3
Nakoh ci wuu findi kosiɗ ci joy nikoh
1 Gena naandis ɓaah ciŋ ɓoo kosiɗ ci ne ɓa joy joy teyɗuk kilifaaci na ɓi adgoh kur ki ; ɓa kerhiɗ ɓa te ɓa tokɗuk ne ɓa haɓiɗ in baahiɗ nu nik. 2 Ɓa ɓasuu ali ɓo', ɓa wortuk lahtoh, ɓa nik ɓo' baahiɗ, ɓa nik ɓo' soosiɗ ŋ ɓooɓi jen.
3 Ɗeɓgaan ɓoo namee nik ɓo' naandiɗ, ɓooɓi kerhiɗɗi ali ɓo', ɓo' muuƴiɗ, a kiñin ciŋ ɓoo na waaɗ-waaɗ nu nik ceɗ adgiɗee ɓoo. Ɓoo peseeɗa ŋ añaand na siistiɗoh, ɓoo nikee sangaah te ɓoo sangtiɗohha ŋ harmban ɓoo.
4 Waaye wi Kooh,
Yi Mucɗohiŋ ɓoo,
teeɓoh baahkiŋ ɗe
na waaɗiŋ ɗe na ɓooɓi,
5 a mucɗiɗ ɓoo.
Te wa ŋ tumohaaɗ ci,
ciŋ ɓoo yurhiɗ ci haa,
waaye ɓoo misik ɗe misik,
a muciɗta ɓoo
taamboh ŋ ɓooki,
ɓooki tah ɓoo rimkis,
a onnda ɓoo kipes as
taamboh ŋ Fuuɗsi Hoolohngaani ;
6 a ruhsiɗta Fuuɗsi Hoolohngaani
laayoh na laayoh nga ɓoo,
taamboh ŋ Yeesu Kiristaa
Mucɗohiŋ ɓoo.
7 Ŋ baahohi a baahoh ɓoo,
a ambiɗ ɓoo ɓo' yurhiɗ,
a onnda ɓoo kipes ki reehanɗi,
wi ɓoo ooluk ne ɓoo heya rahse.
8 Woo keem wooriɗ, te ŋ waaɗiɗ ne fu ndengiɗa baahiɗ, ne ɓi kos Kooh liiɓ ciŋ ɓa puluu ŋ ndengɗuk ŋ tum in baahiɗ. Ineem weɗ moɗ te wa raakka njiriñ ŋ ɓooɓi. 9 Waaye wortuka taastiɗoh ci naandohaaci, limiŋ caac ci, na lahtoh ci na taastiɗoh ci ŋ ini kaɗ ŋ waasiŋMusaa. In ceem jen ca raakɗi njiriñ te ca ɓarang ɓarang.
10 Yaa nu ɓek saɓsukoh ŋ ɓooɓi ɗah, woytohaa ɗe waas yino po waas kanak, a ɓoƴsohɗi ɗah, aañaa ɗe ŋ Janguuni, 11 ɓo' mand ɗaa ɗah, wa wooraat ɗa ne a faɗiɗ waasi yurhiɗi. A na bakaaɗe, a atte'iɗ haf ce po ƴutiɗ.
Kooɗkiŋ ɓaaɓ ci na askohi
12 Ŋ hey ɗa woosohe Artemas wala Tisikos. A ree ɗah, ndengɗuka fu hay fu raak ko ŋ Nikopolis. Ŋ ambiɗ ne jamanooniŋ soosi ŋ nikana ndaam. 13 Ndengɗuka fu taambkoh Senas ngelohi, a yi na Apolos po ɓa raak in ci ɓa etoh jen ŋ ɓaaɓiŋ ɓa. 14 Ɓooɓiŋ ɓoo joyiɗ nam jang tum baahiɗ ne ɓa ɓaatɗoh ɓo' ŋ etoh ci keeh-keeh ci, ŋ ineem kipes ciŋ ɓa min raakiɗ ɓo' njiriñ.
15 Ɓooɓi nik na so jen ɓii kañiɗ ɗa. Kañɗiɗ to nawleeciŋ ɓoo kosiɗ ci. Kooh baahohaat ɗu jen !