KAWKAHALITA-AN
Pa-onan Halità
Habayti ya libron KAWKAHALITA-AN ay pini-a-agem ya mangaganday tawtorò, boy bayri makit ya tawtorò ha allo-allon pamimiyay. Ha ompisa nin habayti ya libro ay ampangipapanemtem nin ombayri: “Emen ka magkama-in karonongan ay onawen moy panggogomalang ha Pangino-on.” (Kawkahalita-an 1:7) Bayri simpri makit ya tawtorò no pangno magpakatawo boy no pangno gamiten ya ka-ihipan.
Habayti ya kawkahalita-an ay ampangipatnag no anyay dapat gaw-en nin tawoy maronong ha angkaranasan nay hari-harì ya ampangyari. Hay kanayon ya torò bayri ay tongkol ha rilasyon nin pamilya; hay kanayon itaman ay tongkol ha pagninigosyo. Hay kanayon ay no pangno makitatawo boy no pangno magpendan ha sarili.
Mabetbet nin binanggit bayri ya hay dapat pag-ogali-en ay pagmamaka-aypà, pagpapasinsya, pagririspito ha manga-irap, boy pag-in tapat ha aw-amigo.
Hay anti bayri ha libron Kawkahalita-an ay:
Pagpapa-alagà ha karonongan 1:1–9:18
Kawkahalita-an ni Arì Solomon 10:1–29:27
Hawhalità ni Agor 30:1-33
Hari-harì ya ma-alagà ya halità 31:1-31
1
Hay ka-alaga-an nin Kawkahalita-an
1 Habayti ay kawkahalita-an ni Solomon ya anak ni Arì Dabid ya nag-in arì nin nasyon Israyil.
2 Hay kawkahalita-an ay inholat emen makatambay ha tawtawo nin makatandà karonongan boy mahampat ya tawtorò, boy makapipa-intindi nin hawhalità ya mangaldeg ya labay totolen. 3 Habayti ya kawkahalita-an ay makapitoto no pangno mag-in matalino, mahampat, tapat, boy mag-in parihoy gawgawà. 4 Makab-i bayti nin talino ha mangakapey et ya ka-ihipan, boy makapitoto et bayti ha mangalagò nin tamà ya gaw-en. 5 Habayti ya kawkahalita-an ay makapahan tinandà nin maski tawtawoy mangaronong, boy lalò makapitoto ha mangama-in pinag-aralan 6 emen la ma-intindiyan ya labay totolen nin mangaldeg ya kawkahalita-an boy aw-alimbawà kateng hawhalità nin mangaronong.
Wawali ha mangalagò ya lawlalaki
7 Hay ona mon gaw-en emen ka magkama-in karonongan ay igalang moy Pangino-on. Hay tawtawoy tangah ay ahè ampa-alaga-an ya karonongan boy ahè labay matoto.
8 Anak koy lalaki, leng-en moy an-itorò komo nin tatay mo, boy agmo ipag-ayin ba-alà ya anhalita-en komo nin nanay mo; 9 ta hay tawtorò la komo ay makab-in kahampatan ha pag-o-ogalì mo nin bilang ha korona boy ha kolinta ya anggamiten mon pagpaganda mo.
10 Anak koy lalaki, no ma-in mawmakasalanan ya mangaygay komo ay agka pomayag nin makilako konla. 11 Alimbawà, halita-en la komo ya ombayri: “Kilako ka konnawen ta mangabang tamo nin tawtawoy patyen tamo; maski ayin bara-nan ay mamati tamo. 12 Maligha hila boy mahampat ya makit tamo, piro agla tandà ya biglà hilan mati ha gaw-en tamo konla. 13 No nati hilayna, hay manga-alagà ya kawkamama-in la ay kowen tamo ta pon-en tamoy bali tamo nin kawkamama-in lay makwa tamo. 14 Hali! Kilako ka konnawen ta hay makwa tamo ay pi-a-atagan tamo.”
15 Anak koy lalaki, agka makilako ha ombayroy tawtawo; pakarayò ka konla. 16 Hay pirmin anti ha nakem la ay manggawà kala-etan boy pirmi hilan nakahandà nin mamati. 17 Ayin kowintay pangikanà nin hilò no hay manokmanok ya hihilo-en ay nakabantay. 18 Habaytoy tawtawo ya ampipanggawà nin kala-etan ay emen lan anggaw-en ya sarili lan kamatyan. 19 Hinoman ya tawoy ampagkama-in ha powirsawan ay angkapowirsa itaman ya kamatyan na.
Kowinta ampanorò ya karonongan
20 Hay ka-alimbawa-an nin karonongan ay kowinta tawoy ampanorò ya hay tawtorò na ay an-ibolyaw na ha dawdaan boy ha mangatawoy dawdogal. 21 Ampambolyaw ya ha pamihahakbatan nin tawtawo boy maski ayrin dogal ya pamititiponan kateng ha pi-anggawan nin banowa.
22 Hay an-ibolyaw na ay ombayri: “Hikawoy tawtawo ya ayin tinandà, anggan makano kawo maliwid ha pagka-ayin tinandà? Hikawoy ampanoya-toyà nin karonongan, anggan makano moyo ikaliga ya panoya-toyà? Hikawo ya tawtawoy tangah ya ahè labay matoto, anggan makano kawo matoto ha katangahan moyo? 23 No leng-en moyo ko ha ampana-aran ko komoyo ay mahampat ya iwawali ko komoyo, boy ipatnag ko komoyo ya tinandà ko. 24 An-ingaten katawo boy anhagyaten, piro pinagka-ayin moyo ya ingat ko boy hagyat ko komoyo. 25 Hay wawwawali ko komoyo ay agmoyo pina-alaga-an boy agmoyo nilengè ya ha-ad ko. 26 Kayà no ma-in alwan maganday mangyari komoyo ay ka-iliyan katawo; boy no ma-in kawon kagolowan ay galgalan katawo. 27 Habayti ay lomateng komoyo nin ayin imbalag ha bagyo boy emen ha alimpoyopo ya mama-irap boy mamalelè komoyo.
28 “Ha ombayroy mangyari, hiko ya karonongan ay ingaten moyo piro agko tombay komoyo. Pakatikaptikapen moyo ko piro agmoyo ko matotowan. 29 Hay bara-nan no antà ombayroy mangyari ay banà ta agmoyo labay magkama-in tinandà, boy agmoyo labay gomalang ha Pangino-on. 30 Agmoyo labay ya wawwawali ko komoyo boy agmoyo nilengè ya ha-ad ko. 31 Kayà no anyay ginawà moyo ya kowinta intanem moyo ay habaytoy alawahanen moyo, boy sarili moyon gawà ya makapahyab komoyo. 32 Hay tawtawoy mangakapey ya ka-ihipan ay mati banà ta agla labay ya karonongan, boy hay tawtawoy tangah ay mahirà banà ha agla panlengè; 33 piro hinoman ya ampanlengè kongko ya karonongan ay magkama-in kasigorowan. Agya mapangno boy ayin mag-in bara-nan para hiya ay malimo.”