18
Keeniŋ Babilon
1 Ŋ finho ineem, ŋ hotta malaaka wiiriis ruhsoheeɗa ŋ Eel ci. A raakee hatil keeh-keeh, yaki a yak siñaarɗeeɗa ŋ kehƴi jen. 2 A leehkeeɗa ŋ ɗafka an :
« Wa keeniɗ ! Wa keeniɗ !
Babilon kur-taahi yakki keeniɗ !
Wa genohaaniŋ jiiniici kotii,
ɗiski ca ɗasɗuk na hoolaaɗiiki ca hoolaaɗi.
Wa genohaaniŋ sel ci hoolɗi ñamu
[na ɗoopaat ci hoolɗi ñamu*18:2 ɗoopaat hooliɗ : a yi ɗoopti min seeƴkohu te a minnda ñamu ngaŋ Heber ci.]
te ca siɓuusa.
3 Laam weɗ meeɗ laariɗ kur ci jen
na biiñiŋ wa, weɗ faankohiŋ wa mbalayi.
Buur ciŋ Adina faankiɗa,
te toonoh ci kooɗohiɗ raak-raak nga
sagu waaɗa wa waaɗee
toon ciŋ ɓa moɗiɗ ci. »
4 Ŋ kerhissa hooso wiiriis puloh Eel ci woyeeɗa ne :
« Pulaat nga, ɓooɓiŋ ngo !
Ɗu ɓaahuu naa bakaaɗ ciŋ wa,
ɗu ɓaahuu ŋ naamooci rahsana.
5 Laam bakaaɗ ciŋ wa
degsukohiɗ po ŋ Eel ci
te Kooh alɗi tumohaaɗ ciŋ wa sepƴiɗ ci.
6 Tumaata
findi wa tumee ɓinooɓi,
wirndaata waas kanak
ini wa tum.
Yiifɗaata ŋ kaasiŋ wa
anaahi uup aay waas kanak
anaahi wa anɗukohee ɓinooɓi.
7 Tumaata miskiɗ, kur keem nikaat ŋ ruy
po ruyiŋ wa hend na yaksiɗkiŋ wa
na waaɗi wa waaɗee in ci moɗiɗ ci.
Kur keem woo ŋ haf wa ne :
“ Ŋ ɓoofiɗ findi buur ɓitiɓ,
ŋ ɓitɓi ƴaar ce kaan haa
te ŋ moosanɗi rooy ƴaar. ”
8 Sagu ineem,
naamooci wa ɗaakɗu
hey keene nga ŋ neeh yino dong :
Ca nikka kakaan na rooy na aɗ,
te yongkaah hey wa ɗumbe.
Laam Kooh Heɗ ɓoo
yi attee wa
raakiɗ hatil. »
9 Buur ciŋ kehƴi ɓaahee na ɗe toonki a toonkee na in ciŋ ɗe moɗiɗ ci, hey fuɗe, ɓa miskiɗuk ini kaɗ nga ɗe, ne ɓa hot ɗuukriŋ kur-taahi kaɓee ɗah. 10 Ɓa hey cangtiɗke sagu neƴƴoh mbugali a mbugalsan, ɓa woyee ne :
« Mas ! Mas waay !
Babilon, kur-taahi yakki, heɗ hatili !
Fu atte'uuɗ
ŋ wahtu yino dong ! »
11 Toonoh ciŋ adinaani heya name fuɗ, ɓa miskiɗuka ; laam ali ɓo' romissanɗi toon ciŋ ɓa. 12 Findi urus, haalis, peme, per ; piis leeŋ eɗfiɗ moɗiɗ, piis ruumind eɗfiɗ, piis suwa, piis ruumind coy ; hangi yooɓaaɗiini raaku, in haɓɗohuuɗ sis cooh wala hang ɗoɓiɗ, moos, tiwiñ wala atoh moɗiɗ. 13 Ali ɓo' romissanɗi safɗohaaci na eeñɗohaaci, cuuraay, miir†18:13 miir: wa cuuraay, wa na fuuɗseeɗi. Wa na woyse "myrrhe" ŋ farañse., laackoloñ ; biiñ, diw, fariñ, bele ; inoh, mbaal, panis, wotiir, po ñaam sah, kipes ɓo'. 14 Toonoh ci hey woye ne :
« Ey !
In ci baahiɗ ci fu maɗee jen,
fusiɗ ɗa ;
raak-raak ceem
na in ci moɗiɗ ceem jen,
fu ñakiɗ ca
te ca rahsissassanɗi muk. »
15 Toonoh ci raakoh nga ɗe, hey cangtiɗke sagu neƴƴoh mbugaliŋ ɗe. Ɓa hey fuɗe, ɓa miskiɗke. 16 Ɓa woyee ne :
« Mas ! Mas waay !
Kur-taahi yakki !
Wa nikee ɓekkiɗ
kulɓa leeŋ eɗfiɗ moɗiɗ,
na piis ruumind eɗfiɗ na ruumind coy
na tokkaah urus na per na peme.
17 Ŋ wahtu yino dong
raak-raakeem jen sooƴiɗ ! »
Ɓi adgoh batooci na ɓi na ɓaaɓe nga ca, na ɓi pangkee ŋ cookmi na ɓi na pesohee wa jen, nikee cangtiɗkiɗ. 18 Wi ɓa hot ɗuukriŋ dohiŋ kur-taahi, ɓa leehkeeɗa an : « Ali kur-taah moosɗi hend na kur kii yak ! » 19 Ɓa yiifkeeɗa merhey ŋ haf, ɓa fuɗeeɗa, ɓa miskiɗkeeɗa, ɓa rooyeeɗa an :
« Mas ! Mas waay,
kur-taahi yakki !
Heɗ batoociŋ cookmi jen
raakoh ŋ raak-raakiŋ ɗe.
Ŋ wahtu yino dong,
wa sañuuɗ ! »
20 Eel ci, neɓsiɗkaat ŋ ɗumbuukiŋ wa ! Neɓsiɗkaat ɓo'-Kooh ci, na Apootar ci na woosuuɗ ci ! Kooh atte'iɗa a wikkaa miskiɗi wa tum ɗu !
21 Ŋ ineem malaaka raakiɗ hatil ɓayya atoh yakak mand na oɗoha bele, a njaffaa ŋ cookma, a woosa ne :
« Babilon kur-taahi yakki
njafohsan na doole an,
te ali ɓo' hotissanɗaa muk !
22 Koora'oh ci na ƴeekoh ci,
mbiiɓoh ci na kulɓoh ci
kerhissassanɗi nga ɗa.
Ali pangkoh na yaah
hotkissanɗi nga ɗa ;
ɗuuɗ oɗoha
kerhissassanɗi nga ɗa ;
23 siñaariŋ laampaaci
melcissanɗi muk nga ɗa ;
hooso kilook na ƴaar ce
kerhissassanɗi nga ɗa.
Laam e toonoh ciŋ ɗa
degee yaah ŋ kehƴi
te luhus ciŋ ɗa tahiɗ po
ɓooɓi jen kosiɗ lee ciŋ ɗa.
24 Ɓaat nga woosuuɗ ci,
na ɓo'-Kooh ci
na ɓi boomu ŋ kehƴi jen,
ñif miŋ ɓa hotuuɗ
aamkeeɗa nga ɗa. »