1 « Taambɗoh ciŋ ngo na baab ciŋ ngo, sikɗukaat kotii ini maa hee ɗu woye ŋ yambi ɗu na yambee so. » 2 Wa ɓa kerah ɗe woyeeɗa ŋ peɗmiŋ ɓa, ɓa ɓaatta ɗek. Pool taalndiɗta an : 3 « Mi, ŋ Yawuut, ŋ raakohu Tarsa ŋ Silisi, waaye ŋ koɗohu ndii, ŋ Yerusalem, te Gamaliyel a yi jangiɗ to waasiŋ caac ciŋ ɓoo, jangiɗ yurhiɗ.

Ŋ sawarra lool ŋ ini kaɗ ŋ Kooh findi ɗu mand nga woti-woti, ɗu jen. 4 Ŋ meeɗta tolfiɗ ɓooɓiŋ waasiŋ Yeesu, po raakiɗ ɓi apu nga sah. Ŋ ambeeɗa ƴaar na ɓitiɓ, ŋ taƴeeɗa ŋ kaso. 5 Seeƴkiɗohi yakki na saangniŋ atte'oh ci jen miniɗ to seede ngaŋ ineem. Ɓa fiisɗeen ɓaah ciŋ ɓoo Yawuut ci nikee ŋ Damas kayit sah, ɓa teyɗukiɗta so ne ŋ kaɗ nga, ŋ amba ɓi aas ŋ waasiŋ Yeesu nga, ŋ ɓay ɓa Yerusalem, ɓa mbugalu.

6 Wi ŋ kooɗ waasi po ŋ heeɗa ree Damas, ŋ leero noh cong, ɗekka po ñiin pulohha Eel ci, wa willa so, wa siñaarɗeeɗa. 7 Ŋ keennda ŋ kehƴi, ŋ kerahha hooso woyeeɗa so ne : “ Sool, Sool, wa ye tah fu tolfiɗee so ? ” 8 Ŋ woosa ne : “ A fu ɓa Heɗi ? ” Hoosoori loffa so ne : “ E ñam Yeesu yiŋ Nasareet, yi fu na tolfiɗe. ” 9 Ɓooɓi hunee na so hoteen siñaari waaye ɓa kerheeɗi hoosoori woyee na so.

10 Ŋ meeksohha an : “ Heɗi, kon ŋ joy ye tum kotii ? ” Heɗi loffa so ne : “ Kurka fu kaɗ Damas, ndaam, fu hey woyse ini fu joy haɓiɗ jen. ” 11 Ŋ fuulee fuul sagu siñaara, ɓooɓa hunee na so ammba so ŋ yaah, ɓa nookeeɗa so po ŋ reesa Damas.

12 Raakeen ƴaar nga teeku Anañaas, a nikee ɓo' kosiɗ Kooh, yi meeɗ taambiɗ waasiŋMusaa te Yawuut caŋ Damas jen seede'een ɗe seede moɗiɗ. 13 A hayya so raake, a reɓpa nga so, a woosa so ne : “ Sool, ɓaahiŋ ngo, hotissa ! ” Ŋ ɗiska ɗiska ŋ hotisseeɗa, ŋ hotta ɗe.

14 Ŋ ineem, a woosa so ne : “ Koohiŋ caaciŋ ɓoo kooɗiɗ ɗa maañ ne fu inah ini a waaɗ, ne fu hot yi Yurhiɗi te fu kerah hoosooriŋ ɗe. 15 Laam fu nikan seedeeniŋ ɗe ŋ fiki ɓooɓi jen, ŋ ini fu hot, fu kerahhaa. 16 Ɗiski wa nik ndii, fu na seke ye ? Kurka, fu ɓoktu te fu kiim ŋ tiikiŋ ɗe ne fu hool ŋ bakaaɗ ciŋ ɗa. ”

17 Wa ŋ dokuk Yerusalem, wa raakka mbeh, ŋ kiimeeɗa Kooh ŋ Kahan Kooh, in hayɗohha so haa heeƴ. 18 Ŋ hotta Heɗi, a woosa ne : “ Arra pul Yerusalem ! Laam ɓooɓi gen nga teyɗukanɗi seedeeniŋ ɗa ŋ ini kaɗ nga so. ”

19 Ŋ woosa ne : “ Heɗi, ɓa inhiɗ baahiɗ ne ŋ meeɗ meeɗ taambiɗ sinaagog ci, ŋ taƴɗukee ɓi kos ɗa, ŋ laɓɗukee ɓa. 20 Te wi seedeeniŋ ɗa Ecen na apse, ŋ nikee nga, mi ŋ haf fo. Ŋ huneen na ɓa ngaŋ apa ɓa apee ɗe te ñam ambɗee ɓa sah kulɓaacaŋ ɓa. ” 21 Ŋ ineem Heɗi woosa so ne : “ Kaɗa, mi, ŋ hey ɗa tuuƴe usiɗ, ŋ ɓooɓi nikɗi Yawuut ! ” »

22 Mboolnda nikee sikɗukeeɗa Pool po ŋ woo ciŋ ɗe mirndoh ceem, jaarra ɓa jen, ɓa leehkeeɗa an : « Apa ƴaarii ! Ɓo' mand an yeyyooɗi pes ! » 23 Ɓa looƴkeeɗa, ɓa wolla kulɓaacaŋ ɓa, ɓa gusñeeɗa merhey mi ŋ ɗafka.

24 Ŋ ndeem, kilifaanaŋ soldaar ca nakohha ne Pool ɓeku ŋ kahnaŋ soldaar ca, a laɓu leraw po a woo, ŋ ineem ɓo' inah ini tah Yawuut ci leehkee ɗe mand an. 25 Wa ɓa tok ɗe ne ɓa laɓ ɗe, a woosa ƴaara adgohee ɓa ne : « Andi waas oniɗ ɗu ne ɗu laɓ ɓoyi ɓaah ŋ Rom te raak ɗe atte'uuɗi paaɗ ? » 26 Wa soldaara kerah ineem a kaɗtaa woya kilifaana an : « Fu na hee haɓɗe ye an ? Ƴaarii ɓo' Rom ! »

27 Kilifaanaŋ soldaar ca hayya ŋ Pool, a meekissa ɗe ne : « Woyaa so, wa keeh ne fu ɓo' Rom e ? » Pool loffa ɗe ne : « Ee. » 28 Ŋ ndeem, kilifaanaŋ soldaar ca woosa ɗe ne : « Ŋ wirind kopor keeh-keeh ne nik ɓo' Rom. » Pool loffa ɗe : « Mi nak, ŋ rimu naa. »

29 Jaarra, soldaar ca hee ɗe laɓe ne a woo, faɗta ɗe ndeem cootta. Kilifaanaŋ soldaar ca nammba tiit, wa a inah ne a tokɗuk ɓo' Rom.

30 Kilifaanaŋ soldaar ca waaɗta inah wooriɗ ina Yawuut ca yambee Pool. Weɗ tah wa Kooh wiis, a nakohha ne Pool pulɗu ɗiski a nik, a cohɗohha kilifaacaŋ seeƴkiɗoh caŋ waasiŋ Musaa na ɓooɓa ɓaah ŋ saangnaŋ yakak caŋ Israayel jen. A ɓayya Pool, a tufkiɗta ɗe ŋ fikiiɓa.