 38 Wa ɓooɓa coh ŋ kehƴa hulanga, a Musaa namee nik ŋ harmban caac ciŋ ɓoo na malaakaana woyee na ɗe ŋ tangooraŋ Sinaay. A rahassa woo ciŋ kipes ki, ne a eɗ ɓoo ca.✡7:38 Pula 19:1–20:21; Rohƴiɗi 5
39 Waaye caac ciŋ ɓoo waaɗeeɗi kerhiɗ Musaa, ɓa sannga ɗe teyɗuk, keeñ ciŋ ɓa jen nikee ŋ dokuk Misra. 40 Ɓa kaɗta ŋ Aaruna, ɓa woosa ɗe ne : “ Musaa ƴaari pulɗoh ɓoo Misra yii, ɓoo inahɗi ini rahas ɗe. Mbaa, haɓɗiɗa ɓoo kooh ci adgohan ɓoo. ” 41 Ɓa tiɓɗukka ɗoon, ɓa tummbaa koohiŋ ɓa, ɓa seeƴkeeɗa nataaleem. Ɓa neɓuusa ŋ ina ɓa tiɓoot na yaah ciŋ ɓa.✡7:41 Pula 32:1-6
42 Ŋ ndeem, Kooh suungɗukka ɓa, a faɗta ɓa ɓa ñaamkeeɗa caɓni na nohi na hor ciŋ eel ci findi wa fiisohu ŋ Fiis ciŋ woosuuɗ ci an : “ Cey cuuɓiŋ Israayel ci, ɗoopaat ca ɗu seeƴkee na sarah ca cinooca ɗu haɓɗee ini ree kiis ndaŋkiyaah-nikiis (40) ŋ kehƴa hulanga, ɗu haɓɗee ca wuu so e ? 43 Muk ! Ɗu haɓɗee ca wuu so haa ! Ɗu ɓayndohee ɗiipaŋ*7:43 ɗiipaŋ Molok : ɗiipii, wa nikee ndut haɓɗohu piis wala und. Ɓooɓa ñaamkohee koohi nikaaɗiini na woyse Molok nga. Molok na horaŋ Romfa yi ɗu tum koohiŋ ɗu, ceɗ nataal ci ɗu haɓiɗ ne ɗu ñaamuk ca. Ineem weɗ tah po ŋ hey ɗu toore ŋ ɗiska uup us✡7:43 Amos 5:25-27 Babilon. ” »
44 Ecen taalndiɗta an : « Ŋ kehƴa hulanga, caac ciŋ ɓoo nikee na Ɗiipa ɗaakohsee in ca teeɓohee Ambtiɗohi. Ɗiipaam haɓɗohsee findi Kooh nakohee Musaa, laam a woyee Musaa ne a haɓɗaata jok findi a teeɓohee ɗe wa ŋ nataal.✡7:44 Pula 25–31; 35–40 45 Ɗiipeem caac ciŋ ɓoo taamb nga nameena lam. Ɓa ɓayndoheena, wa Yosuwe adgoh ɓa, ŋ jamanoona ɓa degoh kur ka yaah ; kur kaŋ cuuɓ ca Kooh aañee ŋ fikiiɓa.✡7:45 Yosuwe 18:1 Wa rissa nga po ŋ jamanoonaŋ Dawuuda. 46 Kooh baahoheen Dawuuda, Dawuuda kiimmba ɗe ne a min taɓah genoha ne ɓi kahan Yaŋhooɓa ñaamkee ɗe nga.✡7:46 2 Samuwel 7:1-17 47 Waaye a kuɓkiŋ ɗe Suleymaan mirndoha taɓah.✡7:47 1 Buur ci 6
48 Waaye kinaat liiɓ keeh-keeh ne Kooh yi ŋ ɗafka ɗafka gen ŋ in ci yaah ɓo' haɓiɗ. Kerhaat ini woosuuɗi woo, an : 49 “ Heɗ ɓoo woo ne : ‘Asamaan weɗ ɓoofohaaniŋ ngo, kehƴi nikka degoha kot ciŋ ngo. Kon ɗu taɓahɗan ndo kahan mand na ? Wala winde ɗisik weɗ ŋ iɗsiɗkohan ? 50 A ñam fer in cii jen haa e✡7:50 Esayi 66:1-2 ?’ ” »
51 Ecen marakka ɓa woosa ɓa ne : « Ɗu ndeng ndeng haf ! Ɗu rannga keeñ ciŋ ɗu na nof ciŋ ɗu ŋ ɓeeɗkohiŋ Kooh findi ɓi ɓaahɗi ŋ Ambtiɗohiŋ ɗe. Ɗu ris hiñoh na Fuuɗsi Hoolohngaani, ɗu mand na caac ciŋ ɗu ! 52 A yinde woosuuɗ a yi caac ciŋ ɗu tolfiɗɗi ? Caac ciŋ ɗu apiɗ ɓi yegɗohee ne Yurhiɗi hey haye. Te ɗu ɓi woti-woti, ɗu woriɗ ɗe, ɗu boommba ɗe. 53 Ɗu rahsiɗ waasiŋ Kooh taamboh ŋ malaakaaci, waaye ɗu taambiɗɗaa. »
Kakaan kaŋ Ecen
54 Wa atte'oh ca kerah woo ciŋ Ecen ceem, ɓa ayrukka ɗe po ɓa heeɗa pooke. 55 Waaye Ecen riiffa na Fuuɗsi Hoolohngaani, a marakka ŋ Eel ci, a hotta siñaariŋ Kooh, a hotta Yeesu tufkiɗ ŋ ñaahmiŋ ɗe. 56 A woosa ne : « Ŋ hotiɗ Eel ci rangsukiɗ, Kuɓkiŋ ɓoyi tufukka ŋ ñaahmiŋ Kooh. »
57 Wa ɓa kerah woo keem, ɓa leehukka ŋ ɗafka, ɓa rannga nof ciŋ ɓa. Ɓa jen ɓa faɗsukka Ecen. 58 Ɓa faseeɗa ɗe po ɓa puliɗta ɗe kur-taaha, ɓa tapeeɗa ɗe atoh ne ɓa ap ɗe. Seede'oh ca faɗee kulɓaacaŋ ɓa ŋ kot ciŋ komaaki mitiɗ fiir na woyse Sool.
59 Wa ɓa tapee Ecen atoh, a kiimeeɗa Kooh an : « Heɗ ɓoo Yeesu, teya ruuhiŋ ngo. » 60 Weɗ a ƴekoh gik, a leehukka ŋ ɗafka an : « Heɗi, kina ɓa amboh bakaaɗii ! » Wi a woo ineem, a nguɗta.
✡7:2 7:2 Camba 15:7; Nehemi 9:7
✡7:3 7:3 Camba 12:1
✡7:7 7:7 Camba 15:13-14
✡7:8 7:8 Camba 17:10-14
✡7:8 7:8 Camba 21:4
✡7:9 7:9 Camba 37:11
✡7:9 7:9 Camba 37:28
✡7:10 7:10 Camba 41:39-41
✡7:13 7:13 Camba 41:54–45:16
✡7:15 7:15 Camba 45:9–46:30
✡7:15 7:15 Camba 49:33
✡7:16 7:16 Camba 23:3-20; 33:19; 50:7-13; Yosuwe 24:32
✡7:22 7:22 Pula 1:1–2:10
✡7:29 7:29 Pula 2:11-15
✡7:29 7:29 Pula 18:3,4
✡7:34 7:34 Pula 3:1-10
✡7:36 7:36 Pula 7–12
✡7:36 7:36 Pula 14:21–15:20
✡7:36 7:36 Pula 15:22–Rohƴiɗi 34:12
✡7:37 7:37 Rohƴiɗi 18:15
✡7:38 7:38 Pula 19:1–20:21; Rohƴiɗi 5
✡7:41 7:41 Pula 32:1-6
*7:43 7:43 ɗiipaŋ Molok : ɗiipii, wa nikee ndut haɓɗohu piis wala und. Ɓooɓa ñaamkohee koohi nikaaɗiini na woyse Molok nga.
✡7:43 7:43 Amos 5:25-27
✡7:44 7:44 Pula 25–31; 35–40
✡7:45 7:45 Yosuwe 18:1
✡7:46 7:46 2 Samuwel 7:1-17
✡7:47 7:47 1 Buur ci 6
✡7:50 7:50 Esayi 66:1-2