22
1 Malaakaani taalndiɗta, a teeɓpa so kaliŋ masmi na eɗohe kipes ; wa melciɗee findi weer, wa puloheeɗa ɓoofoha-buuri, wiŋ Kooh na Kuyiŋ Mbaali ƴini. 2 Wa kaɗɗeeɗa ŋ leerniŋ mbeeddaaniŋ kur ki. Kidgiŋ kipes ki paarra ŋ harmban salɗoh ciŋ wa*22:2 "Kidgiŋ kipes ki paarra ŋ harmban salɗoh ciŋ wa" : ini gerek woo ndii, wa namiɗ min tokis ne : "Kidig ciŋ kipes ki paarra ŋ sereeciŋ wa kanak ci.". Wa rimee waas ndaŋkiyaah na kanak (12) ŋ kiis ki, caɓin nu caɓin wa rim, saaf ciŋ wa paƴoha cuuɓ ci.
3 In alkuuɗ raakissanɗi. Ɓoofoha-buuri Kooh na Kuyiŋ Mbaali ƴini ɓoofohan, hey nike ŋ kur ki, te ñaam ciŋ ɗe ñaamkee ɗe ; 4 ɓa hotee fikiiriŋ ɗe te tiikiŋ ɗe nik ŋ puk ciŋ ɓa.
5 Wek raakissanɗi, ali ɓo' etohissanɗi noh wala siñaar laampa. Laam Kooh Heɗi hey siñaarɗe nga ɓa, te ɓaa hee hey nike buur po faw.
Hayiŋ Yeesu
6 Ƴutta, malaakaani woosa so ne : « Woo cii wooriɗ te ca keeh. Kooh Heɗi, yi tum Fuuɗsiŋ ɗe ŋ woosuuɗ ci, a yi woos malaakaaniŋ ɗe ne a teeɓ ñaam ciŋ ɗe ini raakan te wa maañisɗi. »
7 Yeesu woo ne : « Marka, mi yii hay maañaaɗi ! A neɓɗiɗ, ɓoyi amban woo-woosuuɗ ci nik ŋ teerndii. »
8 Mi yi Saaŋ, ñam hot, ŋ kerahha in cii jen. Wi malaakaani ƴut to teeɓ in ci ŋ kerah te ŋ hotta ca, ŋ keennda ŋ kot ciŋ ɗe ne ŋ ñaamuk ɗe. 9 Waaye, a woosa so ne : « Muk ka wa tum ! Ŋ ñaam findiifu na taambɗoh ciŋ ɗa, woosuuɗ ci na ɓi amb woo ciŋ teerndii ; ñaamka Kooh dong ! »
10 A woyissa so ne : « Kina ɗasiɗ woo-woosuuɗ ci fiisu ŋ teerndii, laam jamanooni ca joy raakoh reɓiɗ ! » 11 Ɓoyi yurhaaɗiini risaat yurhaaɗi, ɓoyi hoolaaɗiini taalndiɗaat na hoolaaɗiikiŋ ɗe ; yi yurah taalndiɗaat tumisse in yurhiɗ, yi hool wuu Kooh ŋoɗaat ŋ hool kiŋ ɗe.
12 Yeesu woo ne : « Markaat, mi yii hay maañaaɗi te ŋ hey ɓayndohe ini ŋ wirndohan, ɓo' nu nga ɗah ŋ eɗ ɗe in hend na tumohaaɗ ciŋ ɗe. 13 Ñam Alfa na Omega, yi koc na yi mirndoh, cambohaani na reehɗohaani.
14 Ɓa neɓɗiɗ, ɓooɓi naaw kulɓaaciŋ ɓa, ɓa hey mine ñam ŋ rimiŋ kidgiŋ kipes ki, te ɓa hey taambe ŋ yahndeer ci, ɓa aas kur-taahi. 15 Waaye ɓo' cii ɓa nikan ŋ hara : ɓi na tume in ɓuu, na ɓi na naahe, na ɓi na faankohe faankoh sangohuuɗ, na apoh ɓo' ci, na ñaamkoh kooh ci nikaaɗiici, na ɓi waaɗ lee te ɓa leye !
16 Mi, Yeesu, ŋ woosiɗ malaakaaniŋ ngo ne a inhiɗ ɗu in ceem jen wuu Janguuci. Ñam kifsoh ŋ niiriŋ Dawuuda, ñam mbeedi, hori na melciɗe na ɓaaɓ. »
17 Fuuɗsiŋ Kooh
na kilookiŋ Kuyiŋ Mbaali ƴini
woo ne : « Haya ! »
Te ɓo' nu kerah woo kii ɗah
a woyaat ne : « Haya ! »
Ɓo' nu sifaɗuk ɗah, a hayaat !
Ɓo' nu waaɗ ŋ masmiŋ kipes ki ɗah,
a ɓayaat, wa raakɗi wirind.
18 Ɓoyi na sikɗuke woo ci puloh ŋ Kooh te ca fiisuusa ŋ teerndii, mi yi Saaŋ ñam na woyee ɗa ne : « Yaa nu ɓaat in nga ɗah, Kooh hey ɗe raane naamooci woyu ŋ teerndii ! 19 Te yaa nu nihis in ŋ woo-woosuuɗ ci fiisu ŋ teerndii ɗah, Kooh hey nihse ɓakiŋ ɓoyeem ŋ in ci woyu nga : ɓakiŋ ɗe ŋ rim ciŋ kidgiŋ kipes ki na ɓakiŋ ɗe ŋ kur-taahi hooliɗi ! »
20 Seedeeni ndengiɗ in cii, woo ne : « Ee, mi yii hay maañaaɗi ! »
Amiin ! Haya Heɗ ɓoo Yeesu !
21 Baahohiŋ Yeesu Heɗi nikaat na ɗu jen !
*22:2 22:2 "Kidgiŋ kipes ki paarra ŋ harmban salɗoh ciŋ wa" : ini gerek woo ndii, wa namiɗ min tokis ne : "Kidig ciŋ kipes ki paarra ŋ sereeciŋ wa kanak ci."