15
Naamooci yasna-kanak ci mirndoh
1 Ŋ hotissa mandarga wiiriis yakiɗ feyohiɗ ŋ Eel ci : Malaaka yasna-kanak ɓayiɗ naamooci yasna-kanak ci mirndoh, laam ayrukiŋ Kooh mitoh nga ca.
2 Ŋ nammba hot in mand na cookom haa weer ambsukohiɗ na yongkaah. Ɓooɓi saah ɗoopti na nataaliŋ ɗe te ɓa teyɗukɗi kindi hend na tiikiŋ ɗe, tufukka ŋ ɗafuk cookmaŋ weera, ɓa ammba kooraaca Kooh eɗee ɓa ŋ yaah. 3 Ɓa ƴeekeeɗa ƴeekiŋ Musaa, ñaamiŋ Kooh, na ƴeekiŋ Kuyiŋ Mbaali ƴini an :
« Heɗ ɓoo Kooh Heɗ-hatil,
in ci fu haɓiɗ yakiɗ,
ca feyohiɗ !
Buuriŋ cuuɓ ci,
tumohaaɗ ciŋ ɗa yurhiɗ,
ca lakiɗ waas !
4 Ya ɓa kaañ ɗa nik
neekaaɗi, Heɗi ?
Ya ɓa sangan yakiɗ tiikiŋ ɗa ?
A fu dong hool.
Cuuɓ ci jen hey ɗa hee ƴekɗe
ne ɓa ñaamuk ɗa,
ɓa hotiɗ hooliɗ
in ci yurhiɗ ci fu tum. »
5 Ŋ finho ineem, ŋ nammba hot ŋ Eel ci, Ɗiski Hoolohngaani ŋ ɗooƴ ɗiipi na teeɓohe Ambtiɗohi. Ŋ hottaa rangsukiɗ. 6 Malaakaaci yasna-kanak ci ambee naamooci yasna-kanak ci pulohha nga ; ca ɓekkee kulɓa leeŋ hooliɗ, melciɗ, ca tokukka seentur urus ŋ fisa.
7 Yino ŋ pesiɗ ca nikiis ca eɗta malaakaaci yasna-kanak ci kaas urus yasna-kanak riifiɗ na ayrukiŋ Koohi na pese po faw. 8 Ɗiska hoolohngaana riiffa na ɗuuku, sagu kiyak ki na hatiliŋ Kooh. Ali ɓo' mineeɗi aas ŋ ɗiska po findi naamooci yasna-kanak ci malaakaaci yasna-kanak ci ɓayee mitoh.