11
Caac caŋ ɓoo na kosa
1 Kos weɗ ne : wa woor ɓoyi ne in ci yaakaaru raakiɗ, te a ooluk ne in ci hotuuɗi nikiɗ. 2 Caac ciŋ ɓoo kosohee ɗaa, weɗi tah Kooh seede'iɗ ɓa seede moɗiɗ ŋ Fiis ci Hooliɗ ci.
3 A kos tah po, ɓoo hotta ne Adina ferohu woo kiŋ Kooh, kon in ci na hotke pulohɗi ŋ ini ɓo' min hot.✡11:3 Camba 1:1–2:25
4 A kos tah po, Abel seeƴukka wuu Kooh seeƴki uup baah wiŋ Kayin. A weɗ tah po Fiis ci Hooliɗ ci seede'iɗ ne a ɓo' yurhiɗ, Kooh seede'iɗ ɗe ŋ teyɗuka a teyɗuk seeƴkaŋ ɗe. A kos tah po, ŋ ini a nik ɓo' kaaniɗ jen, a ris woo poyi.✡11:4 Camba 4:3,10
5 A kos tah po, Henok coottohuusa ne a lahuu ŋ kakaan. A hotissuuɗi, laam a Kooh coottoh ɗe. Waaye bala a coottohsan ɗah, Fiis ci Hooliɗ ci seede'iɗ ne a neɓiɗ Kooh.✡11:5 Camba 5:18-24 6 Ɗal kos ɗah, ali ɓo' minɗi neɓ Kooh. Laam ɓo' nu waaɗ reɓ Kooh ɗah, fu joyiɗ kos ne a nikiɗ te a na aafe aaf ɓi na waakee ɗe.
7 A kos tah po, wa Noohin inhiɗu in ci hee raake te ɓo' hotɗi ca paaɗ, a kerhiɗta Kooh, a haɓiɗta gaal yakak ne a muciɗ ɓi kahan ce. A kosa a kosee tah po a ɓurra ɓi Adina, a rahassa kiyurhi kos na eɗohe.✡11:7 Camba 6:8–8:17
8 A kos tah po, wa Ibrahiima ɓeeɗku, a teyɗukka kaɗ kur ka a joyee rahas lamaah lamu te a inahɗi ɗiska a kaɗe.✡11:8 Camba 12:1-7 9 A kosa a kosee tah po, a gennda ŋ kur ka a gapse findi hanhe✡11:9 Camba 23:4 ; a gennda ngaŋ ɗiip na Isaahha na Yaŋhooɓa ɓi Kooh namee gap ne ɓa hey name lam kur keem.✡11:9 Camba 26:2-6; 28:13-15 10 A sekeeɗa ne a gen ŋ kur-taaha yipu ŋ atoh, wi fu inah ne a Kooh fiisoota, taɓahhaa.
11 A kos tah, Kooh tummba po Ibrahiima na Saarata minnda raak kuɓu, ali nik ne ɓa yakeen ŋ raak kuɓu, te a yi Saarata sah, a nikee ɓitiɓ minaaɗi raak kuɓu.✡11:11 Camba 21:1-7 Wa wooree woor Ibrahiima ne Yi gapoh na dokkeeɗi finho.✡11:11 Camba 15:1-6 12 Tahha po wa raakangannga, ɓi laayiɗ rimkohha ngaŋ ɓo' yino yi useeɗi kakaan ; ɓa laayya po haa hor ciŋ eel ci, ɓa minaaɗiisa kindu po haa merhey miŋ yaah-cookmi.✡11:12 Camba 22:17
13 Ɓooɓi kosee ɓeem jen kaan na kos. Ɓa rahasɗi in ci Kooh gapohe, waaye ɓa ƴokiɗ ca, ɓa summba nga ca po haa ɓoyi na taambɗukee ɓo' ; ɓa woosa halang ne ɓa hanhe ngaŋ kehƴi,✡11:13 Camba 47:9 ɓa ɓaaɓoh. 14 Ɓi na woyohee ɗaa na teeɓohe wooriɗ ne ɓa na waake kur ki ɓa min ɓaahoh. 15 Nikee ne, a kur ka ɓa pulohee weɗ hel ciŋ ɓa nikohee ɗah, ɓa heen mine dokuk nga. 16 Waaye ɓa waaɗee wi uup baah, wi nik ŋ Eel ci. Weɗ tah Kooh supukɗi ɓeeɗkohu Koohiŋ ɓa, laam a kooɗkiɗiɗ ɓa kur.
17 A kos tah po, wa Ibrahiima markiskasse, a teyɗukka ne a seeƴkoh kuɓkiŋ ɗe Isaahha, kuɓkiŋ ɗe yino-kongi. Waam raak ɗe gapuuɗ, 18 te ŋ in ci a gapse, Kooh woyiɗ ɗe nga ne : « Fu raakohan ɓi rimkohan nga ɗa ŋ Isaahha.✡11:18 Camba 21:12 » 19 Ibrahiima markeen po a inahha ne Kooh raakiɗ hatili min hultiɗ kaaniɗ sah. Ŋ ineem, ɓo' miniɗ woo ne a wiku wiku kuɓkiŋ ɗe findi ɓoyi hultiɗu.✡11:19 Camba 22:1-14
20 A kos tah po, Isaahha nammba barke'iɗ Yaŋhooɓa na Esaaw ŋ in ca haye.✡11:20 Camba 27:1-40
21 A kos tah po, wa Yaŋhooɓa na kaane, a barke'iɗta yaa nu nga ŋ kuɓuuciŋ Yuusufa,✡11:21 Camba 48 a ambaalukka ŋ hafiŋ ndooɗiŋ ɗe, a ƴekka ne a ñaamuk Kooh.✡11:21 Camba 47:31
22 A kos tah po, wa Yuusufa hee kaane, a woosa ŋ pulaŋ Israayel Misra, a dengkohha ŋ ini kaɗ ŋ ƴoh ciŋ ɗe.✡11:22 Camba 50:24-26
23 A kos tah po, wa Musaa rimu, yaay ɓa na baab ɓa ɗasiɗta ɗe caɓin kaahay. Laam ɓa hoteen moɗ ŋ kuɓka te ɓa neƴƴoheeɗi nakohaŋ buura.✡11:23 Pula 2:1-2
24 A kos tah po, wa Musaa yak, a teyɗukɗi kerhis ne a kuɓu ngaŋ kuɓki ɓitɓiŋ Firawnaana.✡11:24 Pula 2:3-15 25 A tannda ne a mbugalu na cuuɓiŋ Kooh, te raak kipes kiŋ ɗe mineen neɓ ; waaye neɓɗeem heen reehe te wa hee nike neɓiɗ ŋ bakaaɗ. 26 Teyɗuk heefu findi Kiristaani, weɗ ngisohɗee ɗe raak-raakiŋ Misra jen ; laam a degee has ciŋ ɗe ŋ aafi Kooh aafan ɗe.
27 A kos tah po, a pulohha Misra te a neƴƴohɗi ayrukaŋ buura.✡11:27 Pula 3–14 Wa mand haa ne a hotee Yi na hotseeɗi, weɗ tah ɗe muñeeɗa.
28 A kos tah po, Musaa haɓiɗta seeƴkaŋ Paak, a woosa ɓooɓa ne ɓa reefaat ñif ma ŋ yahndeer ca ne malaakaani na yahrohe hay ɗah, a laaluu saaw ciŋ Israayel ca.✡11:28 Pula 12
29 A kos tah po, wa Israayel ca taamb ŋ ɗooƴ Cookma-Ruumnda, wa mannda haa ɓa taamb ŋ merhey suyiɗ ; ɓi Misra jeemmba nam taamb nga, masma onnda ɓa.✡11:29 Pula 14
30 A kos tah po, wa Israayel ca taambɗee miira ɗingee Yeriko, ɓa wileeɗaa, po ɓa raakka neeh yasna-kanak na ineem, miira keennda juƴ.✡11:30 Yosuwe 6
31 A kos tah po, wa ɓooɓa taambɗeeɗi Kooh apse, Rahab, ɓitɓa toonkoha, mucca, laam a taambkohee taambkoh moɗoɗ espiyoŋ ca Israayel ca tuuƴe.✡11:31 Yosuwe 2; 6
32 Ŋ joy ye ɓaatis kotii ? Wa haɓɗi nga ne ŋ woo ŋ ini kaɗ ŋ Gedewon,✡11:32 Kilifaaci 6–8 Barak,✡11:32 Kilifaaci 4–5 Samson,✡11:32 Kilifaaci 13–16 Yefte,✡11:32 Kilifaaci 10:6–12:7 Dawuuda,✡11:32 1 Samuwel 16–31; 2 Samuwel; 1 Buur ci 1:1–2:10; 1 Nguur ci 11–29 Samuwel✡11:32 1 Samuwel 1–28 na woosuuɗ ci. 33 E kos tah po, ɓa folla ɓi buur po ɓa degga kur ciŋ ɓa yaah, ɓa tiindɗeeɗa waas, ɓa rahassa in ci Kooh gapohe, ɓa rannga nguɓ gaynde saahiɗ,✡11:33 Dañeel 6 34 ɓa ƴimmba doole yongkaah,✡11:34 Dañeel 3 ɓa mucca ngaŋ kaañ ndang, ɓa rahassa hatili ɓa raakeeɗi, ɓa nikka jalmba ŋ hiñoh, ɓa ngekka hiñohoh caŋ kur ca cinooca.
35 Wa haɓɗi nga ne ŋ nam woo ŋ ini kaɗ ŋ ɓitiɓ ca wiksee kaaniɗ ciŋ ɓa hultiɗuuɗ.✡11:35 1 Buur ci 17:7-24; 2 Buur ci 4:8-37 Na ɓi ɓo' wiiriis, ɓi kaan ŋ mbugal ca ɓa mbugalse, sagu waaɗa ɓa waaɗeeɗi findi ɓa hee pulɗohse nga ; ɓa waaɗee rahas hulti na eɗohe kipes ki ngisoh kipes ki ɓa hee ñake*11:35 Marka teerndi woysang 2 Makabee, saar 2. Teerndeem, wa ɓaah ngaŋ fiis ci na woyse "apokrif". Fu waak ca ngaŋ biibal ci ŋ peɗeem ci cinooci ɗah, cum raakiɗ ca, cum raakɗi ca.. 36 Na ɓi wiiriis, ɓi njembtasse, laɓseeɗa ngeer, jatngasseeɗa, ɓekseeɗa ŋ kasooci, te ɓa munnja. 37 Ɓum tapseeɗa atoh po ɓa kaannda, ɓinooɓi ɓesuusa ŋ leerni, [ɓinooɓi nattu'seeɗa,] ɓum apuusa na ndang, raakka ɓi raakeeɗi ali in, ɓa ɓekkee und mbaal wala und pe', ɓa wileeɗa ɓak nu ɓak, ɓa torhiɗasseeɗa, ɓa mbugalseeɗa. 38 Adina yeyyoo'eeɗi ɓa ! Ɓa nikee nga, ɓa kaɗeeɗa ɗisik nu ɗisik ŋ bilaf ci na tangooci, na ɗembohaaci nik ŋ hur ciŋ atoh ci na nung ciŋ kehƴi.
39 Ɓooɓeem jen, a kosiŋ ɓa tah po, ɓa seede'ɗuusa seede moɗiɗ. Moona deey, ɓa rahseeɗi ini Kooh gapohe. 40 Laam, Kooh kooɗkiɗee ɓoo in wiiriis wi uup baah, a waaɗeeɗi ne ɓa mitɗu te ɓoo ɓaahuu nga.
✡11:3 11:3 Camba 1:1–2:25
✡11:4 11:4 Camba 4:3,10
✡11:5 11:5 Camba 5:18-24
✡11:7 11:7 Camba 6:8–8:17
✡11:8 11:8 Camba 12:1-7
✡11:9 11:9 Camba 23:4
✡11:9 11:9 Camba 26:2-6; 28:13-15
✡11:11 11:11 Camba 21:1-7
✡11:11 11:11 Camba 15:1-6
✡11:12 11:12 Camba 22:17
✡11:13 11:13 Camba 47:9
✡11:18 11:18 Camba 21:12
✡11:19 11:19 Camba 22:1-14
✡11:20 11:20 Camba 27:1-40
✡11:21 11:21 Camba 48
✡11:21 11:21 Camba 47:31
✡11:22 11:22 Camba 50:24-26
✡11:23 11:23 Pula 2:1-2
✡11:24 11:24 Pula 2:3-15
✡11:27 11:27 Pula 3–14
✡11:28 11:28 Pula 12
✡11:29 11:29 Pula 14
✡11:30 11:30 Yosuwe 6
✡11:31 11:31 Yosuwe 2; 6
✡11:32 11:32 Kilifaaci 6–8
✡11:32 11:32 Kilifaaci 4–5
✡11:32 11:32 Kilifaaci 13–16
✡11:32 11:32 Kilifaaci 10:6–12:7
✡11:32 11:32 1 Samuwel 16–31; 2 Samuwel; 1 Buur ci 1:1–2:10; 1 Nguur ci 11–29
✡11:32 11:32 1 Samuwel 1–28
✡11:33 11:33 Dañeel 6
✡11:34 11:34 Dañeel 3
✡11:35 11:35 1 Buur ci 17:7-24; 2 Buur ci 4:8-37
*11:35 11:35 Marka teerndi woysang 2 Makabee, saar 2. Teerndeem, wa ɓaah ngaŋ fiis ci na woyse "apokrif". Fu waak ca ngaŋ biibal ci ŋ peɗeem ci cinooci ɗah, cum raakiɗ ca, cum raakɗi ca.