1 Ersa pse haibienzide sughazhi qiiwo. Tebieji olon kunla hhei shida hhantulase hhe haini chon jiere khirei souwo. Kunla man haibienzide wo. 2 Ersa hhelade bilazhi olon sughazho. Sughakudeni hhelade kieliewo, 3 "Ta chenliendu, nie kun shizhile echiwo. 4 Shizhikudeni niezhanla mo jiere luise bunzhula ire ijie agiwo. 5 Niezhanla tura olon witu tashitu oronde luise tura ninkienshi niazi faizhi ghujin woma, 6 genzi uwoshi naran khizhe nie xiese ghowo. 7 Pse niezhanla eghesun dunda luise eghesun khizhezhi jigheidase bolu dawo. 8 Da niezhanla gou ghazhade luise osizhi fugiedadene 30 pei, 60 pei, 100 pei zhonjia souwo." 9 Ersa pse kieliewo, "Chighin bitu kunla chenliendu!"

10 Ersa niezheghanne bikude daghasan kunla, 12 gie shitu bilasan isii asazho. 11 Ersa hhelade kieliewo, "Hudai gojiai mimii tande mejieghawoma, ghadanedu kunlade bilazhi kieliekushi,

13 Pse hhelade kieliewo, "Ta ene bilasei mejie danu? Qinse ta soyuji bilasei matugie mejiene? 14 Fure shizhisan kun shizhisanshi Hudai kielien wo. 15 Mo bienzide luisanshi kun Hudai kielienyi chenliedene Ibilisi deigo ire sudoro shizhisan kielienyi agi echiwo. 16 Tashitu oronde luisanshi kun kielienyi chenliedene bayasuzhi deigo jienliewoma, 17 zhughedeni genzi wise niechaku wo. Kielienyi yenyinghala zeinan onu heiku kuzhese deigo furawo. 18 Eghesun dunda luisanshi kun kielienyi chenliewoma, 19 duyai munan gieku, baer miiku, pse duyai yanyanji onxian giekughala kielienyi jigheidazhi yama sou dawo. 20 Gou ghazhade luisanshi kun kielienyi chenliezhi jienliedene 30 pei, 60 pei, 100 pei zhonjia souwo."

21 Ersa pse kieliewo, "Kun zhulai agi irese ighaghala komoronu? Chonban doura jienu? Zhula teiku teizi jiere jiene. 22 Niuighasanlai ulie khizheghakui uwo. Ghulazhi giesan shiqinlai ulie khizheghakui uwo. 23 Chighin bitu kunla chenliendu!"

24 Ersa pse kieliewo, "Ta goude chenliendu, ta kunlade yanghala nanjizhi ogise tandeye yanghala nanjizhi ogine, da olon ogine. 25 Bichen kunde pse olon ogine. Wichen kunse bisanlainiye agi echine."

26 Ersa pse kieliewo, "Hudai gojia kun fureni ghazhade shizhisei xianli. 27 Xieni kijiene, udu bosine, ene fure matui niazi faizhi osisei hhe kun ulie mejiene. 28 Ghazhase zhonjia goya osine. Xien niazi faine, khuinashi fugiedazhi qiorun khidene chuduzho. 29 Zhonjia boluse liendaoghala ghadune. Ghuraku shihou oluwo."

30 Ersa pse kieliewo, "Hudai gojia yanni xianli? Matan yanghala bilane? 31 Nie caizi furei xianli. Zemin jiere shizhisan furese zui gaji woma, 32 shizhidene khizhese yan caiseliuzhe fugie wo. Chalani fugiedazhi asiman jieredu bunzhula holiene."

33 Ersa zhao hhela dunjire shidaku mutun bilazhi olon kieliezho. 34 Bilazhi ulie kieliese hhelade ulie kieliene. Kun widakude tujiladene isii kieliezhi man mejieghazho.

35 Hhe xii Ersa tujiladene kieliewo, "Matan hai duimiende daoye." 36 Tujilani olon kunlase likai gie Ersa sousan chon jiere khireidene hhantu echiwo. Psedu chonlaye hhantu yozho. 37 Menzhali honfen kei bosidene lan chonni eghizhi chonde usu durune giezho. 38 Ersa chonni khuina zhentouni zhentoula kijie hhunturazho. Tujilani hhei xiereigha kieliewo, "Loushi, bijienyi amin widane giezho! Chi ulie gonjinu?" 39 Ersa xiereidene keini nie sugiezhi haide kieliewo, "Bei! Nanranshi!" Ingiese kei beiwo, fugiede nanranshiwo. 40 Ersa hhelade kieliewo, "Ta yangiezhi ayizho? Tande xianxin giekui uwonu?" 41 Hhela fugiede ayizhi nieniedene kieliezho, "Eneshi yan kun wo? Kei, haiye kielienyini chenliene."