Kalata ya Paulo kuli Tito
Tito
Busansulushi
Libuku lya Tito ni limo lya makalata ana kufuma kuli Paulo alikutumwa kubantu mumusena wakutumwa ku mubungano. Makalata naambi atatu ni 1 Timoti, 2 Timoti ne Filimoni. Paulo walalembela Tito, nsombi walalemba eti kalata yela kubelengwa mwakolobesha. Tucishici, pakwinga lambanga sha kwelelwa kwakendi kwa kuba mutumwa, cintu Tito ncalikuba weshiba kendi. Paulo walalemba iyi kalata pakati pa 63-65 A.D.
Paulo walikuba lamulaya kendi Tito, kutangunina mibungano yalikuba pansumbu ya Kelete. Paulo walalemba kalata kwambeti alailile Tito sha kusala ne kwiyisha batangunishi ba mubungano. Kayi walapa malailile alico mu makalata akendi kuli Timoti. Kalata yakendi ilambanga cena batangunishi mobelela kubela ne cendo caina, kuba citondesho. Mibungano ne batangunishi ba lelo belela kushako mano kukuba ne mikalilo ilayandikinga mubutangunishi.
Mitwi ya makani
Paulo lambilinga Tito kubika bantu bakute mikalilo ya bulesa 11-16
Kayi lamwambilinga sha kwiyisha bantu kuba ne cendo caina 2:1 mpaka 3:11.
Cakupwililisha lapwishinga ne kulemba maswi akupwililisha 3:12-15
1
1 Njame paulo musebenshi wa Lesa, mutumwa wa Klistu Yesu, walantuma ku bantu balasalwa ne Lesa, kwambeti ndibatangunine kulushomo lwakwinshiba cancinencine cela kubatwala kubuyumi bwakulemekesha Lesa. 2 Nekubapa kupembelela buyumi butapu. ubo Lesa utabepe,mbwalashomesha kumyaka ya ndoba. 3 Lino pacindi celela walayubulula kushomesha uko mumakani akendi. Makani ayo walabika mumakasa akame, weco ndamukambaukili kwelana ne Lesa mupulushi wetu ncalang'ambila.
4 Ndakulembelenga Tito, mwaname wancine ncine mulushomo lwetu twense.
Neco Mwami Lesa ne Klistu Yesu, bamupeni lumuno ne luse.
Ncito ya Tito ku Kelete
5 Ecebo cakendi ndalakushiya ku Kelete kwambeti ubambulule bintu byalashala nekubika batangunishi ba mibungano mu minshi yonse mbuli ncondalakwambila. 6 Mutangunishi wa mubungano welela kuba muntu wa mpuwo yaina, kayi abe weba mukashi umo, ne bana bakendi bashoma Klistu, kayi beshikunyumfwila bamashali ne kutensa byaipa. 7 Muntu weshikulangilila mubungano welela kuba ne mpuwo yaina mbulyeti mwembeshi wabikwa ne Lesa. Nkelela kuba muntu shikukolwa bwalwa nambi wabukalu nambi shikuma banendi kayi wabula kushomeka mumakwebo. 8 Welela kuba shikutambula cena bensu, weshikusuna byaina ne kulikata cali kayi walulama shikulikanisha kwinsa byaipa. 9 Kayi welela kwikatishisha Maswi ashomeka mbuli ncaleishiwa, kwambeti acikonshe kuyuminisha nabambi ne lwiyisho lwancine ncine kayi ne kucikonsha kukanisha kwinsa byaipa abo bonse bakute kutoteka ciyisho ici.
10 Pakwinga pali bantu bangi bakute kwambowa bintu byabuluya byela kutaya banabo. Makamaka bantu balafuma palikoto lya bantu balafuma mu Ciyuda beshikunyonganya nekubepa. 11 Caina kubamweneka, pakwinga baleishinga mikowa ya bantu, bintu mbyobelela kubula kubeisha, nabo balayandangowa mali. 12 Naumbi wa ku Kelete umo wabashinshimi wabo, walambeti, “Bantu baku Kelete ni ba bepeshi kayi ni bilongolo byaipa, nibatolo, nsombi basuni kulyowa,” 13 Pacebo ici ubakalalile cangofu kwambeti balulame mulushomo, 14 bacileke kukutika tulabi bwa Bayuda, ne milawo yeshikubikwa ne bantu beshikukana cancinencine. 15 Bintu byonse byaswepa kubantu bakute miyeyo yaswepa, nsombi nkabyaswepa kuli bantu babula luushomo, pakwinga myoyo yabo yaipa. 16 Bakute kwambeti Lesa bamwinshi, nsombi minshilo yabo ikute kukana mbyobakute kwamba. Bakute kufundausha kumoyo kayi nkabanyumfwili Lesa, neco nkabelela cintu ciliconse caina.