1 Ersa tujiladene izhi ulie beidene onxian giezhi zhughe ulie widakui bilazhi kieliewo. 2 "Nie chenshide nie noyen Hudase ulie ayine, kunlaiye ulie zunjine. 3 Hhe chenshide nie guafu wo. Ibeizi noyenyi hhende echizhi kieliezho, 'Made nie duitou wo. Chi made gundande chuli gie.' 4 Ene noyen izhi ese gonjizho. Oloncha oludene sudorone sumulazho, 'Bi Hudase ulie ayine, bexinlaiye ulie zunjinema, 5 ene bierei ibeizi mii souine. Enei bi goudaghaye pse mini jindaghazhi alane.'"

6 Ezhan kieliewo, "Ene gou witu noyen kieliesanyi ta chenlie. 7 Huda sunghuzhi irezhi xieni udu hhei waradasan kunlade Huda gundanni ulie ogidene udazhi banman gienu? 8 Bi tande kielieye, Huda hhelade ghujighan gundanni ogine. Ingieliuzhe Kunnikewon irekude duyade goude xianxin giechen kun giedun ereizhi olune?"

9 Goyaneshi gou kun wo giezhi kunlai meilade uzhesan kunlade Ersa bilazhi kieliewo. 10 "Nie Falisai kun shui shanjisan kunghala huitande onxian giele echiwo. 11 Falisai kun niezheghan beidene onxian giezho, 'Huda, bi chade mafan kielieye. Bi kunlai buxian wo. Ese qianlazho, gou wini ese giezho, piofen ese giezho. Ene shui shanjisan kunyiye genben buxian wo. 12 Bi nie xinqide lianhui orozo bareizho. Shourusene 10 fenzhi 1 ni chade ogizho.' 13 Shui shanjisan kun gholode beidene asimanyi ayizhi uzhe da echanne chuidazhi kieliezho, 'Huda, bishi zuiren wo. Made ubali nie xii!' 14 Bi tande kielieye, giedene echikude Huda gounide sanasanshi hhe kun pusho, ene kun wo. Kien goyane undudaghase boghonidaghane. Goyane boghonidaghase undudaghane."

15 Kunla jiujiulane qioruzhi Ersai melie ire maqighane giezho. Tujila chanladene hhelai sugiezho. 16 Ersa hhelai uruzhi ire tujilade kieliewo, "Kesilai bu dui, mii shida ire gie. Hudai gojiashi imutu kunlanughun wo. 17 Bi tande shuhua kielieye, kien kewosi mutun Hudai gojiai ulie jienliese hhende oro dane."

18 Nie noyen Ersade asawo, "Gou loushi, bi matui giese chanqiku aminni jienliene?" 19 Ersa hhende kieliewo, "Chi mii yangiezhi gou wo giezho? Hudase chugo gouni uwo. 20 Minlinyi chi mejiene, Piofen bu gie, kun bu ala, bu ghula, jia ganzhen bu bei, ada anane zunji giezho." 21 Hhe kieliewo, "Enelai bi ga xienzise man zunjizho." 22 Ersa chenliedene kieliewo, "Chade da nie chaizho. Chi bisanlane man huizhi nanxin kunlade ogi. Ingiese chii boubei asiman jiere wo. Ingiedene irezhi mii dagha." 23 Hheshi nie fugie bayan kun wo. Ene kielienyi chenliedene hende yuchourazho.

24 Ersa hhei uzhedene kieliewo, "Baertu kun Hudai gojiade oroku chijia no wo. 25 Loto zhun boghose daoku bayan kun Hudai gojiade orokuse da sunfan wo."

26 Chenliesan kunla kieliewo, "Ingiese kienyi jiui shidane?" 27 Ersa kieliewo, "Kun gie dakui Huda giene." 28 Beduru kieliewo, "Uzhe, bijien goyanughunne bendadene chii daghazho." 29 Ersa kieliewo, "Bi tande shuhua kielieye, kun Hudai gojiade oluzhi gie, bierei, gaijiu, ada, ana, kesilane bendase 30 ene duyade pse olon ogine, houshide chanqiku amin ogine."

31 Ersa 12 gie tujii uruzhi ire hhelade kieliewo, "Uzhe, matan Yelusalende khireine. Xienzhila Jinwun jiere huaisan mutun Kunnikewonyi shiqinyi man gholughane. 32 Hhela hhei niman kunlade jiuise kunla xilun, shizheghane, ungie jiere nunpune. 33 Mabienzighala eghine, da alane. Ingie ghurudude aminne olune."

34 Ene shiqinyi tujila dunjire dawo. Isii niuighazho, hhela hhe kieliesan isii mejie dawo.

35 ErsaYeligede chadashikude nie sugho mo bienzide soudene ghuizho. 36 Olon kun yozhi daokude sugho sonosudene, "Yan shiqin wo?" giezhi asazho. 37 Hhela sughode kieliewo, "Nasale kun Ersa yozhi daowo." 38 Deigo waradawo, "Dawudeni houdei Ersa, made ubali nie xii!" 39 Melie yosan kunla shenqi bu khizhe giezhi jiebalase hhe genjia fugiede waradazhi kieliezho, "Dawudeni houdei, made ubali nie xii!"

40 Ersa beidene hhei urudei ire giezhi kieliewo. Hhe dao irese hhende asawo, 41 "Bi chade yan giene?" Hhe kieliewo, "Ezhan, bi chanlaku duran wo!" 42 Ersa kieliewo, "Chi chanla. Chii xianxin gieku chii jiuiwo." 43 Sugho deigo chanladene Hudai kuaizhi Ersai daghawo. Kunla enei uzhedene Hudade doulazho.