15
Faɗ ini neɓ ɗa, tum ini neɓ morom fu
1 Ɓoo ɓi ndeng ŋ kosi, ɓoo joyiɗ muñiɗ ɓi kosiŋ ɓa ndengɗi, te ɓoo taambɗuu ini neɓ ɓoo. 2 Yaa nu nga ɓoo ɗah, tumaat ini neɓ morom ce, a tumɗe yeem ini baah nga ɗe, wi kaɗɗan ɗe fiki ŋ kosiŋ ɗe. 3 Kiristaani sah tumɗi ini neɓ ɗe ; waaye findi Fiis ci woyoha an : « Ɓasoh ci ɓa na ɓasee ɗa jen, ca miskiɗ to.✡15:3 Sabuur 69:10 »
4 Fiis ci fiisu ɗeɓgaan jen, ca fiisu ne ca jangiɗ ɓoo, ne ɓoo taamboh ŋ muñ na ñaahi Fiis ci na ñaahe ɓoo, ɓoo ooluk in ci na haye. 5 Kooh yi Heɗ muñ na ñaahoh onaat ɗu, ɗu nik yino, findi Kiristaani Yeesu waaɗoha, 6 ne ɗu hun jen ŋ hooso yino, ɗu yakɗee Koohiŋ Heɗ ɓoo Yeesu Kiristaa, yi nam nik Baabiŋ ɗe !
Kiristaani hayiɗ wuu Yawuut ci na ɓi nikɗi Yawuut
7 Mbaa, yaa nu nga teyɗukaat morom ce findi Kiristaani teyɗukoh ɗu. Tumohaat ɗaa, ɗu yakiɗ Kooh. 8 Ini ŋ waaɗ woo weɗ ne Kiristaani, a nikiɗ surgaaniŋ Yawuut ci ne a teeɓoh ne Kooh woo keeh, a tumiɗ in ci a gapee caac ca. 9 Te a namiɗ on ɓi nikɗi Yawuut ne ɓa min yakiɗ Kooh ŋ yirmi a yirim ɓa, findi wa fiisohu an :
« Ineem weɗ tah ŋ hey ɗa yakɗe
ŋ ɗooƴ cuuɓ ci
te ŋ hey ƴeeke tiikiŋ ɗa.✡15:9 Sabuur 18:50 »
10 Wa namiɗ fiisu an :
« Ɗu ɓi cuuɓ ci jen,
hunaat na cuuɓiŋ ɗe haf ce,
ɗu sum !✡15:10 Rohƴiɗi 32:43 »
11 Ɓaatta nga an :
« Ƴeekaat Heɗi,
ɗu ɓi cuuɓ ci jen !
Adinaani jen yakɗaat ɗe !✡15:11 Sabuur 117:1 »
12 Esayi namiɗ woo ne :
« Yi rimkoh ŋ Yesay*15:12 Yesay : a yi baab ɓi Dawuuda. hey haye,
a meeɓu,
a adgoh cuuɓ ci ;
cuuɓ ci hey dege yaakaariŋ ɓa nga ɗe.✡15:12 Esayi 11:10 »
13 Kooh yi Heɗ yaakaar riifɗaat ɗu na sum na jam keeh-keeh ŋ kosi ɗu kos, ne ɗu taamboh ŋ hatiliŋ Fuuɗsi Hoolohngaani, ɗu riif na ooluk ŋ in ci na haye.
Ini tah po Pool kaannja woo in ci a woo ŋ kaytii
14 Ini kaɗ nga ɗu, ɓaah ciŋ ngo, mi deey, wa wooriɗ to ne ɗu baahiɗ po ɗiska baah top, ɗu riifiɗ na inah te ɗu miniɗ ñaahoh ŋ harmban ɗu. 15 Waaye ŋ kaañiɗ ƴissuut po ŋ fiisɗiɗ ɗu, ngaŋ kaytii, ɓi woo, ci na hee ɗu yune ŋ in ci ɗu inah. Ŋ kaañiɗa sagu baahohi Kooh baahoh ho, 16 ne ŋ nik ŋ pangkiŋ Kiristaani Yeesu wuu ɓi nikɗi Yawuut. Ŋ ineem, ŋ pangkee findi seeƴkiɗoh wuu Kooh ŋ ini kaɗ ŋ Yegɗohiŋ Muci, ne ɓi nikɗi Yawuut nik findi seeƴki a teyɗuk. Seeƴkeem, wa hoolɗuuɗ wuu ce taamboh ŋ Fuuɗsi Hoolohngaani.
17 Ŋ niki ŋ nik ŋ Kiristaani Yeesu, ŋ miniɗ ndamkoh pangki mi na pangkiɗe Kooh. 18 Ŋ kaañɗi woo ali in, ɗal wi Kiristaani haɓiɗ taamboh nga so ne a ɓay ɓi nikɗi Yawuut ngaŋ kerhiɗ Kooh. Weɗ a tum taamboh ŋ woo ciŋ ngo na tumohaaɗ ciŋ ngo, 19 taamboh ŋ hatiliŋ firndeeci na keemaan ci na wiŋ Fuuɗsiŋ Kooh. Ini kooɗoh Yerusalem po ŋ Iliri, ŋ yegɗohiɗ Yegɗohiŋ Muci kaɗ ŋ Kiristaani, ŋ ɗisik nu nik. 20 Te ini nikiɗee so weɗ ne, ŋ yegɗoh Yegɗohiŋ Muci ŋ ɗisik ci tiikiŋ Kiristaani moosɗi kerhu, ne ŋ taɓahuu ŋ fondama jaambur. 21 Mbaa ini ŋ tum huniɗ na ini Fiis ci woo an :
« Ɓi fu inah ne
ɓa yegɗuuɗi ini kaɗ nga ɗe,
ɓa hey hote ;
ɓa kerheeɗi ini kaɗ nga ɗe,
ɓa hey inhe.✡15:21 Esayi 52:15 »
Pool waaɗiɗ kaɗ Rom na Españ
22 Ineem weɗ ini hondoh ho waas laayiɗ ne ŋ hay ɗu marke. 23 Waaye, ɗiski wa nik ndii, ŋ ɗiindohiɗ pangkiŋ ngo ŋ ɓak cii, te kiis laayiɗ ceɗi, keeñiŋ ngo weɗi ŋ waaɗ hay ɗu marke. 24 Ŋ waaɗiɗ kaɗ Españ. Ŋ kaɗee ɗah, ŋ hey taambe ndeem ne ŋ hot ɗu, ŋ neɓsiɗuk ŋ nikiŋ ngo na ɗu ƴissuut, hanaa ɗu hey yo ɓaatɗohe ŋ ɓaaɓiŋ ngo Españ.
25 Waaye ɗiski wa nik ndii, mi yii kaɗ Yerusalem, ne ŋ taambkoha ɓo'-Kooh ca nik nga. 26 Laam, ɓi Maseduwaan na ɓi Akaay tufkiɗ ne ɓa nangɗoh kopor wuu ɓo'-Kooh ca raakaaɗiica nik ŋ Yerusalem. 27 Ɓa tufkiɗ ne ɓa tuma, waaye wa kombot ki ɓa joy ɓa wirind ; laam ini kaɗ ŋ kos, e Yawuut ci ɓayoh raak-raaki, te ɓi nikɗi Yawuut rahsiɗ ɓak nga kotii. Kon, ɓi nikɗi Yawuut ɓeem, ɓa joyiɗ min ɓaatɗoh Yawuut ci na raak-raaki ɓa raak ŋ adinaani.
28 Ŋ ƴut eɗoh ɓaatɗoheem moɗoɗ ɗah, ŋ hey kaɗe Españ, ŋ kaɗee ɗah, ŋ taambohan nga ɗu. 29 Ŋ inhiɗ ne ŋ hey ɗu marke ɗah, ŋ hey ɗu kome barkeeniŋ Kiristaani findi wa hend jen. 30 Waaye, mi yii kiim ɗu ɓaah ciŋ ngo, ŋ tiikiŋ Heɗ ɓoo Yeesu Kiristaa na waaɗtiɗohi puloh ŋ Fuuɗsi Hoolohngaani ne ɗu taamboh ngaŋ kiim Kooh, ɗu ɓaatɗoh ho ŋ hiñohi, 31 ne ŋ muc ɓi sang teyɗuk Kiristaani ŋ Yudee. Kiimɗaat to Kooh po ɓo'-Kooh ci nik ŋ Yerusalem teyɗuk na sum ɓaatɗohi mi na komee ɓa. 32 Ŋ ineem, ŋ hey ɗu hee marke na sum, ne Kooh waaɗa ɗah, te ŋ hey iɗsiɗke ƴissuut ŋ ɗiskiŋ ɗu. 33 Kooh, yi na onohe jam nikaat na ɗu jen ! Amiin !