8
Yeesu hoolɗiɗ ɓo' kosaayiɗ
1 Wa Yeesu ruhsee tangoora, mboolo laayiɗ ñaakiɗta ɗe. 2 Wa raakeen ƴaar, a kosaayee kosaay ki na oɓse faan*8:2 kosaay ki na oɓse faan : ŋ Yawuut ca, ɓo' nu raakeen kosaay kii ɗah, a meeɗ ambohu ɓo' hoolaaɗi. (Lewiici 13–14) Weɗ tah po a meeɗɗi reɓ ɓooɓa, a meeɗɗi reɓ Kahan Kooh., a hayya ŋ Yeesu, a ƴekka ŋ fikiice, a kiimmba ɗe ne : « Kilifaani, fu waaɗa ɗah, fu miniɗ to saɓsoh na kosaay kii po ŋ nik ɓo' hooliɗ. » 3 Yeesu raɗissa yaah, laalla ɗe, woosa ɗe ne : « Ŋ waaɗiɗa, nika ɓo' hooliɗ. » Jaarra kosaay ka hoolla nga ɗe. 4 Ƴutta Yeesu woosa ɗe ne : « Wortukaa wa woo ali ɓo' waaye kaɗa fu teeɓa haf fu seeƴkiɗoha, fu haɓiɗ seeƴki waasiŋMusaa nakoh✡8:4 Lewiici 14:1-32 ; wa teeɓoh ne fu wiriɗ. »
Yeesu wirɗiɗ surgaanaŋ ƴaara adgohee soldaar ca
5 Yeesu a yi kaɗoh po a aassa kur kaŋ Kapernawum, weɗi ƴaar ɓaah ŋ ɓa adgohee soldaar caŋ Rom†8:5 Rom : weɗ kur ki degee yaah Israayel na ɓak laayiɗ ŋ Adina. Waaye ŋ Israayel raakeen ɓi buur ɓi meeɗ ɓeeɗku Herod ; buur ceem gaƴkee ŋ buura yakkaŋ Rom. reɓoh nga ɗe, kiimmba ɗe keeh-keeh 6 an : « Kilifaani, ñaamaŋ ngo yaa faanukka ŋ kahna, cir ciŋ faaniŋ ɗe ceɗ lafañ a yaa sayeeɗa say. » 7 Yeesu loffa ɗe ne : « Ŋ hey ɗe hee wirɗe. »
8 Ƴaara adgohee soldaar ca loffa ne : « Kilifaani, ŋ yeyyooɗi fu aas ŋ kahan ndo ; woya woo rek ñaamaŋ ngo hey wire ! 9 Laam mi ŋ haf fo, raakiɗ ɓooɓi adgoh ho te ŋ namiɗ raak soldaar ci ŋ adgoh ; yaa nu ŋ woo ne : “ Kaɗa ” ɗah, a kaɗ, yaa nu ŋ woo ne : “ Haya ” ɗah, a hay. Te in nu ŋ woo ñaamiŋ ngo ne a haɓɗaata ɗah, a haɓiɗa. »
10 Wa Yeesu kerah woo keem, a feyuusa, a woosa ɓa ñaakɗee ɗe ne : « Ñam na woyee ɗu wa te wa keeh : Ŋ hotɗi ali ɓo' kosiɗ kosii ngaŋ Israayel jen ! 11 Ñam na woyee ɗu wa, ɓo' laayiɗ hey pulohe ŋ ɓak ci jen, ɓa ɓoof na Ibrahiima, Isaahha na Yaŋhooɓa, ɓa ñamee kañam ka yakka ŋ Nguuraŋ ɗafka. 12 Waaye ɓi joyee aas ŋ Nguuri, hey njafse ŋ ñuusaŋ hara, ɗiska fuɗ na ɗoɓɗoh sis raak. »
13 Ƴutta Yeesu woosa ƴaara adgohee soldaar ca ne : « Kaɗa, wa raakohaat ɗaa findi fu kosoha. » Te ŋ jamanoonaam jok, surgaanaŋ ɗe wirra.
Yeesu wirɗiɗ ɓo' laayiɗ
14 Wa Yeesu kurkoh ndaam, a kaɗta kahan ɓi Piyeer, wa a ree, a tel yaayiŋ ɓiti Piyeer jiriɗ po faankiɗ, a faaniŋ ɗe weɗ dohe. 15 Yeesu laalla yaahiŋ ɗe, dohɗaŋ faana saɓsukohha na ɗe ; jaarra a kurukka a taambkoheeɗa Yeesu. 16 Wa niina ree, a komuusa ɓo' laayiɗ ɓa jiini ambe. A aannja jiiniica na woo kiŋ ɗe, a wiriɗta kosaayiɗ ca ɓinooɓa jen. 17 Ina woosuuɗi Esayi woyee wii raakka :
« A kooɗiɗ in ci ɓoo miskasse,
a degukka kosaay ciŋ ɓoo.✡8:17 Esayi 53:4 »
Yeesu na ƴaaɓa waaɗee ɗe ñaakiɗ
18 Wa Yeesu hot mboolnda ndeeree ɗe, a woosa taalubeeciŋ ɗe ne ɓa kaɗ ɓaka faahaŋ cookma. 19 Weɗi ƴaar ɓaah ŋ jangɗohoh caŋ waasiŋ Musaa hayoh nga ɗe woosa ɗe ne : « Jangɗohohi, ɗisik nu fu kaɗ ɗah, ŋ hey ɗa ñaakɗe. » 20 Yeesu loffa ɗe ne : « Ɓaakoɓ ci raakiɗ nung, sel ci raakiɗ taar, waaye Kuɓkiŋ ɓoyi‡8:20 Kuɓkiŋ ɓoyi : wa tiiki Yeesu ferɗee haf ce. Tiikeem uup reɓ ini fiisu ŋ teerndiŋ Dañeel 7:9-14. Wa fiisu nga ne, wa in hayɗohee woosuuɗi Dañeel findi heeƴ, an a hot "kuɓu ɓo' " hayeeɗa ŋ eel ciŋ Asamaan, a hayya po ɓoofohaaniŋ Kooh, yi buur. Yeesu ŋ haf ce woyiɗ ŋ teerndiŋ Dañeel 7:9-14 wa a woyee woo-woosuuɗ ŋ ini kaɗ ŋ in ci na haye ŋ fikiiri ngaŋ teerndiŋ Macce 24:30 na teerndiŋ Maarko 13:24. A namiɗ woo nga wa a tufuk ŋ fiki atte'oh ca ngaŋ teerndiŋ Macce 26:64 na teerndiŋ Maarko 14:62. raakɗi sah ɗiski a na hee iɗsiɗkohe. » 21 Ƴaar wiiriis ŋ taalubeeciŋ ɗe woosa ɗe ne : « Kilifaani, on ndo paaɗ, ŋ taambkoh yaɓkooriŋ ngo po a kaan, ŋ uumb ɗe. » 22 Yeesu loffa ɗe ne : « Ñaakiɗ to te fu faɗ kaaniɗ ci ɓa uumb kaaniɗ ciŋ ɓa. »
Yeesu yeeɓkiɗiɗ puuɗsa na cookma
23 Wa Yeesu ƴut woo na ɓa, a aassa ŋ gaal, taalubeeciŋ ɗe ñaakiɗta ɗe. 24 Ŋ cookma, ɗekka po puuɗis yakak raakka ɓa nga po ginaah ca riifɗeeɗa gaala, wa raak Yeesu neeheeɗa. 25 Taalubeeci reɓpa nga ɗe, ɓa yunnda ɗe na leehuk an : « Kilifaani, mucɗa ɓoo, ɓoo ɓii kaan ! » 26 A woosa ɓa ne : « Kosi ɗu kos ƴissuutiɗ, wa ye tah ɗu neek ? » Weɗ a kurkoh, a ngassa puuɗsa na cookma, ɗiska eennda teɗ. 27 Ɓa feyuusa, ɓa woyeeɗa ne : « Ƴaarii, a ɓo' ye po puuɗsi na cookmi sah kerhiɗee ɗe ? »
Yeesu wirɗiɗ ƴaaɓa jiiniica ambe
28 Wa Yeesu na taalubeeciŋ ɗe ree ɓaka faahaŋ Cookmaŋ-Galile, ŋ kur caŋ Gadareen ca, ƴaar kanak ɓa fu inah ne ca jiini ambee ɓa, ɓa pulohha ɗiska ɓa nikee ŋ ruy-ruy ca, ɓa kaɗta coha na ɗe. Ɓa nikee añaandoh na añaandoh, ali ɓo' meeɗɗi kaañ taamb ndeem. 29 Ɓa leehkeeɗa an : « Fu waaɗ ɓoo ye tum Kuɓkiŋ Kooh ? Fu hay ne fu torhiɗ ɓoo bala jamanooniŋ wa reyan e ? »
30 Raak gat mbaam-huk yakak ñameeɗa ŋ ndaam, wa usoheen na ɓa ƴissuut. 31 Jiiniica kiimmba Yeesu keeh-keeh an : « Ɓoo inhiɗ ne fu hey ɓoo aañe, ona ɓoo, ɓoo aas ŋ gataŋ mbaam-huk ceen. » 32 A woosa ca ne : « Kaɗaat ! » Weɗ ca puloh ŋ ƴaaɓa, ca aassa ŋ mbaam ca. Gata jen giirukka, hunnda na mbartala, faɗsukka ŋ cookma, mbaam ca kaannda ŋ masma.
33 Ɓooɓa niiɗee ca nuppa, kaɗta woya ini raak jen ŋ kur-taaha, na ini rahas ƴaaɓa jiiniica ambe. 34 Ɓooɓaŋ kur-taaha jen pulla, hayya ŋ Yeesu ; wa ɓa hot ɗe, ɓa kiimmba ɗe keeh-keeh ne a pulaat kur caŋ ɓa.
*8:2 8:2 kosaay ki na oɓse faan : ŋ Yawuut ca, ɓo' nu raakeen kosaay kii ɗah, a meeɗ ambohu ɓo' hoolaaɗi. (Lewiici 13–14) Weɗ tah po a meeɗɗi reɓ ɓooɓa, a meeɗɗi reɓ Kahan Kooh.
✡8:4 8:4 Lewiici 14:1-32
†8:5 8:5 Rom : weɗ kur ki degee yaah Israayel na ɓak laayiɗ ŋ Adina. Waaye ŋ Israayel raakeen ɓi buur ɓi meeɗ ɓeeɗku Herod ; buur ceem gaƴkee ŋ buura yakkaŋ Rom.
✡8:17 8:17 Esayi 53:4
‡8:20 8:20 Kuɓkiŋ ɓoyi : wa tiiki Yeesu ferɗee haf ce. Tiikeem uup reɓ ini fiisu ŋ teerndiŋ Dañeel 7:9-14. Wa fiisu nga ne, wa in hayɗohee woosuuɗi Dañeel findi heeƴ, an a hot "kuɓu ɓo' " hayeeɗa ŋ eel ciŋ Asamaan, a hayya po ɓoofohaaniŋ Kooh, yi buur. Yeesu ŋ haf ce woyiɗ ŋ teerndiŋ Dañeel 7:9-14 wa a woyee woo-woosuuɗ ŋ ini kaɗ ŋ in ci na haye ŋ fikiiri ngaŋ teerndiŋ Macce 24:30 na teerndiŋ Maarko 13:24. A namiɗ woo nga wa a tufuk ŋ fiki atte'oh ca ngaŋ teerndiŋ Macce 26:64 na teerndiŋ Maarko 14:62.