1 Yeesu kaɗeeɗa, a hotta ƴaar fuuliɗ, yi rimu naa. 2 Taalubeeciŋ ɗe meekissa ɗe ne : « Jangɗohohi, wa ye tah ƴaarii rimuusa fuuliɗ, a yi bakaaɗ wala e ɓooɓi rim ɗe ? » 3 Yeesu loffa ɓa ne : « A yi haa, e ɓooɓi rim ɗe haa, waaye fuuli a fuul tahiɗ po Kooh hey teeɓohe tumohaaɗ ciŋ ɗe nga ɗe. 4 Feeh ɓoo ɓii ŋ noh ɗah, ɓoo joy joy tum tumohaaɗ ciŋ Yi woos so ; weki wii hay, wi fu inah ne ali ɓo' minanɗi tum in. 5 Feeh mi yii ŋ adinaani ɗah, ñam siñaariŋ wa. »

6 Wa a woo ineem, a tuhussa ŋ kehƴi, a iiri'iɗta merhey na mituhus miŋ ɗe, a reeffaa ŋ has caŋ fuulɗa. 7 A woosa ɗe ne : « Kaɗa fu muktuka ŋ mbalkaanaŋ Silowe. » (Silowe tokis tuuƴu). Ƴaara kaɗta, a muktukka, wi a hay, a hoteeɗa moɗoɗ.

8 Gentoh caŋ ɗe, na ɓooɓa meeɗ ɗe hot yalwaane woyeeɗa an : « A ƴaarii meeɗ ɓoof ndii yalwaane haa e ? » 9 Ɓum woyeeɗa ne : « A yi. » Ɓinooɓi woyeeɗa ne : « A yi haa, ɓa mand mand. » Waaye ƴaara ŋ haf ce woosa ne : « A ñam sah de' ! » 10 Ɓa woyeeɗa ɗe ne : « Tumoh na po fu hotee kotii ? » 11 A loffa ne : « A ƴaari na woyse Yeesu a yi iiri'iɗ merhey, a reeffaa ŋ has ciŋ ngo, a woosa so ne ŋ kaɗaat ŋ muktuka ŋ Silowe ; ŋ kaɗta ŋ muktukka nga, jaarra ŋ minnda hot. » 12 Ɓa meekissa ɗe ne : « A nde ƴaareem ? » A loffa ɓa ne : « Ŋ inahɗi ɗiski a nik. »

13 Weɗi ɓa ɓayoh ƴaara fuulee ŋ Farisen ca. 14 Raak, mbeha Yeesu iiri'ɗee merhey ma, a wiriɗta has ciŋ ƴaara, wa nikee mbehi na iɗsiɗkohse. 15 Farisen ca nammba meekis ƴaara findi wa kaɗoh po a hote. Ƴaara woosa ɓa ne : « A tum merhey iiri ŋ has ciŋ ngo, ŋ muktukka, ŋ hotta. »

16 Ŋ ineem raakka Farisen ca woyee ne : « Yeesu yeem minɗi puloh ŋ Kooh, a na taambɗeeɗi in ci nakohu ŋ ini kaɗ ŋ mbehi na iɗsiɗkohse. » Ɓum woyeeɗa ne : « Bakaaɗoh min na teeɓohoh firnde feyohiɗ findi cii ? » Paysukoh raakka ŋ harmban ɓa. 17 Ŋ ineem, ɓa woyissa ƴaara ne : « Fu woo ye ŋ ƴaari hotiɗ has ciŋ ɗa ? » Ƴaara loffa ne : « A woosuuɗ. »

18 Kilifaacaŋ Yawuut ca koseeɗi ne a fuulee fuul, a wirɗuusa, tahha po ɓa ɓeeɗukka yaay ɓa na baab ɓa. 19 Ɓa meekissa ɓa ne : « An yii kuɓkiŋ ɗu i ? Wa keeh ne a rimu fuuliɗ e ? Tumoh na po a hotee kotii ? » 20 Ɓeem loffa ne : « Ɓoo inhiɗ daal ne yii, a kuɓkiŋ ɓoo te a rimu fuuliɗ ; 21 waaye findi wa kaɗoh po a hotee kotii, ɓoo inahɗaa, te ɓoyi tah a minnda hot, ɓoo namɗi ɗe inah. Meeksaat ɗe, a komaaki haa, a miniɗ woyiɗ haf ce. »

22 Ɓa neƴƴohee kilifaacaŋ Yawuut ca, weɗ tah po ɓa woosa ineem. Raak ɓeem huniɗ ne ɓo' nu teyɗuk ŋ fiki ɓooɓi ne a Yeesu a yi Mucɗohi Gapohse ɗah, a hey aañse ŋ sinaagoga. 23 Ineem weɗ tah yaay ɓa na baab ɓa woosa ne : « A komaaki haa, meeksaat ɗe. »

24 Weɗ Farisen ca ɓeeɗkohis ƴaara fuule waasi kanakɗoh, ɓa woosa ɗe ne : « Woyɗa Kooh, ɓoo inhiɗ ne ƴaareem bakaaɗoh. » 25 A loffa ne : « Ŋ inahɗi andi a bakaaɗoh wala, waaye in yino ŋ inhiɗa, weɗ ne ŋ fuuleen, mi yii hot. » 26 Ɓa meekissa ƴaara ne : « A haɓiɗ ye ŋ has ciŋ ɗa ? A tumoh na po fu hotta ? » 27 Ƴaara loffa ɓa ne : « Ŋ woyiɗ ɗu wa po ƴutiɗ, waaye ɗu sikɗukɗi so. Wa ye tah ɗu waaɗissaa kerah ? Mand haa ne ɗu nam waaɗ nik taalubeeciŋ ɗe ! »

28 Ɓa ɓassa ɗe, ɓa woosa ɗe ne : « A fu taalubeeniŋ ƴaareem ! Ɓoo kay, ɓoo taalubeeciŋ Musaa. 29 Ɓoo inhiɗ ne Kooh woyiɗ na Musaa, waaye ƴaarii, ɓoo inahɗi ɗiski a puloh. » 30 A loffa ɓa ne : « Ineem nak weɗ feyoh, ɗu inahɗi ɗiski a puloh te a wirɗiɗ has ciŋ ngo ! 31 Ɓoo inhiɗ ne Kooh na teyɗukɗeeɗi bakaaɗoh ci, waaye ɓoyi kerhiɗ Kooh te a haɓɗee ini a waaɗ, ɓoyeem a yi a na teyɗukɗe. 32 Ina Adina nikoh poyi, wa kerhohuuɗi ne ɓo' hotɗiɗ fuuliɗ rimuuɗ fuuliɗ. 33 Ƴaareem puloheeɗi ŋ Kooh ɗah, a heeɗi mine haɓiɗ ali in. » 34 Ɓa loffa ɗe ne : « Fu yi rimuk findi fu hend jen ŋ bakaaɗ, a fu na jangɗe ɓoo e ? » Weɗi ɓa pulɗoh ɗe ŋ hara.

35 Wa Yeesu kerah ne ƴaara pulɗuuɗ, a kaɗta ɗe marka, a woosa ɗe ne : « Fu kosiɗ Kuɓkiŋ ɓoyi e ? » 36 Ƴaara woosa ne : « A ya ɓa po ŋ min ɗe kos kilifaani ? » 37 Yeesu woosa ɗe ne : « Fu hotiɗ ɗe, a mi yi na woye na ɗa yii. » 38 Jaarra ƴaara woosa ne : « Heɗi, ŋ kosiɗ. » Ŋ ineem a ƴekka ŋ fiki Yeesu.

39 Ƴutta Yeesu woosa ne : « Ŋ hayiɗ Adina ne Adina atte'u, ŋ hay ne fuuliɗ ci hot te ɓi na hote fuul. » 40 Raakka Farisen ca nikee na ɗe ; wa ɓa kerah woo keem, ɓa woosa ɗe ne : « Ɓoo nam nik fuuliɗ e ? » 41 Yeesu loffa ɓa ne : « Ɗu nikee fuuliɗ ɗah, ɗu heeɗi raake bakaaɗ, waaye ɗu woo ne ɗu ɓii hot, weɗ tah ɗu genan ŋ bakaaɗ. »