11
Honshan Mutun Yelusalende Orozho
(Mat 21:1-11; Luj 19:28-40; Yah 12:12-19)
1 Hhela Yelusalense chadashizhi Ganlanshanni Bofaqi, Bodanide kuzhekude Ersa ghua tujine peizhi 2 hhelade kieliewo, "Ta duimienni aghinde echi. Dei orose nie huiyasan ga enzheghei chanlane. Kieme unuzhi ese daozho. Ta andaghadene lai ire. 3 Kunla tande enei, 'Yangiezhi giezho?' giese ta 'Ezhan injine. Ingie deigo enende khugho ireghane.' giezhi kielie." 4 Hhela echise nie ga enzheghei wijien konni mo jiere huiya jiesei chanlawo. Hhela hhei andaghase 5 hhende beisan giedun kunla asawo, "Ta ga enzhegheni andaghazhi yan giene?" 6 Tujila Ersa kieliesan mutun kieliese hhela laighawo. 7 Hhela ga enzheghei lai Ersai shida ire goya jienlane enzheghe jiere daidene Ersai unughawo. 8 Olon kunla jienlane mo jiere peizho. Psedu kunla ghazhase chizhisan mutun chalai mo jiere peizho. 9 Melie khuinadu kunla waradazhi kieliezho,
"Hesanna!*11:9Bijienyi jiui!
Ezhanyi niereghala iresan hhei doulandu!
10 Mai xienren Dawudeni gojia iresande doulandu!
Zui Undudedu Hudade doulandu! Hesanna!"
11 ErsaYelusalende kuru mechide orozhi zhouwini man nie uzhewo. Khara oluse Ersa 12 gie shiturene chenshise khirei Bodanide echiwo.
Uhuago Mutunni Kharazho
(Mat 21:18-19)
12 Khuichudu hhela Bodanise khizhese Ersa oliesuzho. 13 Gholose nie lachen winetu nie uhuago mutunyi chanlawo. Hhende echizhi mutun jierese alima ereizhi olune giezho. Hhe mutun doura echise yama uwo, zinie lachen bikushi alima souku shihou pusho. 14 Ersa mutunde kieliewo, "Enedu khuinase chii jiere pse ibeizi alima ulie soune!" Tujilani kielienyini sonosuzho.
Ersa Mechini Ganjinraghawo
(Mat 21:12-17; Luj 19:45-48; Yah 2:13-22)
15 Hhela Yelusalende irewo. Ersa mechide orodene meimei giesan kunlai tou khighawo. Baer arunzhasan kunlai shire, ghoghochen huisan kunlai bandoulai tungu unaghawo. 16 Kunlai mechise dunxilai agizhi ese daoghazho. 17 Hhelade sughazhi kieliezho,
"'Mii giei go minzula onxian gieku gie giezhi urune.'
giezhi jinwun jiere ese huaizhou? Ta hhei ghughei ho gholughazho!"
18 Fugie buwa, jinwun hanjiala ene kielienyi chenliedene banfa xianjizhi Ersai widaghane giezho. Olon kunla man hhe sughasan tebie gou wo giese hhense ayizho. 19 Khara olukude hhela chenshi ghadane khireizho.
Ghosan Uhuago Mutunse Suruku
(Mat 21:20-22)
20 Eqiemagha hhela hhense yozhi daokude uhuago mutun lien genzi ghosei chanlawo. 21 BeduruErsai kielienyi sumula ire hhende kieliewo, "Loushi, uzhe! Chi kharasan uhuago mutun ghozho." 22 Ersa kieliewo, "Ta Hudai xianxin gie. 23 Bi tande shuhua kielieye, kien zhughedene inxin ulie giezhi ene ulade oronsene noidene haide bou giese jiu qingiezhi gholune. 24 Ingiese bi tande kielieye, ta onxian giezhi xiahua giekude tande ogiwo giezhi xianxin giema, tande qingiezhi gholune. 25 Ta beidene onxian giekude kunla chii hokughasei sumula irese roulie. Asiman jieredu adataiye tai codasei rouliene."
Ersani Qienlini Asazho
(Mat 21:23-27; Luj 20:1-8)
27 Hhela pse Yelusalende irewo. Ersa mechide yokude fugie buwa, jinwun hanjia, zhanlaola Ersai shida iredene 28 hhende kieliezho, "Chi yan qienlighala ene shiqinlai giezho? Kien chade ene qienlii ogizhi ene shiqinyi gieghazho?" 29 Ersa hhelade kieliewo, "Biye tande nie unqi asaye. Ta made huida giese bi yan qienlighala ene shiqinlai giesei tande kieliene. 30 Yaheiyai xili gieghaku qienli asimanse onu, kunlase wo? Ta made huida gie." 31 Hhela goyalane shanlian giezhi kieliewo, "Matan asimanse wo giese ta yale hhei xianxin ulie giene giezhi hhe kieliene. 32 Kunlase wo giese?" Jien kunla man Yaheiyashi zhenzhenji xienzhi wo giese hhela bexinlase ayizho. 33 Ingie Ersade kieliewo, "Bijien ulie mejiene." Ersa hhelade kieliewo, "Biye tande yan qienlighala ene shiqinlai giesei ulie kieliene."