KAWKANTA
Pa-onan Halità
Habayti ya libron KAWKANTA ay pini-a-agem ya kawkanta boy pawpanalangin. Alwan mimihay tawo ya nanolat nin habayti, boy naboyot ya pana-on nin hinolat bayti. Habayti ya kawkanta boy pawpanalangin ay pini-a-gem nin aw-inalalak ni Israyil para gamiten la ha panhohomamba la ha Diyos. Hin bandan hoyot, habayti ay inlamo ha Masagradoy Kaholatan nin Diyos.
Hari-harì ya klasin kanta ya makit bayri ha libroy habayti. Ma-in kawkantan pamomori boy panhohomamba ha Diyos; pawpanalangin emen tambayan, protiksyonan, boy emen ilibri; pawpamakirawat emen magkama-in kapatawaran; kawkantan pamasalamat ha kawkahampatan ya ginawà nin Diyos; boy pawpamakirawat emen parosawan nin Diyos ya kawka-away. Hay pawpanalangin ya anti bayri ay pansarili boy pangkaganawan; hay kanayon ya panalangin bayri ay ampangipakit nin angkatanam nin mihay tawo no anyay anti ha nakem na. Hay an-ipakit itaman nin kanayon ya panalangin bayri ay panganga-ilangan boy angkatanam nin kaganawan tawo nin Diyos.
Hay kanayon ya ginamit ni Apo Hisos ha panonorò na ay bayri na kinwa ha Kawkanta. Hay nipanolat man nin Bayoy Kasondo-an nin Diyos ay bayri simpri nangwa nin hawhalità ya inholat la ha Masagradoy Kaholatan nin Diyos. Habayti ya libron Kawkanta ay ma-alagà ya libro ya anggamiten nin mawmantotompel ha panhohomamba la ha Diyos pa-ibat hin hato angga hapa-eg.
Hay anti bayri ha libron Kawkanta ay magato boy limampò (150) ya kanta. Habayti ya Kawkanta ay inatag-atag ha limay libro nin ombayri:
Kawkanta 1-41
Kawkanta 42-72
Kawkanta 73-89
Kawkanta 90-106
Kawkanta 107-150
ONAN LIBRO
1
(Kawkanta 1-41)
Ahè ma-ipariho ya tawtawoy mangahampat ha tawtawoy mangala-et
1 Makalmà ya tawoy ahè anhomonol ha tawtorò nin tawtawoy mangala-et, ahè ampanggawà nin anggaw-en nin mawmakasalanan, boy ahè ampakilamo ha mawmanoya-toyà ha Diyos; 2 no alwan hay an-ikaliga na ay hay nakaholat ya Halità nin Pangino-on, boy allo yabi nan ampi-awengen. 3 Hay tawoy ombayri ay ayin imbalag ha po-on kayoy intanem ha pingit lanom ya ahè angkapaltan mamonga ha pana-on nin pamonga. Hay bawbolong nin habayti ay ahè angkalaneh maski ka-ingitan; kayà pirmin nalaboyong. Anyaman ya anggaw-en nin ombayri ya tawo, hiya ay ma-in nin kapalindawayan.
4 Piro hay tawtawoy mangala-et ay alwan ombayro, ta hila ay bilang ha apah ya angka-i-alipad nin angin. 5 Kayà ha allon panonosga nin Diyos ay aghila makalibri ha iparosa na konla, boy aghila makapakilamo ha tawtawoy mangahampat. 6 Tandà nin Pangino-on ya tawtawoy mangahampat kateng pamimiyay la, boy an-asiwa-en na hila, piro hay tawtawoy ampamiyay ha kala-etan ay mipalako ha kaparosawan.