Saafi-Saafi Macce 4

Seytaani jaɗɗiɗ Yeesu fiir

1 Ŋ ineem, Fuuɗsi Hoolohngaani, Fuuɗsiŋ Kooh ɓayya Yeesu ŋ nduufa, ne Seytaani jaɗiɗ ɗe fiir. 2 A orra noh ndaŋkiyaah-nikiis (40) na wek ndaŋkiyaah-nikiis (40) ; ŋ mirndaani a aɗukka. 3 Seytaani, yi na jaɗɗohe fiir, reɓpa woosa ɗe ne : « Nik ne fu Kuɓkiŋ Kooh ɗah, woya atoh cii, ca ɓoƴsuk mbuuru. » 4 Yeesu loffa ɗe ne : « Fiis ci Hooliɗ ci woyiɗ ne :

“ Ɓo' na pesohe mbuuru dong haa,

waaye na woo nu nik ne wa puloh ŋ nguɓiŋ Kooh ɗah.✡ ” »

5 Seytaani ɓayya ɗe Yerusalem, ŋ jol Kahnaŋ Kooh* ; 6 a woosa ɗe ne : « Nik ne fu Kuɓkiŋ Kooh ɗah, faɗsuka ŋ kehƴi. Fiis ci Hooliɗ ci woyiɗ ne :

“ Kooh hey nake malaakaaciŋ ɗe,

ca ɓay ɗa ŋ yaah ciŋ ca

po kot ciŋ ɗa laɓkanɗi ŋ atoh.✡ ” »

7 Yeesu loffa ɗe ne : « Fiis ci namiɗ woo ne : “ Fu joyɗi markisuk Heɗ ɓoo, Koohiŋ ɗa.✡ ” » 8 Seytaani rapɗissa ɗe ŋ jol tango njooloh na njooloh. A teeɓpa ɗe nguur ciŋ adinaani jen na yaki ca yak. 9 A woosa ɗe ne : « In cii jen, fu ƴekiɗ to ne fu ñaamuk ko ɗah, ŋ hey ɗa ca one. » 10 Yeesu loffa ɗe ne : « Seytaani, us so ! Fiis ci woyiɗ ne : “ Ƴekɗa Kooh Heɗ fu, te fu ñaamuk a yi dong.✡ ” » 11 Weɗ Seytaani faɗoh ɗe ndaam, jaarra malaakaaca hayya, taambkoheeɗa ɗe.

Yeesu cambiɗ pangkiŋ ɗe ŋ Galile

12 Ŋ jamanoonaam, Yahya Ɓoktohi ambseen ŋ kasoona ; wa Yeesu keraha, a kaɗta Galile. 13 A kurkohha Nasareet a kaɗta gena ŋ Kapernawum ŋ sero cookma, ŋ kehƴaŋ cuuɓ ciŋ Sabuloon na Naftaali. 14 Jaarra ini woosuuɗi Esayi woyee raakka, an :

15 « Kehƴiŋ Sabuloon na Naftaali,

wa nikka yaah-cookmi,

ŋ ɓakiŋ Yurdan winoori,

weɗ Galile, kur kiŋ ɓooɓi nikɗi Yawuut,

16 cuuɓi ɓoofee ŋ ñuusi hotiɗ siñaar yakak,

te ɓi ɓoofee ŋ kur ki kakaan ki ñuusiɗ,

siñaar hayiɗ nga ɓa.✡ »

17 Ini amboh ndeem, Yeesu cammba woytoh ɓooɓa ŋ ini kaɗ ŋ waas Kooh an : « Ɓoƴsohaat pesohaaɗ, Nguuriŋ-Ɗafki reɓiɗ. »

Yeesu ɓeeɗkiɗ ɓi seeɓoh

18 Wa raakka mbeh, Yeesu tiindeeɗa ŋ sereendaŋ Cookmaŋ-Galile, a hotta seeɓoh kanak mbaaleeɗa cuurund ŋ cookma, ɓa nikee Simong yi na woyse Piyeer na taambɗoh ce Andare. 19 A woosa ɓa ne : « Ñaakɗaat to, ŋ hey ɗu tume seeɓoh ɓo'. » 20 Ɓa jaarra faɗ mbaal caŋ ɓa ndaam, ɓa ñaakiɗta ɗe.

21 A kaɗissa ƴissuut, a hotissa taambɗoh kanak, Saak na Saaŋ, kuɓuuciŋ Sebede, a raak ɓa ŋ gaala na baab ɓa, ɓa haɓiɗtineeɗa mbaal caŋ ɓa. A ɓeeɗukka ɓa ne ɓa hun na ɗe. 22 Ɓa jaarra faɗ gaala na baab ɓa, ɓa ñaakiɗta ɗe.

Yeesu wirɗiɗ kosaayiɗ laayiɗ

23 Yeesu wileeɗa Galile jen a jangɗoheeɗa ŋ sinaagog† ca, a woyeeɗa Yegɗohiŋ Muci‡, wi kaɗ ŋ Nguuriŋ-Ɗafki, a wirɗeeɗa kosaay ca na ɓeenduk ca jen, ca ambee ɓooɓa. 24 Laamtohiŋ tiikiŋ ɗe willa kur kaŋ Siri jen. A komuusa ɓooɓa raakee miskiɗ jen sagu kosaay ca ambee ɓa, kosaay nu wa min nik ɗah, ɓa jiini§ ambe, ɓa raakee kombeɗ-mbeɗ na ɓa lafñe, a wiriɗta ɓa. 25 Mboolo laayiɗ ñaakiɗta ɗe, ɓooɓeem pulohee Galile, Dekapool*, Yerusalem, Yudee, na ɓaka faahaŋ Yurdan.

Macce
<
4
>

✡4:4 4:4 Rohƴiɗi 8:3

*4:5 4:5 Kahan Kooh : farañse na woyee wa "temple". Kahan Kooh wa nikee inaa yakiɗ. Wa nikee tuuƴ angiɗ na ɗisik ca wilee wa. Tuuƴa raakee ɓak kanak, saɓsohuuɗ na rido (Pula 26:33). Ŋ ɗooƴa ɗooƴa, weɗ teeksee Ɗiska Hoolohngaana ; a seeƴkiɗohi yakki dong meeɗ aas nga te wa meeɗ nik waas yino ŋ kiis ki (Lewiici 6). Ɓaki tas teeksee Ɗiska Hooliɗa. A seeƴkiɗohi joy panguk mbehiŋ ɗe dong (Luk 1:8-9) na aase nga ne a suus cuuraay (Pula 30), a fuuɗ laampa (Pula 27:20-21), a deg mbuuruuci (Pula 25:30). Raakka ɗiska wila te seeƴkiɗoh ci dong na nike nga ; seeƴkohaana nikee nga (Pula 40:6). Seeƴkohaaneem, weɗ dong ɓooɓa joye seeƴkoh. Kahniŋ Kooh weem, wa wa koc haɓɗu, wa nikee ɗiip. E Musaa haɓɗee wa. A marak ŋ wa Kooh teeɓee ɗe ŋ ɗafuk tangoora (Pula 26:30) po wiŋ kehƴi nikka ñaamaariŋ wa keeh-keeha nik ŋ Eel ci (Heber ci 8:5; Teeɓ ki 11:19). Wi Suleymaan hay, a taɓahhaa (1 Buur ci 5–6). Ɓi Babilon yahrohhaa (2 Nguur ci 36:19). Weɗi Israayel ci tufkiɗohisa (Esdaras 1–6). Gerek ci yahrohissaa. Buur, ŋ buur ci teeksee Herod, tufkiɗissaa (Saaŋ 2:20), weem, weɗ nikee Kahan Kooh ŋ jamanoonaŋ Yeesu. Ŋ jamanoonaam, ɗiska ƴaar ciŋ Israayel nike, weɗ wilee ɗiska seeƴkiɗoh ca nike. Aasohaanaŋ ɗiskeem weɗ ɗiska ɓitiɓ ca meeɗ nik. Ina wilee wa ɓak po ɓak weɗ nikee ɗiskaŋ ɓooɓa nikɗi Yawuut. Wa hannda wilɗu jameet na miir raakiɗ yahndeer ŋ ɓak ci nikiis ci jen.

✡4:6 4:6 Sabuur 91:11-12

✡4:7 4:7 Rohƴiɗi 6:16

✡4:10 4:10 Rohƴiɗi 6:13

✡4:16 4:16 Esayi 8:23–9:1

†4:23 4:23 sinaagog: taɓah ci Yawuut ci na cohohe ne ɓa ñaamuk Kooh nga te ɓa jangee waas Kooh nga. Ɓa namee ngel nga ne leeroh raakka nga ɓa ɗah.

‡4:23 4:23 Yegɗohiŋ Muci : weɗ "Lewañsili" wala "Injil". Ɓoo toksoh woo keem ɗaa ŋ saafi-saafi.

§4:24 4:24 jiini : findi Fiis ci Hooliɗ ci jangɗohoha, feruuɗ ci minɗi hotu jen, ca nikee malaaka wa ca na ferse. Cum nga bakaaɗta, ca njafuusa ŋ kehƴi. Ceem, ceɗ ɓoo tokis "jiini". E Seytaani kilifaaniŋ ca. Marka teerndiŋ Camba 1:31; Esekiyeel 28:11-19; Maarko 3:20-30; Luk 10:17-20; Teeɓ ki 12:3-12.

*4:25 4:25 Dekapool : wa nikee kur-taah ndaŋkiyaah nangɗukohiɗ. Ɓooɓi genee nga, ɓa nikee Yawuut haa, ɓa taambɗeeɗi waasiŋ Musaa.