3
1 Ingiese Yutai kun danlase yan haochu wo? Hetoune giese yande gou wo? 2 Go fanmiende wine. Xien Hudai kielienyi hhelade ogiwo. 3 Niezhanla xianxin ulie giese matugiene? Hhela kekao wise Hudaye kekao uwonu? 4 Kenjin pusho! Kunla man ghudan kieliese Huda ghudan ulie kieliene. Jinwun jiere jilasan mutun,
"Chi kielien kieliekude gundan wo giene.
Shenwun giekude chi injine."
5 Matanyi gou wiku Hudai gounii khizheghase matan matui kieliene? Huda matanyi faise gundan uwonu? Bi kunni jiodughala kieliezho. 6 Kenjin pusho! Qinse Huda matugie duyani panjine? 7 Bi ghudan kieliedene Hudai zhennii qinchushighazhi hhei kuaise mii yangiezhi zuiren mutun panjine? 8 Qinse matan huaini gieyema, gouni irene giezhi yale ulie kieliene? Niezhanla bijien ingiezhi kieliezho giezhi zhazho. Ene kunlai indan panjikuni wo.
Gou Kun Nieda Uwo
9 Ingiese bijien Yutai kun niman kunlase hen onu? Kenjin pusho! Kunla man zui dunda wo, Yutai kun niman kun man niekielien wo giezhi bijien kieliezhi daozho. 10 Jinwun jiere jilasan mutun,
"Gou kun uwo,
nieliuzhe uwo.
11 Minbai oluchen kun uwo,
Hudai ereichen kun uwo.
12 Kunla man xiemachalazhi yama oronde uwo.
Gounii giechen kun uwo, nieliuzhe uwo."
13 "Hhelai gholei keisan meza niekielien wo.
Hhelai kielienshi kun piendakui wo."
"Hhelai aman furedeni mogheii du wine."
14 "Hhelai amande okho sugiekui duruzho."
15 "Kun alane giese ghujin no wo.
16 Kurusan orondeni pohai nangoi jiezho.
17 Pinnanni moni ulie mejiene."
18 "Hudase goujida ulie ayine."
19 Guijinshi guijintu kunlade kieliesei matan mejiene. Ingiedene soyuji kunlai amanni menjighazhi qienxiani kunlai man Hudai panjikude ireghane. 20 Guijinni zunjizhi giedene Hudai melie gounide sanasan kun nieda uwo. Guijinni tungo giezhi zuini mejiene.
Xianxin Giekughala Gounide Sanane
21 Ede guijinse chugo Hudai gundanni khizhezho. Enende guijinshu, xienzhishu jiere ganzhen beizho. 22 Hheshijiu Ersa Mexihai xianxin giesan jien kunlade olusan Hudai gundanni wo. Yan kunliuzhe niekielien wo. 23 Jien kunla zui fanjidene Hudai famade dai dazhoma, 24 Ersa Mexihai shuikui tungo giezhi Hudai nenjienghala belien gouni wo giezho. 25 Huda Ersai kunni oronde fugughazhi shuiku gholughawo. Hhei xianxin giesan kunlai zuini mienliene. Ingiezhi Huda gundanne uzheghawo. Eqighandei Huda kunla fanjisan zuini rennai giezhi ese gonjizho. 26 Edeku shihoude ingiezhi Huda goyaneshi gundan bikui, pse Ersai xianxin giesan kunlai gounii uzheghazho.
27 Ingiese matan yanni kuaine? Yama kuaikui uwo. Yan banfaghala wo? Gieku banfaghala onu? Pusho! Xianxin gieku banfaghala wo. 28 Bijien uzhese kunni gounide sanakushi guijinni zunjizhi giekughala pusho, xianxin giekughala wo. 29 Hudashi zinie Yutai kunlai Huda onu? Niman kunlai Huda pushonu? Enbene, hheshi niman kunlai Hudaye enbene. 30 Hudashi nie wo. Hetoune giesanlai xianxin giekughala gounide sanane, hetoune uye giesanlaiye xianxin giekughala gounide sanane. 31 Ingiese matan xianxin giekughala guijinni bendazhou? Kenjin uye! Khareidene guijinni khiduzheghazho.