1 Bi tai hhende echise pse nangoni deilazhi ulie echine giezhi jiejin giewo. 2 Bi tai nango gieghazhoshi bi nango gieghasan tanse chugo kien mii bayasughane? 3 Bi eqighandei xinni huaikushi bi irekude indan mii bayasughaku kunla khareidene mii nango gieghakuse ayizho. Bi bayasuse ta dajialaye bayasukui bi xianxin giezho. 4 Bi eqighandei zhughedemi otuzhi yuchou giezhi wilazhi tande xin huaikushi tai nango gieghane ese giezho, bi tande matugie oresei mejieghane giezho.

5 Kunni nango gieghasan hhe kun zinie mii nango gieghakui pusho, ta dajialaiye man ezighan nango gieghazho. Bi ingiezhi kieliese hende gofen uwo. 6 Intu kunyi ta olon kunla qingie faise kuruwo, 7 ede khareidene hhei rouliezhi sughazhi kielie, pse nango olon giese bazilie dane. 8 Ingiese bi tai xiahua gieye, ta hhe kunde oreku zhughene goude mejiegha. 9 Bi eqighandei xinni huaikushi ta yan shiqindeliuzhe shunjinu ulie shunjikui shiizhi mejiene giezho. 10 Ta kienyi mienliese bi kienyi mienliene. Bi kienyi mienliese Mexihai melie tande oluzhi mienliezho, 11 pse Ibilisi matanyi pienyi zhanjine. Matan hhei mujii ulie mejiekui pusho.

12 Bi Mexihani gouxioxide oluzhi Teloyade echise Ezhan made gouxioxi chonjiku wijienni niewoma, 13 bi oresan gaijiu Qidoi chanla dase zhughedemi nanran uwo. Ingie hhendedu kunlade salan gie Maqidunde echiwo.

14 Hudade mafan kielieye, hhe Mexihare hhantu matanyi chan uduruzhi zhan eghizhi injighazho. Pse matai tungo giezhi Mexihai taniku andatui gochude funqieghazho. 15 Bugon jiuisan kun, widachen kun dunda matanshi Hudade ogiku Mexihani andatu widao wo. 16 Ene widao widachen kunlade fugughaku fumughei wo, jiuisan kunlade aminni andatui wo. Kien intu renwuni gie shidane? 17 Bijien olon kunla mutun Hudai daolii baer huiku dunxi ese danlaghazho. Bijien jianjise Huda peisan mutun Hudai melie Mexihai kouizhi shixinji giezho.