1 Ingiese gaijiula, bi Hudai ubali xiikughala tai goude fenfulaye. Ta beyene amitu mure danlaghazhi Hudade ogi. Intu mureshi Huda xiqi biku wo, zhiguitu wo. Eneshijiu zhenzhenji beiiku wo. 2 Ene duyani bu dagha. Sumulakune arunzhazhi shinishighadene Hudai gou, bayasuku, onqien isii shiizhi mejie.

3 Bi made ogisan nenjienghala ta jien kunlade kielieye, goyane texien undude bu uzhe. Goude sumulazhi Huda tande ghughazhi ogisan xianxin gieku fenlianghala goyane heshide uzhe. 4 Matanyi nie beye jiere iyanzi olon biliuzhe zoin buxian mutun 5 matanye olon woma, Mexihai miende nie beye wo. Nienieji beyede lienjizhi buxiantu iyanzi gholuwo. 6 Huda nenjienghalane matande buxiantu nenli ogizho. Hudai kielienyi kieliekushi xianxin gieku kamaghala kielie. 7 Ushilakushi ushila, surughakushi surugha. 8 Zhichi giezhi kieliechenla zhichi gie. Ogichenla dafande ogi. Gonjichenla xiacha giezhi gonji. Ubali xiichenla bayasuzhi gie.

9 Orekude jianii bu deila. Doghunnii henji, gounii barei. 10 Zhenzhenji orekughala nieniedene ore. Ranjizhi nieniene zunji. 11 Langan bu giedene zhughesene rexinde Ezhanni shunji. 12 Panjizhi bayasu, kunnan dunda rennai gie, izhi onxian gie. 13 Nanxintu shentulade ogi. Bayasuzhi kunlai jienlie. 14 Tai heisanlade oluzhi gouni kielie, bu kharadene gouni kielie. 15 Bayasuchen kunlare hhantu bayasu, wilachen kunlare hhantu wila. 16 Nieniedene heqitughan, goyane undude bu uzhezhi bixin kunlare laiwon gie. Goyane jienzha wo bu gie. 17 Kiemade doghunnide doghunnii bouchou bu gie, dajiala gou wo giesan shiqinni jinlianji gie. 18 Tande nengou bise jinlianji jien kunlare heqitu. 19 Mii orentula, goyane bouchou bu giedene Ezhan hhelai faikui saghei. Jinwun jiere jilasan mutun, "Ezhan kieliezho, 'Bouchoushi bi giekui wo, bi kharulune.'" 20 Khareidene chii duitou oliesuse ijiegha. Undasuse ochigha. Chi ingiezhi giese shitan khanni hhei qiorun jiere teizho. 21 Goyasene doghunnii bu injigha, gounighala doghunnise inji.