10
1 Ɓaah ciŋ ngo kosiɗ ci, ini ŋ waaɗiɗ cuuɓiŋ Israayel ŋ keeñiŋ ngo na ini mi na kiimɗee ɓa Kooh, weɗ ne ɓa muc. 2 Mi yii seede'iɗ ɓa ne ɓa sawriɗ lool ŋ pangkiɗ Kooh, waaye wa hunɗi na ki'inah. 3 Ñak inah kiyurhi puloh ŋ Kooh, na waaɗ tufkiɗoot kiyurhiŋ ɓa haf ɓa, weɗ tah po ɓa teyɗukɗi kiyurhi puloh ŋ Kooh.
4 WaasiŋMusaa mitoh ŋ Kiristaani. Ineem weɗ tah yaa nu kos ɗah raak kiyurah.
Yaa nu kos ɗah hey mucɗasse
5 Musaa fiisiɗ ŋ ini kaɗ ŋ kiyurhi puloh ŋ nakoh ci ne : « Yaa nu taambiɗ in cii ɗah, ceɗ a pesohan.✡10:5 Lewiici 18:5 » 6 Waaye ɓooɓi onu kiyurah taamboh ŋ kosi ɓa kos woo in wiiriis, an : « Kina woo ŋ ɗooƴ fu ne : Ya ɓa rapan ŋ Asamaan ? » Woo keem waaɗ woo ne : Ya ɓa rapan ne a ruhsiɗ Kiristaani. 7 Ɓa nam woo ne : « Kina woo ŋ ɗooƴ fu ne : Ya ɓa ruhsan ŋ nunga topaaɗiina ? » Woo keem waaɗ woo ne : Ya ɓa ruhsan ne a puliɗ Kiristaani ŋ kaaniɗ ca. 8 Kon ɓooɓeem woo inii : « Woo ki weɗi ŋ seroofu, weɗi ŋ nguɓiŋ ɗa, weɗi ŋ ɗooƴ keeñiŋ ɗa. » - Woo keem weɗ woo ki ŋ ini kaɗ ŋ kosi, wi ɓoo na yegɗohe*10:8 Ŋ aayaacii, ini kooɗoh aaya 6 po 8, Pool na woye ŋ ini fiisu ŋ teerndiŋ Rohƴiɗi 9:4, a ambsoha na teerndiŋ Rohƴiɗi 30:11-14, a nammbaa ambsohis na ini kaɗ ŋ Yegɗohiŋ Muci. Wa nikee woyohaaɗ ŋ jamanoonaam..
9 Laam fu woo na nguɓiŋ ɗa ŋ fiki ɓooɓi ne Yeesu a yi Heɗi, te fu kos ŋ keeñiŋ ɗa ne Kooh hultiɗiɗ ɗe ɗah, fu hey mucɗasse. 10 Keeñ weɗ na kose, wa tum ɗa ɓo' yurhiɗ, te nguɓ weɗ na woye, wa ɓay ɗa ŋ muc. 11 Fiis ci ceɗ woo ne : « Yaa nu taɓah kosiŋ ɗa nga ɗe ɗah, fu kaci'anɗi.✡10:11 Esayi 28:16 »
Wa ye hondoh Yawuut ci kos Kiristaani ?
12 Ɓooɓi jen ɓeɗ hend ŋ fiki Kooh, wa Yawuut haa, wa nikaaɗi Yawuut haa, ɓa jen ɓeɗ ɓaah Heɗ, te Heɗ ɓa, yaa nu ɓeeɗuk ɗe ne a naaf ɗa ɗah, a baahoh ɗa ŋ raak-raakiŋ ɗe. 13 Laam wa fiisuuɗ ne : « Yaa nu ɓeeɗuk Heɗi ɗah, a hey mucɗasse.✡10:13 Yowel 3:5 »
14 Waaye ɓa ɓeeɗkohee ɗah, raakee ɓa kosiɗ haa e ? Te ɓa kos ɗah, raakee ɓa kerhiɗ yegɗohiŋ Yi ɓa kos. Te ɓa kerah yegɗoh ɗah, raakee a ɓo' woo ɓa wa. 15 Te ɓo' woo ɓa wa ɗah, raakee ɗe woosu woosu. Findi Fiis ci woyoha an : « Cey, kot ci ɓa tiind moɗiɗ, ɓi hay na yegɗoh neɓiɗ !✡10:15 Esayi 52:7 »
16 Waaye ɓi kerah yegɗoheem, e ɓeɗ jen na tume ini wa woo haa, findi woosuuɗi Esayi woyohee wa ne : « Heɗi, yaa kos yegɗohiŋ ɓoo ?✡10:16 Esayi 53:1 » 17 Kon, kos na pulohe ŋ ini kerhu, te ini kerhu na pulohe ŋ yegɗohi kaɗ ŋ Kiristaani. 18 Waaye mi na meeksohe : Ɓi Israayel kerahɗi kerahɗi e ? Aha'kay ! Fiis ci woyiɗ ne :
« Hoosoociŋ ɓa kerhuuɗ ŋ kehƴi jen,
woo ciŋ ɓa kaɗiɗ po ŋ ɗisik ca uup us ŋ Adina !✡10:18 Sabuur 19:5 »
19 Waaye mi na meeksohe : Ɓa inahɗi inahɗi ini woyu e ? Aha'kay ! Ŋ ineem, Musaa, a yi koc woo ne Kooh woo an :
« Ŋ hey ɗu tahe siis ɓi nikɗi cuuɓ ;
ŋ tah ɗu ayruk cuuɓ ñaañaaɗi.✡10:19 Rohƴiɗi 32:21 »
20 Woosuuɗi Esayi kaannja po a woosa ini Kooh woo, an :
« Ɓi waakeeɗi so, mirndohiɗ to hot,
ɓi meeksohɗi so, mirndohha so inah.✡10:20 Esayi 65:1 »
21 Waaye ini kaɗ ŋ Israayel, a woo ne :
« Ŋ hooɓuk raɗis yaah ne ŋ morgiɗuk
ɓi kerhiɗɗi so, ɓi na taasee so.✡10:21 Esayi 65:2 »
✡10:5 10:5 Lewiici 18:5
*10:8 10:8 Ŋ aayaacii, ini kooɗoh aaya 6 po 8, Pool na woye ŋ ini fiisu ŋ teerndiŋ Rohƴiɗi 9:4, a ambsoha na teerndiŋ Rohƴiɗi 30:11-14, a nammbaa ambsohis na ini kaɗ ŋ Yegɗohiŋ Muci. Wa nikee woyohaaɗ ŋ jamanoonaam.
✡10:11 10:11 Esayi 28:16
✡10:13 10:13 Yowel 3:5
✡10:15 10:15 Esayi 52:7
✡10:16 10:16 Esayi 53:1
✡10:18 10:18 Sabuur 19:5
✡10:19 10:19 Rohƴiɗi 32:21
✡10:20 10:20 Esayi 65:1
✡10:21 10:21 Esayi 65:2