1 Wa Yeesu ƴut woo, a hunnda na taalubeeciŋ ɗe, ɓa kaɗta ɓaka winooraŋ hulɓaŋ Sederon. Nguuk nikeen nga, a aassa nga na ɓa. 2 Yeesu na taalubeeciŋ ɗe meeɗeen nik nga, tahha po Yudaa, yi na hee ɗe eɗndohe, inheen ɗiska. 3 A hunnda nga na ɓi soldaar na ɓi alkaate ɓaah ŋ ɓa na niiɗe Kahan Kooh, e kilifaacaŋ seeƴkiɗoh ca na Farisen ca tuuƴee ɓa. Ɓa ɓayya niitoha na ganaay.

4 Yeesu inheen ini na hee ɗe rahse jen, a reɓpa nga ɓa, a meekissa ɓa ne : « Ɗu na waake ya ɓa ? » 5 Ɓa loffa ɗe ne : « Yeesu yiŋ Nasareet. » A woosa ɓa ne : « Ñam yii. » Wa raak Yudaa yi na eɗndohee ɗe tufkiɗ na ɓa. 6 Wa Yeesu woo ɓa ne : « Ñam yii », ɓa dokukka finho, ɓa keennda ŋ kehƴi. 7 Yeesu meeksissa ɓa ne : « Ɗu na waake ya ɓa ? » Ɓa woosa ne : « Yeesu yiŋ Nasareet. » 8 A woosa ɓa ne : « Ŋ woyiɗ ɗu wa, ñam yii. Nik ne ɗu na waakee so ɗah, faɗaat ƴaaɓii ɓa coot. » 9 A woyiɗ ineem ne ina a woyee wii raak : « Baab, ŋ ñakɗi ali ɓo' ŋ ɓi fu eɗ to. »✡18:9 Saaŋ 6:39; 17:12

10 Simong Piyeer nikee na ndang, a puliɗtaa, a ƴoɓpa ñaam ŋ ñaam caŋ seeƴkiɗoha yakka, nofiŋ ɗe ñaahmi nguɗta. Ñaameem teeksee Malkus. 11 Yeesu woosa Piyeer ne : « Dokna ndangiŋ ɗa ŋ holiŋ wa. Kaasiŋ miskiɗi Baabi eɗ to, ŋ joyɗaa joyɗi an e ? »

12 Ŋ ineem soldaar ca na kilifaanaŋ ɓa na alkaateecaŋ Yawuut ca, ammba Yeesu, ɓa tokka ɗe. 13 Ɓa koc ɗe ɓay ŋ ɗiskaŋ Hannas, baab ɓi ɓiti Kayif ; Kayif, a yi nikee seeƴkiɗoha yakka ŋ kiis kaam. 14 A yi woyee kilifaacaŋ Yawuut ca ne : « Ɓo' yino kaan wuu cuuɓi weɗ ngisoh. »✡18:14 Saaŋ 11:50

15 Simong Piyeer na taalube wiiriis nikee taambɗeeɗa Yeesu. Taalubeeneem, seeƴkiɗoha yakka inheen ɗe, weɗ tah a minnda hun na Yeesu, a aassa kahan seeƴkiɗoha yakka. 16 Piyeer nak, a tasee ŋ nguɓu kahna ŋ sero buntaana. Taalubeena yinoora pulla, a woosa na ɓoya nikee ŋ buntaana, yeem faɗta Piyeer a aassa na taalubeena. 17 Kuɓka cafƴa nikee ŋ buntaana, a nikee ñaam. A woosa Piyeer ne : « Fu yii, fu namɗi ɓaah ŋ taalubeeciŋ ƴaari e ? » A woosa ne : « Muk, ŋ ɓaahɗi nga. »

18 Ñaam ca na alkaateeca nikee ŋ ɗiska, ɓa ɓayee aañind, ɓa fuuɗta yongkaah, ɓa yohnukeeɗa sagu soosa. Piyeer nikka na ɓa, nameeɗa yohnuk.

19 Seeƴkiɗoha yakka meekissa Yeesu ŋ ini kaɗ ŋ taalubeeciŋ ɗe na jangɗohiŋ ɗe. 20 Yeesu loffa ɗe ne : « Ŋ woyee halang ŋ fiki ɓooɓi jen, ŋ jangɗoheeɗa ŋ sinaagog ci na Kahan Kooh, ɗisik ci Yawuut ci jen na cohe, te ŋ ɗasɗoheeɗi ali in ŋ in ci ŋ woye. 21 Kon wa ye tah fu meeksee so ? Meeksa ɓooɓi sikɗukee ini ŋ woo ; ɓeɗ, ɓa inhiɗ ini ŋ woo ɓa. »

22 Wa a woo ineem, ƴaar ŋ alkaateeca, ya nikee ŋ serooce, kunnda ɗe paɗ, woosa ɗe ne : « Fu na hee lofohe seeƴkiɗohi yakki an e ? » 23 Yeesu woosa ɗe ne : « Nik ne ini ŋ woo, wa ɗaa haa ɗah, seede'a. Te nik ne ini ŋ woo, wa ɗaa ɗah, wee tah fu laɓpa so ? » 24 Weɗ Hannas nakoh ne Yeesu ɓaysaat ŋ Kayif seeƴkiɗoha yakka*18:24 Hannas a yi nikee seeƴkiɗoha yakka, waaye e ɓi Rom nihsohee ɗe nga, tufkiɗta Kayif. Kon ŋ jamanoonaam, ɓa kanak jen, ɓa ɓeeɗkohsee seeƴkiɗoh yakak. na yaah ciŋ ɗe tokuuɗ.

25 Simong Piyeer risee ŋ ndaam yohnukeeɗa. Raakka ɓooɓa meekis ɗe ne : « Fu yii, fu namɗi ɓaah ŋ taalubeeciŋ ƴaari e ? » Piyeer taasukka an : « Muk, ŋ ɓaahɗi nga ɓa. » 26 Ƴaar, ɓaah ŋ ñaam caŋ seeƴkiɗoha yakka, nikee nga. A ɓaah na ƴaara Piyeer nguɗee nofaŋ ɗe, a woosa Piyeer ne : « Ŋ hotɗi ɗa hotɗi na ɗe ŋ ɗooƴ nguuka e ? » 27 Waaye Piyeer taaskissa. A reehiɗɗi woo, siika leehukka.

28 Yeesu kooɗohuusa kahan Kayif, a ɓayuusa kahan Pilaat goornoora. Wa nikee na ɓaaɓ-teel. Waam, ɓa sangee raak usuɓ ne wa hondohuu ɓa ñam kañam kaŋ Paaka ; weɗ tahee ɓa aaseeɗi ŋ ɗooƴ kahna†18:28 Yawuut ci meeɗɗi aas kahan ɓoyi nikɗi Yawuut. Ineem nikee usuɓ nga ɓa.. 29 Weɗ Pilaat puloh, kaɗta nga ɓa, a meekissa ɓa ne : « Ɗu na yambe ƴaarii ye ? » 30 Ɓa loffa ɗe ne : « A nikeeɗi tumoh moɗaaɗi ɗah, ɓoo heeɗi ɗa ɗe kome. »

31 Ŋ ineem Pilaat woosa ɓa ne : « Ɓayaat ɗe, ɗu atte'oot ɗe ŋ waasiŋ ɗu. » Ɓa loffa ɗe ne : « Ɗu ɓi ɓi Rom, ɗu onɗi ɓoo ne ɓoo ap ɓo'. » 32 Ineem raakka ne findi Yeesu woyee ne a kaanohan ɗaa, raak.

33 Pilaat dokkissa ŋ kahna, a ɓeeɗkiɗukka Yeesu, a woosa ɗe ne : « A fu buuriŋ Yawuut ci e ? » 34 Yeesu loffa ɗe ne « Wa woo kiŋ ɗa, wala e ɓi ɓo' woo ɗa wa nga so ? » 35 Pilaat woosa ɗe ne : « Mi i ? Ŋ Yawuut e ? Ɓooɓiŋ ɗa na kilifaaciŋ seeƴkiɗoh ci ɓeɗ ɓay ɗa nga so. Fu tum ye ? » 36 Yeesu loffa ɗe ne : « Nguuriŋ ngo nikɗi ŋ adinaanii. Nguuriŋ ngo nikeen ŋ adinaanii ɗah, surgaaciŋ ngo heen ndo hiñohɗe po ŋ degsuu ŋ yaah ciŋ kilifaaciŋ Yawuut ci. Mbaa Nguuriŋ ngo nikɗi ŋ kehƴi ndii. » 37 Pilaat woosa ɗe ne : « Kon fu buur e ? » Yeesu woosa ɗe ne : « Fu woo ne ŋ buur. Ini tah ho hay Adina, ŋ rimukka, weɗ ne ŋ seede keeh ki. Ɓo' nu ɓaah ŋ keeh ki ɗah na sikɗuke sikɗuk woo kiŋ ngo. » 38 Pilaat woosa ɗe ne : « Keeh ki weɗ ye ? »

Wi Pilaat woo ineem, a pulla, a dokkissa ŋ Yawuut ci, a woosa ɓa ne : « Mi, ŋ hotɗi ini ƴaarii tum in moɗaaɗi po a joyya apu. 39 Waaye, ɗu mbaahkohiɗ ne ŋ faɗsiɗ ɗu ɓo' yino, feet Paak nu ree ɗah ; ɗu waaɗiɗ ne ŋ faɗsiɗ ɗu buuriŋ Yawuut ci e ? » 40 Ɓa leehkisseeɗa an : « Muk ! Kinaa ɗe faɗis, faɗsiɗa ɓoo Barabaas. » Barabaas yeem nikee yoondɗoh kur.