1 Wa in ceem coot, wa raakka mbeh Yeesu kaɗta ɓaka winooraŋ Cookmaŋ-Galile, wi na name woyu Cookmiŋ-Tiberiyad. 2 Mboolo laayiɗ ñaakiɗta ɗe sagu firndeeca ɓa hotee ɗe haɓɗeeɗa, ŋ wirɗa a wirɗee kosaayiɗ ca. 3 Yeesu rappa ŋ ɗafuk tango, ŋ ndaam, a ɓooffa nga na taalubeeciŋ ɗe. 4 Wa raak feetiŋ Yawuut ci na woyse Paak heeɗa ree.

5 Yeesu jaɗtukka, a hotta mboolo yakak hayeeɗa nga ɗe. A woosa Filip ne : « Mbuuruuci ɓooɓii ñaman, ɓoo romohan ca nde ? » 6 A markiskee Filip weɗ tah a woosa ineem ; a yi ŋ haf ce, a inheen ini a na hee tume. 7 Filip loffa ɗe ne : « Ali ɓoo ɓay dinaar teemet-kanak (200), ɓoo rom mbuuru, yaa nu nga ɗah, minanɗi raak sah nguɗ ƴin. »

8 Taalube wiiriis na woyse Andare, taambɗoh Simong Piyeer, woosa Yeesu ne : « 9 Raakiɗ njaanji raak mbuuru lorso yatuus ndii na cuurund ƴin kanak. Waaye ca paƴɗi juukiŋ ɓooɓi in. »

10 Yeesu woosa ɓa ne : « Woyaat mboolndi jen ne ɓa ɓoofaat. » Ndaam raakeen paangi laayiɗ. Ɓa ɓooffa nga, ƴaar ca nikeen ŋ ɓak junni-yatuus (5000). 11 A ɓayya mbuuruuca, a corkiɗta Kooh, a paysohha ca ɓooɓa ; a nammba tum cuurund ca ɗaa, po yaa nu nga ɗah raakka po doyiɗta.

12 Wa ɓa ñam po ɓa jen ɓa kappa, Yeesu woosa taalubeeciŋ ɗe ne : « Nangɗohaat tasɗohiici, ali in kinaat yahuk nga. » 13 Taalubeeca nangɗohha tasɗohiica po ɓa raakka pañe riifiɗ ndaŋkiyaah na kanak (12). Ɓa kooɗohee ca ŋ tasɗohiicaŋ mbuuruuca yatuus ca ɓooɓa ñame.

14 Wa ɓooɓa hot firndeeni Yeesu haɓiɗ weem, ɓa woyeeɗa ne : « Wa keeh, a yi Woosuuɗi joyee hay Adina. » 15 Waaye a inahha ne ɓa na hee ɗe ɓaye ŋ doole, ɓa tum ɗe buur ; a faɗta ɓa ndaam a cootissa ŋ ɗooƴ tangoora, kiik ce.

16 Wa niina ree, taalubeeciŋ Yeesu ruhussa ŋ sereendaŋ cookma. 17 Ɓa aassa gaal ne ɓa kaɗ Kapernawum, ŋ ɓaka winooraŋ cookma. Wa ñuusa keen, raak Yeesu reeɗi nga ɓa paaɗ. 18 Wa puuɗseeɗa puuɗis raakiɗ doole, cookma jummba.

19 Wa ɓa joow ini ree kilomeet yatuus wala yasna-yino, ɓa ƴokka Yeesu tiindeeɗa ŋ ɗafuk cookma, a reɓeeɗa ŋ gaala. Ɓa tiitta. 20 Waaye a woosa ɓa ne : « A ñam, kinaat neƴƴoh ! » 21 Ɓa waaɗta ɗe rapiɗ ŋ gaala rek, gaala reesa ɗiska ɓa kaɗe.

22 Wa Kooh wiis, mboolnda tasee ŋ ɓaka faahaŋ cookma hotta ne gaal ƴin yino weɗ nikee nga, te Yeesu aaseeɗi nga na taalubeeciŋ ɗe, ɓa cootee kiik ɓa. 23 Wa ɓa nik ndaam, ɓa markeeɗa, ɓi gaal wiiriis puloh Tiberiyad, hayya ndaam, ŋ ɗiska Heɗi corkiɗohee Kooh ŋ mbuurnda, mboolnda ñammbaa.

24 Wa ɓooɓa hot ne Yeesu nikisɗi ndaam te taalubeeciŋ ɗe namɗi nik nga, ɓa aassa ŋ gaal caam, ɓa kaɗta ɗe waaka ŋ Kapernawum. 25 Ɓa ƴakaandukka cookma po ɓa reesa ŋ ndaam, ɓa raakka ɗe nga, ɓa woosa ɗe ne : « Jangɗohohi, fu ree ndii kiɗa ? » 26 A loffa ɓa ne : « Ñam na woyee ɗu wa te ambaat ne wa keeh : Firndeeci ŋ teeɓoh tahɗi ɗu waakee so, waaye e mbuuruuci ɗu ñam po ɗu kappa. 27 Kinaat panguk ne ɗu raak kañam ki min yahuk, waaye pangkaat wuu kañam ki minɗi yahuk, wi na eɗohe kipes ki heyɗi reehe. Kañam keem, Kuɓkiŋ ɓoyi hey ɗu wa eɗe, a yi Kooh yi Baabi eɗ ne a nikiɗ ɗe. »

28 Ɓa meekissa ɗe ne : « Ɓoo joy na tum po ɓoo haɓiɗ in ci Kooh nak ɓoo ? » 29 A loffa ɓa ne : « Ini ɗu joy haɓiɗ, wi Kooh nak ɗu, weɗ ne ɗu kos Ɓoyi a woos. »

30 Ɓa woosa ɗe ne : « Fu teeɓan ɓoo winde firnde ne ɓoo hota ɗah, ɓoo kos ini fu woo ? Fu haɓɗan ye ? 31 Caac ciŋ ɓoo ñamiɗ kañam ka ɓa teekee maan ŋ kehƴa hulanga, findi Fiis ci woyoha an : “ A eɗta ɓa kañam puloh Eel ci.✡6:31 Pula 16; Sabuur 78:24; 105:40 ” » 32 Yeesu woosa ɓa ne : « Ñam na woyee ɗu wa te ambaat ne wa keeh : A Musaa eɗ ɗu kañam ka pulohee Eel ci haa, a Baabiŋ ngo na eɗee ɗu kañam ki keeh-keehi puloh Eel ci. 33 Laam, kañam ki Kooh eɗoh, weɗ kañam ki puloh Eel ci, te wa eɗee ɓi Adina kipes. »

34 Ɓa woosa ɗe ne : « Kon kilifaani, eɗa ɓoo kañam keem Kooh-nu-wiis. » 35 A loffa ɓa ne : « A mi kañam ki na eɗohe kipes. Yaa nu hay nga so ɗah, a moosanɗi aɗuk te yaa nu kos so ɗah, a moosanɗi sifaɗuk. 36 Waaye ŋ woyiɗ ɗu wa : Ɗu hotiɗ to, te wa tahɗi ɗu kos. 37 Ɓooɓi Baabi eɗ to jen hey haye nga so ; te ɓo' nu hay nga so ɗah, ŋ aañanɗi ɗe muk. 38 Ini tah ho ruhsoh Eel ci, wa nikɗi haa ne ŋ hay ne ŋ tum ini neɓ po, waaye ŋ hayiɗ ne ŋ tum waaɗ-waaɗiŋ Yi woos so. 39 Te waaɗ-waaɗiŋ Yi woos so weɗ ne ŋ joyɗi ñak ali ɓo' ŋ ɓi a eɗ to jen, waaye ŋ hultiɗ ɓa ŋ mbeha mirndohan. 40 Ee, waaɗ-waaɗiŋ Baabiŋ ngo weɗ ne yaa nu hot Kuɓki te a kos ɗe ɗah, a raak kipes ki heyɗi reehe ; te mi yi Kuɓki, ŋ hey ɗe hultiɗe ŋ mbeha mirndoh. »

41 Yawuut ca ñaɗsukeeɗa ŋ Yeesu, ŋ ini a woyee ne a yi kañam ki ruhsoh Eel ci. 42 Ɓa woyeeɗa ne : « A Yeesu kuɓkiŋ Suseef yii haa e ? Yi fu inah ne ɓoo inhiɗ yaay ɓa na baab ɓa ! A min na woyoh kotii ne a ruhsoh Eel ci ? » 43 Yeesu loffa ɓa ne : « Faɗaat ñaɗsuki ɗu na ñaɗsuke ŋ harmban ɗu. 44 Ali ɓo' minɗi hay nga so ne Baabi yi woos so nookɗi ɗe ɗah. Te mi, ŋ hey ɗe hultiɗe ŋ mbeha mirndoh. 45 Woosuuɗ ci fiisiɗ ne : “ Kooh hey ɓa jangɗe jen.✡6:45 Esayi 54:13 ” Ŋ ndeem, ɓo' nu sikɗuk Baabi, teyɗuk jangɗohiŋ ɗe ɗah, a hey haye nga so. 46 Nikɗi haa ne ɓo' moosiɗ hot Baabi ; e Yi puloh ŋ Kooh dong, a yi moos hot Baabi.

47 Ñam na woyee ɗu wa te ambaat ne wa keeh, ɓo' nu kos ɗah, a raakiɗ kipes ki heyɗi reehe. 48 A mi kañam ki na eɗohe kipes. 49 Caac ciŋ ɗu ñameen maan ŋ kehƴa hulanga ; hondohɗi ɓa kaaniɗ. 50 Waaye wii weɗ kañam ki ruhsoh Eel ci, ɓo' nu ñama ɗah, kaananɗi. 51 A mi kañam ki na pese, a mi kañam ki ruhsoh Eel ci. Ɓo' nu ñam ŋ kañam kii ɗah, a hey pese po faw. Te kañam ki mi na hee eɗohe, e faaniŋ ngo. Ŋ hey wa eɗohe ne Adina pes. »

52 Ŋ ineem, Yawuut ca taastiɗoheeɗa taastiɗoh miskiɗ ŋ harmban ɓa an : « Ƴaari eɗohan ɓoo faaniŋ ɗe na, ne ɓoo ñama ? » 53 Yeesu loffa ɓa ne : « Ñam na woyee ɗu wa te ambaat ne wa keeh, ɗu ñamɗi faaniŋ Kuɓkiŋ ɓoyi te ɗu anɗi ñif miŋ ɗe ɗah, ɗu raakanɗi kipes ŋ ɗooƴ ɗu. 54 Ɓo' nu ñam faaniŋ ngo, a an ñif miŋ ngo ɗah, a raakiɗ kipes ki heyɗi reehe, te mi, ŋ hey ɗe hultiɗe ŋ mbeha mirndoh. 55 Laam, faaniŋ ngo weɗ kañam keeh-keeh te ñif miŋ ngo weɗ anaah keeh-keeh. 56 Ɓo' nu ñam faaniŋ ngo, a an ñif miŋ ngo ɗah, a genan ɓaah nga so, te mi, ŋ genan ɓaah nga ɗe. 57 Baabi woos so, a yi pes te mi na pesohee ɗe ; wa mand ɗaa, ɓo' nu ñam mbo ɗah, a pesohan ndo. 58 Kañam ki ruhsoh Eel ci weɗi wii. Wa mandɗi na wa caac caŋ ɗu ñame ; ɓa kaaniɗ, waaye ɓo' nu ñam kañam kii ɗah, a hey pese po faw. »

59 Woo ceem ceɗ Yeesu woo, wa a jangɗohee ŋ sinaagoga, ngaŋ Kapernawum.

60 Wa taalubeeciŋ ɗe kerah woo ceem, laayiɗ nga ɓa woosa ne : « Woo cii neɓɗi kerhu, ya ɓa min ca sikɗuk ? » 61 Yeesu inheen ŋ ɗooƴ ce ne taalubeeci ɓii ñaɗsuk ŋ ineem, a woosa ɓa ne : « Ini ŋ woo yoondiɗ ɗu yoondiɗ e ? 62 Moo ɗu hot Kuɓkiŋ ɓoyi rapee ŋ ɗiska a kocee nik ɗah nak ? 63 A Fuuɗsiŋ Kooh na eɗohe kipes, ɓo' na faan ce a minɗi haɓiɗ ali in. Woo ci ŋ woo ɗu ceem puloh ŋ Fuuɗsiŋ Kooh te ca na eɗohe kipes. 64 Waaye raakiɗ nga ɗu ɓooɓi kosɗi. » Ŋ ineem Yeesu inheen ŋ cambohaana ɓi kosɗi ɗe, na yi na hee ɗe eɗndohe. 65 A degga nga ne : « Weɗ tah ŋ woyiɗ ɗu ne : Ali ɓo' minɗi hay nga so ne Baabi onɗi ɗe ne a hay nga so ɗah. »

66 Ina amboh waam, laayiɗ ŋ taalubeeciŋ ɗe faɗta ɗe, ɓa hunisɗi na ɗe. 67 Yeesu woosa Apootar ci ndaŋkiyaah na kanak ci (12) ne : « Ɗu, ɗu namɗi waaɗ kaɗ e ? » 68 Simong Piyeer loffa ɗe ne : « Heɗi, ɓoo na hee kee ŋ ɓa ? Yaf ɓayoh woo ci na eɗohe kipes ki heyɗi reehe. 69 Ɓoo kosiɗ te ɓoo inhiɗ ne yaf Hooliɗi puloh ŋ Kooh. »

70 Yeesu loffa ɓa ne : « Ñam kooɗ ɗu, ɗu ɓi ndaŋkiyaah na kanak ci (12) haa e ? Moona yino nga ɗu, a Seytaani. » 71 A woyee Yudaa, kuɓkiŋ Simong Iskaryot, yi eɗndohan ɗe. Yeem ɓaahee ŋ Apootar ci ndaŋkiyaah na kanak ci (12).