HAY HOLAT HA TAWTAWOY
HIBRIYO
1
Hay pinahalità nin Diyos nin halità na ay Anak na
1 Hin hato, hay Diyos ay naghalità ha kawka-apo-apowan tamo nin malakè ya bisis boy ha hari-harì ya paraan ya hay pinahalità na ay pawpropita na. 2 Piro hapa-eg ha kalampohan ana nin pana-on, naghalità ya kontamo ya hay pinahalità na ay Anak na. Hay babon lotà ay pinalsa nin Diyos ya hay ginomawà ay Anak na, boy pinilì nin Diyos ya Anak na nin mag-ikon nin kaganawan bagay. 3 Bayri ha Anak ay makit ya kagandawan kahampatan boy kahawangan nin Diyos, boy no pangno ya Diyos ay ombayro itaman ya Anak na. Hiya ya Anak ya ampakaba-alà ha kaganawan pinalsa nin Diyos, ta maski anyay halita-en na ay ampangyari. Nati ya emen na ma-alih ya kawkasalanan tamo, biha ya nako ha katatag-ayan ha kama-inan nin Diyos nin niknò ha bandan wanan nin Pinakamakapangyariyan ya Diyos.
Hay aw-anghil ay ahè maka-igit ha Anak nin Diyos
4 Hay an-ingaten Anak nin Diyos ay igit ha aw-anghil, ta hay katongkolan ya inggawà kona nin Diyos ay igit ha katongkolan la. 5 Alwan anghil no alwan Anak na ya pinag-ilgowan na nin ombayri:
“Hika ya Anak ko. Hapa-eg ay impatnag ko ya hiko ya Tatay mo.”
Ombayri et ya hinalità nin Diyos ya tongkol ha Anak na:
“Hiko ya Tatay na boy hiya ya Anak ko.”
6 Hin ihogò nin Diyos ya mimihay Anak na nin mako bayri ha babon lotà ay ombayri ya hinalità na:
“Kaganawan anghil nin Diyos ay dapat homamba kona.”
7 Tongkol ha aw-anghil ay ombayri itaman ya hinalità nin Diyos:
“Hila ay mawmagsisirbi ko ya no labay ko ay magawà ko nin hila ay mag-in angin boy mag-in apoy.”
8 Piro hay hinalità nin Diyos ya tongkol ha Anak na ay kahalako ta ombayri ya hinalità na kona:
“Hay pamomo-on mo, O Diyos ay anggan makakanoman. Hay pag-a-arì mo ay ma-in kahampatan. 9 Angkatowà ka ha gawgawà ya mahampat, piro angka-inakit ka ha gawgawà ya mala-et. Kayà pinonò kata nin kaligawan, ta hika ay ginawà kon igit ha kawkalamowan mo.”
10 Hinalità et nin Diyos ha Anak na:
“Hin ka-ona-onawan, hika ya Pangino-on ay pinalsa moy lotà, boy gamet mo ya nanggawà nan langit. 11 Kaganawan nin habayti ay ma-in anggan makakanoman. Habaytoy pawpinalsa mo ay doma-an nin bilang ha dolo 12 ya no ayin anan kowinta ay topi-en ana ta pahiliyan nin bayo. Piro hika ay ahè ampangoman; agka tomo-a boy agka mati.”
13 Habayti et ya hinalità nin Diyos ha Anak na:
“Miknò ka ha bandan wanan ko anggan hay kawka-away mo ay talowen ko boy igwà ko hila ha hilong kapangyariyan mo.”
Maski nakakano ay ayin ombayroy hinalità nin Diyos ha aw-anghil na. 14 Warì alwan kaganawan anghil ay aw-ispirito ya mawmagsisirbi ha Diyos? An-ihogò hila nin Diyos nin magsirbi do ha tawtawoy biyan na nin kalibriyan ha kasalanan.