1 Bi chanlase ghoni ghughan Xiwunshande beizhi 144000 kun hhere hhantu wo! Hhelai manlou jiere hhei nierei, adaini nierei huaizho. 2 Bi sonosuse asimanse iresan shenqi hoxian olon usuni shenqi, fugie olien tunguliesan shenqii xianli. Bi sonosusan shenqi hoxian qin tanjisan kunla tanjisan shenqii xianli. 3 Hhela baozo melie pse jieran amitu ojien, zhanlaolai melie shini don doulazho. Zemin jierese shuizhi iresan 144000 kunse chugo kiemada ene donni suru dane. 4 Enezighan kunla biereini shighazhi ese daozho, biereilare kijiezhi ese daozho. Ghoni ghughan khala echise hhela hhei daghazho. Hhelashi kun dundase shuizhi iredene Hudaji ghoni ghughonde ogisan tou 1 ban kun wo. 5 Hhelai amanse ghudan ereizhi olu dane, hhelade jienjien goujida uwo.

6 Bi chanlase da nie qienxien asimande musizhi zemin jiere sousan go gojia, go pai, go kielien, minzulade chonjiku chanqiku gouxioxii bareizho. 7 Hhe fugie shenqighala kieliezho, "Hudai zunji! Kuaikui hhende ogi! Hhe panjiku shihou kuzhezho. Asiman, zemin, hai, bulai zhayaghasei beii!"

8 Pse nie qienxien irezhi kieliezho, "Soyuji gojialade lon kijiezhi hokukui ireghasan Babilun fugie chenshi furawo, furawo!"

9 Pse nie, jiushi ji 3 gie qienxien irezhi fugie shenqighala kieliezho, "Kien yewo, hhei yanzii beiizhi manlou jiere, kha jiere zhanzi taise 10 kienye Hudai hokukui shouine. Huda zui fugiede hokukune ireghane. Ene kunla zhiguitu qienxien, ghoni ghughanyi melie khan, liuhon dunda tendun shouine. 11 Hhela tendun shouisan funi chanqi izhi ojiede mouizho. Hhezighan yewo, yewoni nigiedai beiizhi hhei niereni zhanzii taisanlade udu xieniji nanran uwo."

12 Ingiese Hudai minlinyi zunjizhi Ersai xianxin gieku bisan shentulade bixi rennai bikui wo.

13 Bi sonosuse asimande shenqi bizhi kieliezho, "Enedu khuinashi Ezhanni miende fugusan kunlade fuqi wine giezhi chi huai." Ingiese Shenlin kieliezho, "Enbene, hhela khishulasansene xiine, giesande huibao wine."

14 Bi pse chanlase niegieda chighan olien wo! Olien jiere hoxian kunni kewon souzhi qiorun jierene honshan zhoku antanni maghala zhozho, khadene xidu liendao bareizho. 15 Pse nie qienxien dajiense khizhezhi olien jiere sousande fugie shenqighala waradazhi kieliezho, "Ghuraku shihou kuruzho. Zemin jieredu zhonjiala bolu momoreizho. Liendaoghalane ghura!" 16 Ingiese olien jiere sousan liendaoghalane nie ghaduliese zemin jiereshiku zhonjiani ghurawo.

17 Pse nie qienxien asiman jieredu Hudai dajiense khizhezhi xidu liendaoye bareizho. 18 Pse nie qienxien sidagha gieku teizise khizhezhi nenli bizhi khanni gonjizho. Xidu liendao bareisande fugie shenqighala waradazhi kieliezho, "Putou bolu momoreizho. Xidu liendaoghalane ghaduliezhi zemin jieredu putoui ghura." 19 Hhe qienxien liendaoghalane ghaduliezhi zemin jiereshiku putouni ghuradene Hudai hokuku fugie jiu gieku chizide bendawo. 20 Chenshi ghadane jiu gieku chizide putouni taizho. Hhense chusun usuruzhi khizhezhi undude morei ghada undu wo, gholode 1600 sitaji wo.