1 Huda, Ezhan Ersa Mexihani hoji Yagebu xin huaizho. Gochude sandazhi sousan 12 gie paini kunlade kielien asazho. 2 Mii gaijiula, tande yanyanji chijia shiqinyi penjise hende bayasundu. 3 Tai xianxin giekui shiizhi daose rennai irekui ta mejiene. 4 Ta rennaini xiogoni man khizhegha. Ingiese ta fugiedazhi hulunshidene yama ulie chaine.

5 Tai dunda kiende agheli chaizhoshi soyuji kunlade dafande ogizhi ulie kheilaku Hudase xiahua gie, tande ogine. 6 Ta xiahua giekude xianxin giezhi goujida inxin bu gie. Inxin giechen kun haini lan mutun kei matugie feiliese qingie furane. 7 Intu kunla Ezhan yan ogine giezhi bu sumula. 8 Soyuji shiqin jiere zhuyine barei dazhi undanla dazho.

9 Boghoni gaijiula goya undunine kuai. 10 Bayan kunla goya boghonine kuai. Bayan kunla banche jieredu chizhe mutun widane. 11 Naran khizhe nie shase osun ghone, chizheni xiniezhi seighanni widane. Bayan kunye giesan dundane ingiezhi widane.

12 Chijia shiqinyi shoui shidachen kunlade fuqi wine. Shiizhi daosan kunde jianli wo giezhi aminni maghalai ogine. Eneshi Hudade oresan kunlade ogine giezhi dain giesan wo. 13 Kunyi shiise, "Mii Huda shiizho." giezhi bu kielie. Doghunni Hudai shii dane. Hheye kienmai ulie shiine. 14 Kunyi shiise goyani nefuxin miidene miighazho. 15 Nefuxinghala kieli fugiedase zui olune, zui fugiedase fugukui olune. 16 Bi oresan gaijiula, shandan bu gie. 17 Yanyanji gouni, onqienni nenjienlashi man jierese iresan wo. Gonqini Adai hhense irezho. Hhe goujida ulie bienjine, izhi niekielien wo. 18 Hhe goyane isighala zhendaoi tungo giezhi matande ada danlawo. Ingiedene matanyi hhe zhayaghasanla dundadu zui zhunyoni gholughawo.

19 Bi oresan gaijiula, enei mejie, kienliuzhe chenliekude ghujighan, kieliekude lalaghan, hokukude lalaghan. 20 Kunni hokuku Hudai gundanni khizhegha dane. 21 Ingiese yanyanji zannanni, olodosan doghunnilai man benda. Tai zhughede Huda zeilasan kielienni renyide jienlie. Ene kielien tai ruhherni jiui shidane.

22 Ta goyane piendazhi kielienyi zinie chenliechen bu gholudene zunjichen gholu. 23 Kun kielienyi zinie chenliedene ulie zunjise belijide goya uxinne uzheku niekielien wo. 24 Uzhedene yo daose goya yanzine deigo matawo. 25 Zinie kunlade ziyu ogisan onqientu guijinni xianxide uzhedene chenliesei uye matazhi zunjizhi giesan kunlade yan shiqin gieliuzhe fuqi wine.

26 Kun goyane xienlian wo giedene kielienne gonji dase goyane goya piendazho. Ene kunni xienlian yama oronde uwo. 27 Ada Hudai melie ganjin, zannan witu xienlianshi oliechen, guafulade kunnan bikude hhelai zhaogu giezhi da goyane baohu giezhi duyani zannanyi ulie cheiqighakui wo.