9
Huda Isilie Kunlai Sunghuwo
1 Bi Mexihani miende shuhuai kieliene, ghudan ulie kieliene. Mii lianxin Shenlinyi tungo giezhi made ganzhen beizho. 2 Bi hende munan giezhi zhughedemi izhi otuzho. 3 Bi gaijiuladene oluzhi mii kharazhi Mexihare danlinraghaseye duran wine. Hhelashi mare nie minzu wo, 4 yeshi Isilie kun wo. Kewonni nexian, fama, yenjisan kielien, guijin, libai gieku banfa, dain giesei man hhelade ogizho. 5 Hhe famatu xienrenlashi hhelanughun wo. Mexihaye kunni fanmiende kieliese hhelase khizhezho. Mexihashi manlai gonjisan Huda wo, chanqi doulakui wo. Amine!
6 Ingieseye bi Hudai kielienshi belienni wo giezhi ese kieliezho. Isiliese olusanlashi man Isilie kun pusho. 7 Iburaheimuni houdeilashi man hhei kewosi pusho. Zinie Isagheise olusei chii houdei giezhi urune giezho. 8 Isishi beyese olusan kesilashi man Hudai kewosi pusho. Zinie dain giesan mutun olusan kesilai houdeide sanane. 9 Eneshi Huda dain giesan kielien wo, "Gonien eli kuse bi irene. Sare nie kewon olune." 10 Zinie ene pusho. Mai xienren Isagheise Libaijia shongo laikudeye qingiezho. 11-12 Shongoni ese oluzhi gounii, doghunnii ese khizhekude Huda Libaijiade, "Jianlai fugieni ganinughunyi chenliene." giezhi kieliewo. Ingiezhi Huda kunni sunghuse goya mujighalane giezho. Kun giekughala ese giezho, kunni uruzhi iresan Huda jiejin giezho. 13 Jinwun jiere Huda kieliesan mutun, "Yagebude bi orezho, Isaode ese orezho."
14 Ingiese matan matui kieliene? Huda gundan uwonu? Kenjin pusho. 15 Huda Musade kieliewo,
"Bi kiende ubali xiise kiende ubali xiine.
Kiende nenjien ogise kiende nenjien ogine."
16 Ingie uzhese eneshi kunni duran, xiacha giekui kouisan pusho. Ubali xiisan Hudade kouizho. 17 Jinwun jiere Huda Falaode kieliezho, "Bi chii tungo giezhi nenline xienjighazhi qienxiade nierene chonji kurughane giezhi chii undudaghawo." 18 Ingie uzhese Huda kiende ubali xiise kiende ubali xiine. Kienyi khiduzheghase kienyi khiduzheghane.
Hudai Ubali Xiiku
19 Ingiese chi made kieliene, "Qinse Huda kunlade yangiezhi gui teine? Kien hhei isii fandui giene?" 20 Chishi kien wo? Zinie kun wo. Hudaghala jianjindunu? Gholusan dunxi matugie hhei gholughasande, "Chi mii yangiezhi intui giewo?" giezhi kieliene? 21 Ighachi shuwa dundase niegieda shuwai agidene niei guizhuntu, niei bixintu ighai gieku qienli uwonu? 22 Hudaye niekielien wo. Hhe hokukune, nenline mejieghaku duran woma, hokuzhi widaghane giesan kunlade hende rennai giewo. 23 Ingiedene Huda ubali xiisan kunlade hhei fama olon bikui mejieghazho. Enelashi famai ogine giezhi melie zhunbei giesan kunla wo, 24 yeshijiu Huda uruzhi iresan matan wo. Gon Yutai kun pusho, niman kunlaye enbene. 25 Zhen Huda Hexiyani Shu jiere kieliesan mutun,
"Mii bexin pushotu kunlai
bi mii bexin giezhi urune.
Uye oresanlade
bi oresan giezhi urune."
26 Pse kieliezho,
"Ta mii bexin pusho giesan yen hhe oronde
hhelai chanqiku Hudai kesila giezhi urune."
27 Isilie kunlai kieliese Isaiya fugiede kieliezho,
"Isilie kunla olonde haibienni shazi niekielien woma,
zinie feiliesanlai jiuine.
28 Ezhan zemin jiere panjikune
ghujighande man gie baraghane."
29 Isaiya melieshi kieliezhi daosan mutun,
"Qienwon buduini Ezhan matande houdei ese feilieghazhoshi
matan zaojiu Sodoma, Emola gholuwo."
Isilie Kunla Gouxioxini Ese Jienliewo
30 Ingiese matan matui kieliene? Hudare goudakui onxian ese giesan niman kunla xianxin giekughala Hudare goudawo. 31 Guijinghala Hudare goudane giesan Isilie kunla khareidene guijinni mujide dai dazho. 32 Eneshi yan yenyin wo? Eneshi hhela giekudene kouizho, xianxin giekude ese kouizho. Hhela banjighaku tashi jiere banjiwo. 33 Jinwun jiere jilasan mutun,
"Bi Xiwunde nie banjighaku tashi teiwo.
Kunni banjighaku tashi wo.
Hhei xianxin giesan kunla jiuren ulie giene."