Feilimende Huaisan Xin
1
Kielien Asazho
Mexiha Ersade oluzhi bafanzi sousan Baolo, gaijiu Qimotaighala bijien oresan hhantu wilie giesan Feilimen, oqinjiu Yafeiya, bijienre hhantu budui danlasan Yajibu, pse chii giede hhantulasan jiohuini kunlade xin huaizho. Mai ada Huda, Ezhan Ersa Mexiha tande nenjien, pinnan ogi gie!
Feilimenni Oreku, Xianxin Gieku
Bi niefanie bi zunjisan chanqiku Hudade chii qiizhi mafan kieliekushi bi chenliese chi soyuji shentulade orezhi Ezhan Ersai xianxin giezho. Bi onxian giese chi xianxin giekughala laiwon giesanlai zoin khizheghadene Mexihai sudoro matande bisan gounilai man goude mejie giezho. Gaijiu, chi orezhi shentulai futanshighase biye hende bayasuzhi zhughene teiwo.
Aniximude Oluzhi Xiahua Giezho
Ingiese bi Mexihai miende danzine fugiedaghazhi chii fenfulazhi indan giekui giegha shidanema, bi oreku zhugheghala chii xiahua gieye. Bi oqio kun, Mexiha Ersade oluzhi bafanzi soudene 10 Aniximude oluzhi chii xiahua gieye. Bi bafanzide bikude bi hhende xinyan jiere ada danlazho. 11 Melieshi hhe chade yama zoin uwoma, ede matan ghualade zoin wine.
12 Bi ede hhei peizhi chii hhende khareizhi echighaye. Hheshi mii zhughe jieredu kun wo. 13 Benlai bi hhei enende feilieghazhi bi gouxioxide oluzhi bafanzi soukude chii oronde goyane ushilaghane giezhoma, 14 chi tunyi wise bi ingiezhi gieku duran uwo. Chi gouni giese mienqian ulie giezhi goya duralazhi gie giezho. 15 Hhei zhanshi jiere chase likai gieghakushi kenen chighala chanqi hhantulaghane giezho. 16 Ede hheshi zinie hoji pusho, oresan gaijiu wo. Kunni fanmien, Ezhanni fanmiende uzhese made oluzhi ingiezho, chade oluzhi genjia qingiene.
17 Ingiese chi mii lienshou danlaghazhoshi mii jienlieku mutun hhei jienlie. 18 Hhe chade yan kuighazhi chade yan chaizhoshi man mii zhan jiere jila. 19 Bi honjiye. Eneshi bi qinsi huaisan wo. Chi made yan chaisei bu kielieye. Chii aminshi bi ogisan wo. 20 Gaijiuya, Ezhanyi miende made banman nie gie. Mexihai miende mii zhughede futanshigha!
21 Chi mii kielienyi chenliekui bi hende xianxin giezhi xin huaizho. Chi bi kieliesanse da olon giekui bi mejiene. 22 Pse chi made souku oron nie zhunbei gie. Huda tai onxian giesanyi dain giezhi mii tai hhende echighakui bi xiwon giezho.
Zuihoude Kielien Asazho
23 Mexiha Ersade oluzhi bighala hhantu bafanzi sousan Ibafu chade kielien asazho. 24 Bighala hhantu wilie giesan Make, Yalidagu, Jima, Lujia man chade kielien asazho.
25 Ezhan Ersa Mexihai nenjien tanre hhantu bi gie. Amine!