1 Nikiɗi woosa Musaa ne : « Marka ! Ŋ tumiɗ ɗa fu mand findi Kooh ŋ fiki Firawna, yakak fu Aaruna a yi na hee nike findi woosuuɗiŋ ɗa. 2 Fu na hee ɗe woye in ci ŋ nakan ɗa jen, a yi na hee woye na Firawna, ne a faɗ Israayel ci ɓa pul kur kiŋ ɗe. 3 Ŋ hey ndengɗe keeñiŋ ɗe, te ŋ ruhsiɗ firnde na keemaan laayiɗ ŋ Misra ; 4 waaye a sikɗukanɗi ɗu. Ŋ hey teeɓohe hatiliŋ yaahiŋ ngo ŋ Misra, ŋ deg ɓa miskiɗ laayiɗ te ŋ puliɗ cuuɓiŋ ngo, Israayel ci, ŋ kur kiŋ ɗe, wa hun cuuɓ cuuɓ. 5 Ŋ raɗis yaahiŋ ngo, ŋ deg ɓi Misra wa, ŋ puliɗ Israayel ŋ kur kiŋ ɓa ɗah, ɓi Misra hey inhe ne ñam Nikiɗi. » 6 Musaa na Aaruna tumoheeɗa in ceem ɗaa findi Nikiɗi woyohee ɓa. 7 Musaa raakeen kiis ndaŋkiyaah-yasna-kaahay (80), Aaruna raakka kiis ndaŋkiyaah-yasna-kaahay na kiis kaahay (83) wa ɓa na woye na Firawna.

8 Wa Nikiɗi woo na Musaa na Aaruna woo ceem, a dokkissa, a woosa ɓa ne : 9 « Firawna woo ɗu ne : “ Teeɓohaat firnde ” ɗah, fu yi Musaa, woya Aaruna ne a ɓayaat ndooɗiŋ ɗe, a njafa ŋ fiki Firawna, wa hey ɓoƴsuke iiñ. »

10 Musaa na Aaruna kaɗta ŋ Firawna, ɓa haɓɗohha in ceem ɗaa, findi Nikiɗi nakohee ɓa wa. Aaruna ɓayya ndooɗaŋ ɗe, a njaffaa ŋ fiki Firawna na dag caŋ ɗe, wa ɓoƴsukka iiñ duu'in. 11 Firawna ɓeeɗukka naah ca na ñiingo'oh caŋ Misra. Heɗ haf ceem nammba haɓiɗ ŋ in caŋ ɓa in mand ɗaa. 12 Yaa nu nga ɗah njaffa ndooɗaŋ ɗe ŋ kehƴi, wa ɓoƴsukka iiñ. Waaye waŋ Aaruna onnda caŋ ɓa. 13 Hondohɗi, keeñiŋ Firawna ndennga, findi Nikiɗi woyohee wa. A sannga sikɗuk Musaa na Aaruna.

14 Wa Firawna sang sikɗuk, Nikiɗi woosa Musaa ne : « Firawna faɗanɗi ɗu ne ɗu coot, a ndeng ndeng keeñ. 15 Kaɗa fu coha na ɗe kim na ɓaaɓa teel, ŋ wahtuuni a na kaɗohe kala, fu tufuk ŋ fikiice ŋ sereendaŋ wa, ɓayndoha ndooɗi ɓoƴsukee iiñ, 16 fu woo ɗe ne : “ Nikiɗi Koohiŋ Heber ci, a yi woos so nga ɗa, a woo ne : ‘Faɗa cuuɓiŋ ɗe wa kaɗ ɗe ñaamka ŋ bilaf fa.’ Waaye fu sikɗukɗi poyi ! 17 Nikiɗi woo ne ngaŋ in cii, fu hey inhe ne a yi Nikiɗi. Marka ! Ŋ hey ɓaye ndooɗii ŋ yaahiŋ ngo, ŋ laɓa ŋ kali, wa ɓoƴsuk ñif. 18 Cuurund ci kaan, masmiŋ kali otee po ɓi Misra minissanɗaa an. ” »

19 Nikiɗi woyissa Musaa ne : « Woya Aaruna, a ɓay ndooɗiŋ ɗe, a raɗisa, ŋ ɗisik ci masuɓ raak jen ŋ Misra, kal ci na huluɓ ci, na laah ci na ɗisik ci raak masuɓ jen ne ca ɓoƴsuk ñif. Kur ki jen hey raake ñif po ŋ hongol ci na mbalkaaci. »

20 Musaa na Aaruna haɓɗohha in ceem ɗaa findi Nikiɗi woyohee ɓa. Ŋ fiki Firawna na dag caŋ ɗe, Aaruna ɓayya ndooɗaŋ ɗe, a laɓpaa ŋ Niil, masma jen ɓoƴsukka ñif. 21 Cuurund ca kaannda, masma oteeɗa, ɓi Misra minisɗaa an, kur ka jen raakka ñif.

22 Ŋ ineem, heɗ haf ca nik ŋ Misra nammba haɓiɗ in mand ɗaa na in caŋ ɓa. Findi Nikiɗi woyohee wa, keeñiŋ Firawna nikka ndengiɗ. A sannga sikɗuk Musaa na Aaruna. 23 A eɗta ɓa finho, a haadda kahan ce buglassaaɗi. 24 Ɓi Misra jen mineeɗi an masmaŋ kala weɗ tah po ɓa aceeɗa ŋ sereendaŋ wa ne ɓa raak masuɓ moɗiɗ. 25 Sota Nikiɗi sotee kala tumeen neeh yasna-kanak.

26 Wa ineem coot, Nikiɗi woosa Musaa ne a kaɗ ŋ Firawna a woo ɗe ne : « Nikiɗi woo ne fu faɗ cuuɓiŋ ɗe wa kaɗ ɗe ñaamka. 27 Fu sang ɗah, marka, a hey ruhsiɗe mboɓ laayoh na laayoh ŋ kur kiŋ ɗa, 28 kali hey riife na mboɓ, ca pulohan nga, ca aas ŋ ɗooƴ kur ki jen, ca hey kaɗe po ca ree ɗisik ci na siiɓohse mun na ci na utohse mbuuru. Ca hey name nik ŋ kahan ciŋ ɓooɓiŋ ɗa na ciŋ dag ciŋ ɗa. Ca aas ŋ ɗooƴ kahan fu, ca hey ree tuuƴ fu po fiƴaangi fu na faankohe sah. 29 Ee di' ! Ca hey rape ŋ ɗafuk ɓooɓiŋ ɗa, na dag ciŋ ɗa po fu sah. »