1 "Chi Ifuso jiohuini qienxiende xin huaizhi kielie, 'Borun khadene dolon hodunni bareizhi dolon antanni zhula teizi dunda yosan hhe kieliezho. 2 Chi giesan, khishulasan, rennai giesei bi mejiene. Doghun kunlai ulie roulieseiye mejiene. Goyaneshi shitu wo giezhoma, shijishan pushotulai chi kaoyen giedene jianini khizheghazho. 3 Chi rennai giezhi mii nierede oluzhi jienchi giezhi hhechekune mejie dazho. 4 Ingieliuzhe ene nie shiqinde bi chii kheilane, dei qiikude orekui chi widaghazho. 5 Ingiese chi nie sumula. Khalase banjizhoshi hhense geizhen giezhi dei qiikude giesan wilielai gie. Chi geizhen ulie giese bi chii hhende iredene zhula teiziichii yenlaiku oronse agi echine. 6 Ingieliuzhe chade intu nie gou shiqin wine. Nigela paini giesanlai bi henjisan mutun chi henjizho. 7 Chighin bitu kunla Shenlin jiohuilade kieliesan kielienni chenliendu. Injisan kunlade Hudai qientanyi aminni mutunni alimai ogizhi ijieghane.'"

8 "Chi Shimeina jiohuini qienxiende xin huaizhi kielie, 'Tou 1 gie, zuihouku, fugudene aminne olusan hhe kieliezho. 9 Chii kunnan, nanxinni bi mejiene. Shijishan chi bayan wo. Hhezighan goyalaneshi Yutai kun wo giesan kunla tai sugiesanyi bi mejiene. Shijishan hhelashi Yutai kun pusho, Ibilisire hhantuku kun wo. 10 Chade kuzhene giesan kuse chi bu ayi. Uzhe, Ibilisi tai dundadu ezighan kunlai bafanzide khazhi tai shiine. Tai hharudu zayalane. Chi fugutula shixinji giese bi chade aminni maghalai ogine. 11 Chighin bitu kunla Shenlin jiohuilade kieliesan kielienni chenliendu. Injisan kunlai ji 2 gie fuguku hei dane.'"

12 "Chi Biejiamo jiohuini qienxiende xin huaizhi kielie, 'Ghua renzitu xidu khudogho winetu hhe kieliezho. 13 Chi sousan oronni bi mejiene, Ibilisii baozo hhende wo. Made shixinji ganzhen beisan Anqipai tai hhende, jiushi Ibilisi sousan oronde alakude chi mii nierei goude zunjizhi mii xianxin giesanni ese bendawo. 14 Ingieliuzhe giedun shiqin jiere bi chii kheilane. Tai dundadu niezhan kunla Balan sughasei shunjizho. BalanBalede sughazhi Isilie bexinlai zui fanjighazhi nigiedade teisan dunxii ijieghazhi lon kijieghazho. 15 Niekielien wo, chii hhende niezhan kunla Nigela paini surughasei shunjizho. 16 Ingiese chi geizhen gie. Pse bi chii hhende irezhi amanne khudoghoghala enelai eghine. 17 Chighin bitu kunla Shenlin jiohuilade kieliesan kielienni chenliendu. Injisan kunlade bi niuighasan manani ogizhi pse chighan tashii ogine. Tashi jiere shini niere huaizho. Jienliesan kunse chugo tanichen kun nieda uwo.'"

18 "Chi Tuiyatuila jiohuini qienxiende xin huaizhi kielie, 'Nudunni khan gieda mutun, konni gieghan tun mutun Hudai kewon kieliezho. 19 Chii gieku, oreku, xianxin gieku, kunlade oluzhi gieku, rennai giekui bi mejiene. Chi khuinashi giesan melieshi giesanse da olon bikuiye mejiene. 20 Ingieliuzhe ene nie shiqinde bi chii kheilane. Goyaneshi xienzhi wo giesan bierei Yexibieni chi renjizho. Hhe mii hojilade sughazhi hhelai miidene lon kijieghazhi nigiedade teisan dunxii ijieghazho. 21 Bi hhende geizhen gieku jihui ogizhi daozhoma, hhe lon kijiekune geizhen ulie geine. 22 Bi jingao gieye. Bi deigo hhei giemereghazhi chonban jiere bendane. Hhere hhantu piofen giesanlaye hhe giesanlai geizhen ulie giese fugie zeinan dunda bendane. 23 Bi hhere niekielienji giesan kunlai alane. Ingiese soyuji jiohuila man bishi kunni sumuladanji zhughei uzhechen bikui mejiene. Bi tai giekuzhe jien kunde kharulune. 24 Ta Tuiyatuiladedu hhe sughasei ese shunjisan, kunla kieliese Ibilisini chijia isi wo giesanni ese surusan kunlade bi kielieye, bi psedu achanni tai jiere ulie teine. 25 Zinie bi iretula ta bisanne goude barei. 26 Injisan, mii isii zunjizhi zuihou kusan kunlade bi soyuji gojialai gonjiku qienli ogine. 27 Hhe kun qiemu zhugunghala waganganyi ghalughaku mutun hhelai gonjine. 28 Eneshi bi adasene linlasan qienlighala niekielien wo. Bi pse eqiemaghaku hodunni hhende ogine. 29 Chighin bitu kunla Shenlin jiohuilade kieliesan kielienni chenliendu!'"