Paulo yona huyaena sinesineo maitawasola hekadi mwanedi se kouyalayalaeidi matawuwuna se laulau waihiu hekadi udiyedi, na se laukwatakwataedi. Unai sinesineo ne se hebodaꞌuyoidi na hesadi se tole waihiu hauhaudi. Yodi laukwatakwata wa kabakitana se ginauli meta kuludi nige se sumadi. Na gabemani yodi anelu o taukitasipwa se lohei haedi waihiu hauhauna hesau se lobai, kabo se hekamkamnadi. Na Paulo nige ye henuwa bena dubu se heyababa waihiu tausunuma yodi kabikabi debanaena, unai ye hineli taba tausunuma sinesineo maudoidi se kulusuma.
**11:3: Loheya, waihiu: Paulo yona leta ta ye kuli meta kalina Giliki unai. Kalinadiyena hedehedede kesega aner, na kalina Saliba unai kaniyona labui, hewaliyo loheya maitawasola. Gonogonowana doha, kalina Giliki yodi hedehedede gune kaniyona labui, hasalayo waihiu maitawasola.
**11:5: Iya yona taukulukulu: Waihiu maitawasola udiyedi meta iya ede mwanena, na hasahasalao udiyedi, tamadi.
**11:6: Ye namwa mo taba kuluna ne ye suma: Leta ta unai meta Paulo nige ye kulihemasalahakaliliyei matawuwuna saha to sinesineo ye henuwadi bena kuludiyao se sumadi huyana se tapwalolo yo se hededepeloweta dubu koigogona udiyedi. Na ena Paulo yona huya tamowaidiyao yodi laulau ta nuwatuidi, kabo unai gonowana kulikuli ta ta nuwatulobai. Kolinito unai sinesineo se bado siya meta yodi yaubada waihiu Apolodaiti yona taupaisowa. Apolodaiti meta tau yo sine taudiyao yodi gadogadosisi kabikabina maudoina yaubadana, na yona taupaisowa wa yodi tabaꞌohu kabikabina meta taudi se lokulokunedi moni hesabana. Giliki yo Dius tamowaidi yodi kabikabi meta sinesineo maudoidi ne kulusumasumadi. Na Apolodaiti yona taupaisowa waiwaihiudi se bom mo kuludiyao meta nige sumadi. Nuwana dubu unai ekalesiya waiwaihiudi se nuwatulobai meta Yesu debanaena siya yailihai tamowaidi, nige laugagayo hesau guninaena se miya. Ede kulusuma laugagayona se hekaiyawasi. O nuwana udoi, na se nuwatulobai meta huyana Yaubada tabaꞌohuina unai bena tabu kuludi se sumasumadi, gonogonowana doha Apolodaiti yona taupaisowa wa. Na nige se nuwatulobai meta yodi tapwalolo yo yodi hededepeloweta ne nuwanuwatuna udoi, nige doha Apolodaiti tabaꞌohuina. O nuwana udoi, doha teina: Huyana se tapwalolo yo se hededepeloweta na kuludi nige se sumadi meta kabo tamowai se henuwapwanopwanodi, kabo se henahenamai yodi tabaꞌohu laulauna ta saha. Unai Paulo ye kuli ede sinesineo yodi huyatapwalolo yo hededepeloweta unai bena kuludiyao se sumadi.
**11:10: Gabemani yodi taukitasipwa meta kalina Giliki unai Paulo ye kuli, angelos. Teina unai hedehedede meta ta hai kalinadaena. Kalinada unai anelu kaniyona ede Yaubada yona hetamali tamowaidi o Yaubada yona taupaisowa. Na kalina Giliki unai kaniyona hesau meta tamowai o gabemani yodi hetamali tamowaidi o yodi tauhewasa. Na taukitasipwa gabemani se hetamalidi hinage se katai ede anelu. Paulo yona huyaena sinesineo maitawasola hekadi mwanedi se kouyalayalaeidi matawuwuna se laulau waihiu hekadi udiyedi, na se laukwatakwataedi. Unai sinesineo ne se hebodaꞌuyoidi na hesadi se tole waihiu hauhaudi. Yodi laukwatakwata wa kabakitana se ginauli meta kuludi nige se sumadi. Na gabemani yodi anelu o taukitasipwa se lohei haedi waihiu hauhauna hesau se lobai, kabo se hekamkamnadi. Na Paulo nige ye henuwa bena dubu se heyababa waihiu tausunuma yodi kabikabi debanaena, unai ye hineli taba tausunuma sinesineo maudoidi se kulusuma.
**11:29: Nige ye nuwatulobai meta teina ta Keliso tauna: Hedehedede ta kalina Giliki unai hinage gonowana ta bui ta wane, Ekalesiya bodana nige ye nuwatui.